Հատվում են հայ-վրացական սահմանի անտառները
«Հայանտառ» ՊՈԱԿ-ի Ջիլիզայի անտառտնտեսության տնօրինության հսկողության տակ գտնվող հայ-վրացական հյուսիսային սահմանի երկայնքով սփռված 15 հազար հեկտար հատուկ` սահմանային և ռազմական նշանակության անտառները ՀՀ անտառային օրենսգրքի համաձայն՝ պետք է ենթարկվեն սահմանափակ հատումների: Ջիլիզայի անտառները, սակայն, համատարած հատվում են և դարձել են բնափայտի արտադրության աղբյուրներ: Դրա արդյունքում՝ սահմանային պաշտպանական նշանակություն ունեցող անտառները նոսրանում են: Հոկտեմբերի 16-ին Ալավերդի-Ջիլիզա ճանապարհի 20-25 կմ-ի վրա գտնվող և ճանապարհին հարող անտառների մի քանի հատատեղերում մարդիկ անտառահատումներ էին իրականցնում: Ակնհայտ էր, որ այն չի համապատասխանում անտառների համատարած սանիտարական հատումների սահմանված պահանջներին:
Սանիտարական հատումները կատարվում են անտառների սանիտարական վիճակի բարելաման, վնասատուների և հիվանդությունների բացասական ազդեցության հետևանքով կենսունակությունը կորցրած կամ ցցաչոր և չորացած ծառերի ոչնչացման նպատակով: Հատումից հետո անտառային հրդեհներից խուսափելու համար ծառերի տերևներն ու ճյուղերը պետք է հեռացվեն հատատեղերից, որից հետո իրակացվում են անտառավերականգնման աշխատանքներ:
Ջիլիզայի անտառներում համատարած հատումների են ենթարկվում առողջ ծառերը: Հատատեղերում մենք ընդամենը մի քանի կոճղերի վրա հանդիպեցինք կարմիր կնիքի: Հատված ծառերի տերևների ու ճյուղերի չորացած հսկա կույտերը անտառում պոտեցիալ վտանգ էին ստեղծում հրդեհների համար: Իսկ անտառավերականգնման աշխատանքների մասին խոսք լինել չի կարող: Սահմանի անտառներում ստեղծված վիճակից մի եզրահանգում կարելի անել` Ջիլիզայի անտառտնտեսության տնօրեն Արամ Բարոյանը և նրա ենթակայությամբ աշխատող 4 անտառապետերը «Հայանտառ» ՊՈԱԿ-ի կողմից իրենց գործում նշանակվել են ոչ թե անտառապահպանման և անտառավերականգնման աշխատանքները կազմակերպելու , այլ սահմանային նշանակության անտառները ոչնչացնելու համար:
Մեկնաբանել