Թալինի նախկին քաղաքապետ Մնացական Մնացականյանը մայիսի 6-ի ընտրությունների արդյունքում առաջին անգամ հայտնվեց խորհրդարանում: Պատգամավոր դարձավ ՀՀԿ համամասնական ցուցակով: Մինչ այդ նա 10 տարի ղեկավարել է Արագածոտնի մարզի Թալին քաղաքային համայնքը:

Թեև իր կենսագրության ոչ այնքան հարուստ փորձին, Մնացական Մնացականյանը հասցրել է 16 անուն անշարժ գույք ձեռք բերել: Պատգամավորը Թալին քաղաքում ունի 13 տնամերձ հողամաս, բնակելի տուն, օժանդակ կառույցներ, վարելահողեր, արտադրական շինություններ, հասարակական շինություններ:

Մ. Մնացականյանը Արագածոտնի մարզի Լուսակն գյուղում ունի նաեւ 16.87 հա վարելահող, իսկ Երեւանի Բաղրամյան փողոցում` 104.8քմ մակերեսով բնակարան եւ հողամաս: 

Մնացական Մնացականյանը 2011թ. մարտի 1-ից մինչեւ 2012թ-ի նույն ժամանակահատվածը որպես աշխատավարձ Թալինի քաղաքապետարանից ստացել է 1 մլն 667 հազար 700 դրամ, 3 մլն 500 հազար դրամի եկամուտ էլ պատգամավորին ապահովել է բնամթերքի վաճառքը:

Այս տարվա մարտի 1-ի դրությամբ Մնացական Մնացականյանն իր հաշվին ունեցել է 75 մլն դրամ եւ 25 հազար դոլար:

Նշենք, որ ՀՀԿ-ական պատգամավորին է պատկանում «Թալինի ավտոտրանսպորտային եւ ճանապարհների» ՓԲԸ-ի բաժնետոմսերի 99.7 տոկոսը: