«Պրն. Մամոյան, ես ցավում եմ, որ Դուք ոչխարաբուծությամբ չեք զբաղվում»
[ 5 Փետրվարի, 2010 | 19:19 ]
Գյուղնախարարության պաշտոնյան պնդում է, որ մայիսին ոչխարի միսը կէժանանա
Այսօր «Հայելի» ակումբում Հայաստանում ոչխարաբուծության ներկա վիճակի և ոչխարի մսի թանկացման մասին բանավիճեցին Եզդիների ազգային միության խորհրդի անդամ, Հայկական ագրարագյուղացիական միավորման ազգային փոքրամասնությունների գծով խորհրդական Օմար Մամոյանը և ՀՀ Գյուղատնտեսության նախարարության աշխատակազմի անասնաբուծության և տոհմային գործի վարչության պետ Աշոտ Հովհաննիսյանը: Բանավեճն այնքան թեժ էր, որ Օ. Մամոյանը մամուլի ակումբը լքեց մինչ ասուլիսի ավարտը: Ստորև ներկայացնում ենք բանախոսների տեսակետները: »»»»»
Այսօր Ազգային ժողովի նախագահ Հովիկ Աբրահամյանը հանդիպել է Երեւանում ԵԱՀԿ գրասենյակի ղեկավար Սերգեյ Կապինոսին: Զրուցակիցները բարձր են գնահատել ՀՀ ԱԺ եւ ԵԱՀԿ Երեւանի գրասենյակի համագործակցությունը եւ գոհունակությամբ արձանագրել, որ նախորդ տարվա ընթացքում հաջողությամբ իրականացվել են 2009 թ. ապրիլի 15-ի ՀՀ ԱԺ եւ ԵԱՀԿ Երեւանի գրասենյակի միջեւ կնքված Համագործակցության հուշագրով նախատեսված բոլոր միջոցառումները: 
Այս տարի Ջավախքում նախատեսվում է կազմակերպել երգի ու պարի միջազգային փառատոն: Այսօր այս մասին տեղեկացրեց ծնունդով ջավախքցի ԱԺ պատգամավոր, «Վիրահայերի միասնության» նախագահության անդամ Հայկ Սանոսյանը: Համաձայն ծրագրի, որը դեռ նախանական փուլում է, աշխարհի տարբեր ծայրերից հայերը գալու են Ջավախք, որպեսզի մասնակցեն այդ փառատոնին: 
Այսօր Ղարաբաղի խորհրդարանական եւ արտախորհրդարանական քաղաքական ուժերի ներկայացուցիչները քննարկել են առաջին ընթերցմամբ ընդունված «ԼՂՀ ընտրական օրենսգրքում փոփոխություններ եւ լրացումներ կատարելու մասին» օրենքի նախագիծը: Քննարկումներին ներկա էր նաեւ ԼՂՀ կենտրոնական ընտրական հանձնաժողովի նախագահ Սերգեյ Նասիբյանը: 
Այսօր «Արցախ» ակումբում ծնունդով ջավախքցի ԱԺ պատգամավոր, «Վիրահայերի միասնություն» կազմակերպության նախագահության անդամ Հայկ Սանոսյանը ներկայացրեց Վրաստանի իշխանությունների կողմից Ջավախքում իրականացրած մի քանի սոցիալ-տնտեսական ծրագրեր: Բանախոսի տվյալներով` անցյալ տարի Վրաստանի պետական բյուջեից մոտ 20 մլն դոլար է հատկացվել Ջավախքին: Իսկ 40 կմ երկարության գազամուղը, Հայկ Սանոսյանի ասելով, Վրաստանի «բարի կամքի դրսևորման» շնորհիվ է հասել մինչև Ախալքալաք: 
Նախագահ Սերժ Սարգսյանն այսօր ընդունել է Ռուսաստանի Դաշնության առաջին փոխվարչապետ, ԱՊՀ հարցերով Ռուսաստանի ազգային համակարգող Իգոր Շուվալովին: ՌԴ այս տարի ստանձնել է ԱՊՀ նախագահությունը:
Վրաստանում Հայ Առաքելական Եկեղեցու կարգավիճակի հարցով ցանկացած հայ իրավունք ունի զբաղվելու, բայց խնդրի լուծման համար հարկավոր է Մայր Աթոռի միջամտությունը: Այս տեսակետն այսօր «Արցախ» մամուլի ակումբում հայտնեց ԱԺ պատգամավոր, «Վիրահայերի միասնություն» կազմակերպության նախագահության անդամ Հայկ Սանոսյանը: «Մեր եկեղեցին պետք է փնտրի եզրեր, հարաբերություններ, որպեսզի կարողանա լուծել խնդիրը»,- ասաց բանախոսը: 
Հայրենական ապրանք արտադրողների նախագահ Վազգեն Սաֆարյանը, այսօր պատասխանելով «Հետքի» հարցին, ասաց, որ այն արտադրանքները, որոնք արտահանվում են Հայաստանից որակական եւ գնային առումով մրցունակ են միջազգային շուկայում:
