Կրթության փորձագետ Աննա Գալստյանը Երևանի ավագանու թեկնածու կուսակացությունների նախընտրական ծրագրերը ուսումնասիրելուց հետո նշում է, որ դրանցում կրթությանը վերաբերող առաջարկները հիմնականում կրթական տարածքների (դպրոցներ, մանկապարտեզներ) վերանորոգման մասին են: «Հրաշալի կլիներ, եթե կրթական ծրագրերով հանդես գալուց առաջ կուսակցությունները  ավելի լավ ծանոթանային խնդիրներին և լուծումները չփնտրեին միայն տարածքների վերանորոգման և ընդլայնման մեջ»,- ասում է նա:

Դպրոցների և նախակրթարանների  շենքային պայմանների բարելավման առաջարկով իրենց նախընտրական ծրագրերում հանդես են եկել «Հայ ագային կոնգրես» (ՀԱԿ), «Բարգավաճ Հայաստան», Հայաստանի հանրապետական կուսակցությունները:

ՀԱԿԿ. «Ուսումնական հաստատությունների մարզադահլիճները և մարզահրապարակները կհամապատասխանեցվեն ժամանակակից պահանջներին»։

ԲՀԿ. «Անհրաժեշտ է, որպեսզի քաղաքի կառավարման առաջիկա քառամյա շրջանում  վերանորոգման կարիք ունեցող բոլոր դպրոցները և մշակույթի օջախները հիմնանորոգվեն և ապահովվեն ժամանանակից տեխնիկական և համակարգչային միջոցներով»:

«Կարևոր ենք համարում նաև նախակրթարանների շենքային և կենցաղային պայմանների բարելավման, ինչպես նաև դրանց շենքային մակերեսների ավելացման խնդիրները»:

ՀՀԿ. «Մանկապարտեզների և դպրոցների, արտադպրոցական հաստատությունների շենքերի վերանորոգման և հիմնանորոգման շարունակականության ապահովում»:

«Անկեղծ, որևէ անբարեկարգ դպրոց Երևանում չեմ տեսել»,- նշում է Ա. Գալստյանը: Փոխարենը փորձագետի խոսքով, օրինակ, թվային տեխնոլոգիաները կարող են առանցքային դեր խաղալ կրթության մեջ, իսկ կուսակցական ծրագրերում անդրադարձն այդ խնդրին «զուտ տեսական բնույթ» ունի: Կրթության ոլորտում ՏՏ-ի ներդրմանը թեկնածու կուսակցություներից անդրադարձել են երեքը՝ ՀԱԿԿ-ը, ԲՀԿ-ն և ՕԵԿ-ը:

ՀԱԿԿ. Երևանի հանրակրթական ուսումնական հաստատությունների շենքային պայմանները կհամապատասխանեցվեն ժամանակակից պահանջներին, կապահովվեն ժամանակակից տեղեկատվական տեխնոլոգիաներով, համապատասխան նյութատեխնիկական բազայով, կնորացվի դպրոցական գույքը։

Երևանի դպրոցների գրադարանային ֆոնդը կհամալրվի գեղարվեստական, մեթոդական և մասնագիտական գրականությամբ։  Կստեղծվեն Էլեկտրոնային գրադարաններ։ 

ՕԵԿ. Դպրոցների, միջին մասնագիտական կրթության հաստատությունների նյութատեխնիկական բազայի արդիականացումը, համակարգչային և  ինտերնետային միասնական ցանցի ձևավորումը,

ԲՀԿ. Անհրաժեշտ է, որպեսզի քաղաքի կառավարման առաջիկա քառամյա շրջանում  վերանորոգման կարիք ունեցող բոլոր դպրոցները և մշակույթի օջախները հիմնանորոգվեն և ապահովվեն ժամանանակից տեխնիկական և համակարգչային միջոցներով:

Այս առաջարկներում, Աննա Գալստյանի խոսքով, նորություն չկա: «Միասնական կրթական ցանցեր, ֆորումներ, կրթական ծրագրերի շտեմարաններ արդեն կան, և շատ դեպքերում ոլորտից անտեղյակ մասնագետների պատճառով դրանք չեն կիրառվում»,- նշում է նա: Կրթության ոլորտի մասնագետների մոտ ՏՏ-ի հանդեպ հետաքրքրություն առաջացնելու համար ավագանու ընտրված կուսակցությունները ֆինանսական մեծ միջոցների կարիք չեն ունենալու` ասում է Ա. Գալստյանը: «Նորարարությանն ինտեգրվելու համար պետք չէ սպասել ֆինանսական աջակցության»,- նշում է նա և ավելացնում, որ մասնագետն ինքը պետք է նախաձեռնող լինի, իսկ քաղաքական ուժերի գործը պետք է ուղղված լինի  մասնագետների նախաձեռնողականության բարձրացմանը, ինչը ոչ այնքան ֆինանսական մեծ ներդրումների, որքան ընտրված քաղաքական ուժի ճիշտ գործունեության հետ է կապված:

«Բարև Երևանի» և ՀԱԿԿ-ի ծրագրում նշվում է կրթության ոլորտի ներկայացուցիչների ապաքաղաքականացման հարցը, ինչը Աննա Գալստյանի կածիքով, «միանշանակ հնարավոր» է, եթե կուսկացությունները ընտրվելուց հետո ցանկանան իրականացնել ծրագրում գրվածը: Փորձագետը նկատել է, որ ԲՀԿ-ն միակն է, որ անդրադարձել է ներառական կրթության խնդիրներին:

ՕԵԿ-ն իր նախընտրական ծրագրում անդրադարձել է այն հարցին, որ կրթության, գիտության և տնտեսության միջև փոխշահավետ կապի ամրապնդման համար բուհերում պետք է ստեղծվեն կարիերայի կենտրոններ: Բայց ինչպես նշում է Ա. Գալստյանը, երևանյան «կրթական շատ հաստատություններում այս գործընթացն էլ արդեն լուծված է»:

«Խնդիրն այստեղ այն է, որ շատ քիչ դեպքերում են արդի գործատուները դիմում կարիերայի կենտրոններին, քանի որ դրանց կապը աշխատաշուկայի հետ բացակայում է»,- ասում է նա:

Ինչ վերաբերում է ՀՅԴ-ի ծրագրին, ապա դրանում ընդհանրապես չկան կրթությանն առնչվող նոր խնդիրներ` նշում է փորձագետը, քանի որ «ըստ նրանց նախընտրական ծրագրի` պետք է ընդամենը ընդլայնել արդեն իսկ եղածը»:

«Առաքելություն» կուսակցությունն իր ծրագրում կրթության մասին մեկ նախադասություն ունի. «Մանկապարտեզներում սպասարկման և սննդի որակի էական բարելավում»: Աննա Գալստյանը հույս ունի, որ կուսակցության կողմից կրթական հարցերը այդչափ կարևորելը միայն վրիպակ է, և նրանք ընտրվելու դեպքում կվերանայեն իրենց անելիքները: