Գլխավոր դատախազության ապօրինի ծագում ունեցող գույքի բռնագանձման գործերով վարչությունում Պետական եկամուտների կոմիտեի նախագահի նախկին տեղակալ Արմեն Սաքապետոյանի ու ընտանիքի անդամների գույքի վերաբերյալ ուսումնասիրություն է իրականացվել, և կազմվել է ամփոփագիր: 1 մլրդ 60 մլն 114 հազ. դրամի չափով արգելանք է դրվել Արմեն Սաքապետոյանին պատկանող գույքի վրա, այդ թվում՝ իր մասնակցությամբ ընկերությունների:

Նախկին պաշտոնյայից բացի, Ապօրինի ծագում ունեցող գույքի բռնագանձման գործերով վարչություն են հրավիրվել կինը՝ Մարիաննա Մկրտչյանը, որդին՝ Հայկ Սաքապետոյանը և եղբայրը՝ Արեգ Սաքապետոյանը: Վերջիններիս անվամբ հաշվառված գույքը ենթակա է բռնագանձման, քանի որ, նախնական տեղեկություններով, դրանց իրական սեփականատերը Արմեն Սաքապետոյանն է:

Այս փուլում Գլխավոր դատախազությունը տեղեկատվություն չի հրապարակում բռնագանձման ենթակա գույքի, այդ թվում՝ դրամական միջոցների վերաբերյալ: Պատճառաբանությունն այն է, որ հնարավոր է ներկայացվեն ապացույցներ, հիմնավորումներ, և գույքի ցանկը փոփոխվի:

Արմեն Սաքապետոյանը՝ պաշտոնյայից մինչև բիզնեսմեն

Արմեն Սաքապետոյանը ՊԵԿ նախագահի տեղակալի պաշտոնում նշանակվել է 2016թ. մարտին՝ այդ ժամանակ վարչապետ Հովիկ Աբրահամյանի որոշմամբ: 2018թ. իշխանափոխությունից հետո՝ մայիսի 21-ին, Արմեն Սաքապետոյանը, իր դիմումի համաձայն, ազատվել է զբաղեցրած պաշտոնից:

Արմեն Սաքապետոյանն այժմ իրականացնում է ձեռնարկատիրական գործունեություն: Նրան են պատկանում մի շարք ընկերություններում բաժնեմասեր: Ավելին՝ իր ընկերություններից մեկը հասցրել է նաև օգտվել պետական աջակցության ծրագրից:

«Ենթակառուցվածքներ ներդրումների դիմաց» միջոցառման շրջանակում Կառավարությունը 2023թ. հուլիսին որոշել է հաստատել «Յու Էմ Ագրո» ՍՊԸ-ի ներդրումային ծրագիրը և տրամադրել օժանդակություն՝ հողամասերի ջրարբիացումն ապահովելու համար անհրաժեշտ ենթակառուցվածքի կառուցման նպատակով:

«Յու Էմ Ագրո» ՍՊԸ-ն հիմնվել է 2018թ. հուլիսին: 2021թ. դեկտեմբերի 7-ից ընկերության միանձնյա սեփականատեր է դարձել Արմեն Սաքապետոյանը: Մեկ տարի անց ընկերության տնօրենը դարձել է եղբայրը՝ Արեգ Սաքապետոյանը:

Ըստ Կառավարության որոշման՝ ընկերությունը նախատեսել է Արմավիրի մարզի Բաղրամյան համայնքի Բագարան և Երվանդաշատ գյուղերում սեփականության իրավունքով իրեն պատկանող 2088 հա գյուղատնտեսական նշանակության հողամասերում հիմնել նուշի ինտենսիվ այգիներ և խոշոր ֆերմերային տնտեսություն: Նուշի այգիներ հիմնելու մեկնարկը տրվել է 2022թ. նոյեմբերի 1-ից:

Տարածքին մոտ գտնվող Ախուրյանի ջրամբարի ջուրը չի հասնում ընկերության գործունեության համար նախատեսված տարածքներ, իսկ տվյալ տարածքում, որտեղ նախատեսվում է իրականացնել ներդրումային ծրագիրը, խիստ անհրաժեշտ է պատշաճ կաթիլային ոռոգման համակարգ ունենալը, որը կբավականացնի նուշի այգիների պատշաճ մշակման համար։ Կառավարության աջակցությունը վերաբերում է հենց ոռոգման ջուրը տարածք հասցնելուն:

«Յու Էմ Ագրո» ՍՊԸ-ի կողմից ծրագրի շրջանակում իրականացվելիք ներդրումների ծավալը 1.6 մլրդ դրամ է: Սակայն, Կառավարության կողմից տրամադրվող աջակցության շրջանակներում կառուցվող ենթակառուցվածքի արժեքը չի կարող գերազանցել ծրագրի շրջանակում իրականացվելիք ներդրումների ծավալի ընդհանուր արժեքի 20 տոկոսը:

«Յու Էմ Ագրո» ՍՊԸ-ն, ըստ իրավաբանական անձանց պետական ռեգիստրի, այս տարի անվանափոխվել և դարձել է «Յերրա» ՍՊԸ:

Օրեր առաջ՝ 2024թ. ապրիլի 25-ին, Հարկադիր կատարումն ապահովող ծառայության ապօրինի ծագում ունեցող գույքի բռնագանձման և հատուկ նշանակության բաժնի կողմից 1 մլրդ 60 մլն 114 հազ. դրամի չափով արգելանք է դրվել Արմեն Սաքապետոյանին պատկանող գույքի վրա, այդ թվում՝ իր մասնակցությամբ ընկերությունների:

Իրական շահառուների հայտարարագրի համաձայն՝ ընկուզապտուղների աճեցմամբ զբաղվող «Ալմոնդ Ագրո» ՓԲԸ-ի 33.3%-ի սեփականատերը Արմեն Սաքապետոյանի եղբայրն է՝ Արեգ Սաքապետոյանը, մյուս 33.3%-ի սեփականատերն այլ անձ է, սակայն մնացած բաժնեմասի վերաբերյալ տեղեկատվություն չկա: Հաշվի առնելով այն հանգամանքը, որ Դատախազությունը Արեգ Սաքապետոյանի անվամբ հաշվառված գույքը ևս ցանկանում է բռնագանձել՝ ենթադրվում է, որ նրա ունեցած բաժնեմասի իրական սեփականատեր դիտարկվում է եղբայրը՝ Արմեն Սաքապետոյանը:

«Ալմոնդ Ագրո» ՓԲԸ-ն գրանցված է Արմավիրի մարզի Վանանդ գյուղում:

Նույն գործունեությամբ զբաղվում է նաև «1էսքյու Ագրո» ՍՊԸ-ն: Այն ստեղծվել է 2021թ. հոկտեմբերին՝ Արմեն Սաքապետոյանի կողմից, սակայն 2024թ. հունվարին սեփականատերը փոխվել է, և ընկերության 100%  սեփականությունն անցել է եղբորը՝ Արեգ Սաքապետոյանին:

Այս ընկերության կանոնադրային կապիտալը մոտ 129 մլն դրամ է: Հարկադիր կատարումն ապահովող ծառայությունը «1էսքյու Ագրո» ՍՊԸ-ի վրա ևս արգելանք է կիրառել:

2023թ. նոյեմբերից «1էսքյու Ագրո» ՍՊԸ-ին է պատկանում նախկին պատգամավոր Տիգրան Արզաքանցյանի հիմնադրած «Արմենիակ» ընկերությունը: Վերջինս հանքարդյունաբերությամբ հետաքրքրվող ընկերություն է, որի գործունեությունը ժամանակավորապես դադարեցված է:

«Բեյսիք Ինվեսթմենթ Ընդ Դիվելոփմենթ» ՓԲԸ-ն հիմնվել է 2019թ. փետրվարին: Ընկերության 33.3%-ը պատկանում է Արմեն Սաքապետոյանին: Ընկերությունն իրականացնում է բնակելի, հասարակական և արտադրական շենքերի շինարարություն:

Շինաշխատանքների իրականացմամբ զբաղվող «Բեստ Փրոփերթիս» ՍՊԸ-ի 40%-ը ևս Արմեն Սաքապետոյանինն է: Նա ընկերության սեփականատեր է դարձել 2022թ. ապրիլին: Ընկերությունը Երևան քաղաքի Հալաբյան փողոցի վրա բնակելի շենք է կառուցում:

Բնակելի շենքերի շինարարությամբ զբաղվող մեկ այլ՝ «Պարկ Դիվելոփմենթ» ՍՊԸ-ի 25%-ը Արմեն Սաքապետոյանին է պատկանում: Ընկերությունն այժմ բնակելի շենք է կառուցում Կոտայքի մարզի Հրազդան քաղաքում:

«Պարկ Դիվելոփմենթ» ՍՊԸ-ն ստեղծվել է 2022թ. հոկտեմբերին, սակայն Սաքապետոյանը ընկերության համասեփականատեր է դարձել ավելի ուշ՝ 2023թ. դեկտեմբերի 28-ին:

Արմեն Սաքապետոյանին է պատկանում նաև անշարժ գույքի առուվաճառքով զբաղվող «Իմմոբիլիեր» ՍՊԸ-ն: Ընկերությունը հիմնվել է 2021թ. Ա. Սաքապետոյանի որդու՝ Հայկ Սաքապետոյանի կողմից: 2023թ. ընկերության սեփականատեր է դարձել դուստրը՝ Սոնա Սաքապետոյանը, իսկ 2024թ. ապրիլի 8-ից ընկերության միակ սեփականատերը Արմեն Սաքապետոյանն է:

Հայկ Սաքապետոյանը 2023թ. օգոստոսին ստեղծված հաշվապահական և աուդիտ ծառայություններ մատուցող «Ունիվերսալ Ֆայնենշլ Սոլուշնս» ՍՊԸ-ի համասեփականատերերից է: Նրան է պատկանում ընկերության 33.34%-ը:

2023թ. հունվարից Արմեն Սաքապետոյանը նաև խոհանոցային կահույքի արտադրությամբ զբաղվող «Ս.Թ. Ջեյքոփ» ՍՊԸ-ի 50%-ի սեփականատերն է: Ընկերությունը ստեղծվել է 2012թ․-ին:

Հարկ է նշել, որ 2018թ., երբ Արմեն Սաքապետոյանը թողնում էր պետական պաշտոնը, հայտարարագիր է ներկայացրել, ըստ որի՝ պաշտոնը դադարեցնելու օրվա դրությամբ ունեցել է 4 անշարժ գույք, «MERCEDES-BENZ E 200» մակնիշի ավտոմեքենա:

Որպես 8 մլն դրամը կամ համարժեք արտարժույթը գերազանցող թանկարժեք գույք հայտարարագրել է ձեռագործ գորգ:

Եկամուտները կազմել են 56 մլն 529 հազ. դրամ, որից 4 մլն 529 հազ. դրամը գոյացել էր ՊԵԿ-ից ստացած աշխատավարձից, իսկ 52 մլն դրամը՝ գույքի օտարումից:

Պաշտոնը դադարեցնելու օրվա դրությամբ Արմեն Սաքապետոյանը, որպես դրամական միջոց, հայտարարագրել է 38 մլն 650 հազ. դրամ և 2500 ԱՄՆ դոլար: