Երեկ Ազգային ժողովի «Քաղաքացիական պայմանագիր» խմբակցության պատգամավոր Հակոբ Ասլանյանի հետ երթուղային ավտոմեքենայում վիճաբանության մեջ մտած Սամվել Վարդանյանին ձերբակալել էին և կեսգիշերին քննչական վարչությունից տեղափոխել ձերբակալվածների պահման վայր: Սակայն, վարչության շենքից 1-2 րոպե հեռանալուց հետո, ճանապարհին ուղեկցող երկու ոստիկանի մոտ միաժամանակ «բնական կարիքները» հոգալու անհրաժեշտություն է առաջացել և Սամվելին թողել են ավտոմեքենայի մեջ ու գնացել: Դիմակավորված անձինք մոտեցել են, ձեռնաշղթաներով կապված Սամվելին դուրս հանել ավտոմեքենայից և ծեծի ենթարկել՝ պատճառելով մարմնական վնասվածքներ: Դեպքի մասին  նրա փաստաբաններն իմացել են պատահմամբ, երբ այսօր՝ ԱԺ պատգամավորները տեսակցության են գնացել Սամվելին, և վերջինս մանրամասներ է փոխանցել:

Նշենք, որ երեկ տեսանյութ էր տարածվել, որում պատգամավոր Հակոբ Ասլանյանի հետ վիճաբանություն է եղել հասարակական տրանսպորտում, ինչից հետո քրեական վարույթ է նախաձեռնվել՝ խուլիգանության հատկանիշներով: Միջադեպի մասնակիցներից Սամվել Վարդանյանը ձերբակալվել է:

Քիչ առաջ արտահերթ մամուլի ասուլիս էին հրավիրել Սամվել Վարդանյանի փաստաբաններ Ռուբեն Մելիքյանն ու Վարազդատ Հարությունյանը: Նրանց խոսքերով՝ Սամվելի նկատմամբ անմարդկային վերաբերմունքը կազմակերպվել է իշխող կուսակցության կողմից, որին մասնակցություն է ունեցել նաև Ոստիկանությունը: Դեպքի մասին փաստաբանները չեն իմացել: Պատգամավորներն են այցի ժամանակ պարզել, թե ինչ է կատարվել գիշերը Սամվել Վարդանյանի հետ, որից հետո դեպքի մանրամասները հանրայնացվել են:

Վարազդատ Հարությունյանն ասաց, որ Դատաբժշկական փորձաքննությունների կենտրոնում այսօր տեսել է Սամվելին: Նրա ջինսի տաբատի վրա եղել են թարմ խոտի հետքեր, ճակատային մասը, աջ ձեռքն այտուցված են եղել, ձախ քունքային հատվածը՝ վնասված, արյան զեղումներով: Քերծվածքներ են եղել նաև ուսի, ձեռքի հատվածներում: Սա այն դեպքում, երբ երեկ՝ ժամը 23:45-ին, քննչական վարչության շենքում հրաժեշտ են տվել Սամվելին, նա որևէ վնասվածք չի ունեցել, ինքնազգացողությունը լավ է եղել և որևէ բանից չի դժգոհել: Հագուստը եղել է պատշաճ, առանց վնասվածքների:

Սամվելը պատմել է, որ երբ Ոստիկանության աշխատակիցների ուղեկցությամբ դուրս են եկել քննչական վարչությունից, որ գնան ձերբակալվածների պահման վայր, 1-2 րոպե գնալուց հետո Ոստիկանության ավտոմեքենան կանգնել է, և քաղաքացիական հագուստով երկու աշխատակիցները հայտարարել են, թե բնական կարիքները հոգալու համար պետք է իջնեն: Դրանից հետո ամբողջությամբ սև հագնված դիմակավորված անձինք, որոնցից Սամվելը 3 հոգու է տեսել, մեքենայից դուրս են հանել տղային, տարել են մի քանի մետր հեռու, խոտածածկ հատվածում ստիպել են ծնկել, գլխից բռնած հարվածել են գետնին, որից հետո հարվածել են ձեռքերով: Ծեծը զուգորդվել է սեռական բնույթի հայհոյանքներով:

Փաստաբան Վարազդան Հարությունյանի փոխանցմամբ՝ դիմակավորված անձինք պահանջել են, որ Սամվելը կրկնի իր վերաբերյալ սեռական բնույթի հայհոյանքները: Սամվելը հրաժարվել ու ըմբոստացել է, ինչից հետո թքել են տղայի վրա: Վ. Հարությունյանն ասաց, որ դիմակավորված անձինք իջեցրել են Սամվելի տաբատը, փայտը պահել են ոտքերի արանքում, սակայն որևէ գործողություն չեն կատարել:

Ծեծը տևել է 3-4 րոպե, որից հետո քարշ տալով Սամվելին բերել, գցել են մեքենայի մեջ, հեռացել: Կարճ ժամանակ անց հայտնվել են տղային ձերբակալվածների պահման վայր ուղեկցող ոստիկանները: Սամվելի շնչառությունն արագացած է եղել, ծաղրելու նպատակով հարցրել են, թե նրան ինչ է եղել՝ «նոր լավ էր»:

«Այն վարքը, որ ցուցաբերել են դիմակավորված անձինք, նման պատմություններ լսել ենք միայն Ադրբեջանի գերությունից վերադարձածներից»,- ասում է փաստաբանը՝ հավելելով, որ դեպքի մանրամասները ներկայացնելու համար ստացել են Ս. Վարդանյանի համաձայնությունը:

Վ. Հարությունյանը չի կարողացել հիշել նմանատիպ մեկ այլ դեպք, որ տեղի է ունեցել վերջին տարիների ընթացքում:

Ռուբեն Մելիքյանն ասում է, որ երեկ կեսգիշերին մոտ տեղի ունեցածն աննախադեպ բան է, ինչը խոսում է Հայաստանի ներկայիս իշխանությունների հետագա դեգրադացիայի մասին: Դա հերթական քայլն է դեպի մարդկային, իրավական արժեքների գահավիժում: Ըստ փաստաբանի՝ տեղի է ունեցել սահմռկեցուցիչ հանցագործություն մի մարդու նկատմամբ, ով գտնվում է պետության լիակատար պատասխանատվության ներքո: Պետությունը ոտքով- գլխով պատասխանատու է այդ անձի համար, քանի որ նա ձերբակալված է եղել, և նրա կյանքի ու առողջության համար պատասխանատուն պետությունն է:

Ռուբեն Մելիքյանի խոսքերով՝ Ոստիկանությունը եղել է այս հանցագործության մասնակիցը, երբ ձեռքերը հետևում ձեռնաշղթաներով կապված անձին աշխատակիցները թողել են ավտոմեքենայի մեջ և գնացել են:

Փաստաբան Մելիքյանի դիտարկմամբ՝ պատգամավորի հետ միջադեպի վերաբերյալ ԱԺ նախագահ Ալեն Սիմոնյանի խոսքը և իշխող կուսակցության համակիր այլ անձանց հայտարարությունները հիմք են տալիս եզրակացնելու, որ այս բռնությունը կազմակերպվել է «Քաղաքացիական պայմանագիր» կուսակցության կողմից:

Այն, որ դեպքը կազմակերպված է եղել, ըստ փաստաբանի, ցույց է տալիս նաև իրավապահ մարմինների լռությամբ: Մինչ այժմ քրեական վարույթ նախաձեռնված չէ:

Սա այն դեպքում, երբ Ռ. Մելիքյանի փոխանցմամբ՝ պատգամավորի հետ տեղի ունեցած միջադեպից մոտ 2 ժամ հետո Սամվել Վարդանյանը ձերբակալվել է, տարվել է Ոստիկանության բաժին, որտեղից էլ տեղափոխվել է Երևանի քննչական վարչություն: Այս ընթացքում շատ արագ քրեական վարույթ են նախաձեռնել, կատարել մի շարք քննչական գործողություններ, առերեսումներ: Սակայն, երբ խոսքը գնում է արդեն Սամվել Վարդանյանի նկատմամբ կիրառված խոշտանգման մասին՝ լռություն է:

Ռուբեն Մելիքյանն ասում է, որ գոնե հայտնի է, թե ովքեր են եղել Սամվել Վարդանյանին ուղեկցող երկու անձինք, քանի որ փաստաթղթավորված է: Առնվազն այսօր՝ ժամը 13:10-ի դրությամբ, երբ դեպքի մասին հանրայնացվել է, պետք է կանչեին և պարզեին, թե ով է բնական կարիքները հոգալու հանձնարարություն տվել նրանց, երբ երկուսի մոտ էլ միաժամանակ այդ կարիքն առաջացել է: Մինչդեռ մինչ այժմ տեղեկություն չկա, որ այդ մարդիկ առնվազն աշխատանքից ազատվել են, ինչը ևս նշանակում է, որ կազմակերպված է եղել:

Ըստ Ռ. Մելիքյանի՝ նույնիսկ Մարդու իրավունքների պաշտպանի գրասենյակը հայտարարություն չի տարածել: ՄԻՊ-ի գրասենյակից այսօր 2 աշխատակից են եղել ձերբակալվածների պահման վայր, ներս են մտել ու 20 րոպե անց դուրս եկել:

Լուսանկարում՝ Սամվել Վարդանյանը