Տնօրենը ընկերության փողերով բնակարան է գնել, իսկ Սեւակ Արծրունին` թիկնապահներ վարձել
«Ջի Էյջ Ստորիջ Էնթերփրայզս» ընկերությանը հասցված վնասների մասին հիմնադիրը` Գարաբեդ Հարութունյանը, տեղեկացել է 2010 թ. սեպտեմբերին, երբ ընկերության տնօրեն դարձավ նրա որդին` Նարեգ Հարթունյանը: Հենց նա բացահայտեց, որ ընկերության միջոցները պակասում են: Սկսած այդ պահից՝ Նարեգ Հարթունյանը ստանձնեց տնօրենի գործառույթները եւ ողջ հետագա գործընթացը վերցրեց իր հսկողության ներքո:
Արտյոմ Մարտիրոսյանը 2008 թ. հոկտեմբերի 1-ից մինչեւ 2010 թ. սեպտեմբերի 11-ը հանդիսացել է «Ջի Էյջ Ստորիջ Էնթերփրայզս» ընկերության տնօրենը, իսկ Սեւակ Արծրունին (Արզարունի) հանդես էր գալիս որպես նույն ընկերության գլխավոր տնօրեն: Հարկային մարմիններին տրված հաշվետվությունների տակ ստորագրել է Արտյոմ Մարտիրոսյանը, քանի որ նրա վրա էին դրված գործադիր մարմնի ղեկավարի` տնօրենի պարտականությունները:
Նարեգը պարզել է, որ բազմաթիվ գործարքներ ընկերության անունից կնքել է Սեւակ Արծրունին: Դրամարկղի ելքի մեծ քանակությամբ օրդերների վրա ընկերության ղեկավարի փոխարեն դրված է Սեւակ Արծրունու ստորագրությունը, որոնցից երեւում է, որ նա հսկել եւ հաստատել է ընկերություն մուտք եղած եւ ելք եղած գումարների շարժը:
Սեւակ Արծրունին 01.12.2009 թ. ՀՀ ոստիկանության պետական պահպանության վարչության անձի անվտանգության եւ գույքի պահպանության բաժնի հետ «Ջի Էյջ Ստորիջ Էնթերփրայզս» ընկերության անունից իր անձի անվտանգությունը ապահովելու նպատակով պայմանագիր է կնքել: Այդ պայմանագրում հանդես է եկել որպես հիմնադիր տնօրեն, ստորագրել եւ հաստատել է պայմանագիրը ընկերության կնիքով: Թե Սեւակ Արծրունու ինչի՞ն են պետք 5 թիկնապահները, դժվար է ասել: Այդ ծառայությունը ընկերության համար ամսական 1 մլն դրամ էր արժենում: Սփյուռքահայ հասարակական գործիչ ու գործարար Ս. Արծրունին հնարավոր է՝ չի ուզում հետ մնալ հայաստանցի օլիգարխներից:
Մի շարք հարցերի պատասխաններ ստանալու համար զանգահարեցինք նրա ղեկավարած «Երկիր» միության գրասենյակ: Մեր հեռախոսազրույցի ընթացքում Սեւակ Արծրունին ասաց, որ այս գործով որեւէ բան չի կարող ասել մինչեւ չխորհրդակցի իր փաստաբանի հետ:
«Ջի Էյջ Ստորիջ Էնթերփրայզս» ընկերության՝ դատարանին ներկայացրած հայցում նշված է. «Փաստորեն, Սեւակը թեեւ որեւէ կերպ չի առնչվել հայցվորի գործունեության հետ, սակայն ապօրինի գործողություններով ընկերության անվան տակ լուծել է անձնական խնդիրներ, ինչի արդյունքում ստանձնել է մի շարք պարտավորություներ եւ վնասներ հասցրել ընկերությանը: Եվ քանի որ Սեւակի մոտ չէր կարող գտնվել ընկերության կնիքը, Սեւակը չէր կարող ընկերության անվամբ գործարքներ իրականացնել, ապա գտնում ենք, որ այդ գործարքներում իր համագործակցությունն է ցուցաբերել նաեւ Արտյոմը, որին էլ պատկանել է ընկերության անունից հանդես գալու եւ գործողություններ իրականացնելու իրավունքը:
Քանի որ Սեւակը բազմիցս հայցվորի դրամարկղից գույք ձեռք բերելու եւ բազմաթիվ այլ գործողություններ իրականացնելու համար գումարներ է վերցրել, ապա պարտավոր է հայցվորին հանձնել ընկերությունից դուրս բերված գումարների իրացման հիմքում ընկած փաստաթղթերը եւ ստանձնել պարտավորություն, որում կարտացոլվեն ընկերության հանդեպ ունեցած պատասխանատվության եւ վնասների հատուցման մասին պայմանները: Մասնավորապես` Սեւակը պետք է պատասխանատվություն կրի ընկերության համար «Միցուբիշի Ջիպ» մակնիշի ավտոմեքենա ձեռք բերելու, վերջինիս վրա կատարված, ինչպես նաեւ վարկերի մարման եւ այլ նպատակներով կատարված ծախսերի մասով:
Պատասխանող Արտյոմը իր ղեկավարության ընթացքում թույլ է տվել ընկերության շահերին հակառակ բազմաթիվ գործողություններ. պատշաճ չի կատարել տնօրենի՝ իր ստանձնած պարտավորությունները, ինչի արդյունքում նույնպես ընկերության անվան տակ գույք է ձեռք բերել, գումարներ է դուրս գրել, չի վերահսկել ընկերության գումարների շարժը եւ վնասներ է հասցրել ընկերությանը: Մասնավորապես, Արտյոմը ընկերությանը պատկանող կնիքը չի պահել իր տիրապետության տակ, ինչի հետեւանքով իր փոխարեն ընկերության անունից գործարքներ է կնքել Սեւակը, իր թողտվությամբ Սեւակը բազմիցս գումարներ է դուրս գրել դրամարկղից եւ ղեկավարի անվան դիմաց դրել իր ստորագրությունը: Իր գործողություններով Արտյոմը ընկերությունում այնպիսի վարք է դրսեւորել, որ ինչպես ընկերության շարքային աշխատակիցների, այնպես էլ գործընկերների մոտ Սեւակը ներկայացել է որպես ընկերության գործադիր մարմնի ղեկավար: Արտյոմը անձամբ ընկերությունից գումարներ է վերցրել` որպես ինչ-որ շահութահարկի կանխավճարներ...»:
«Միցուբիշի Ջիպ» մակնիշի մեքենան ձեռք է բերվել 15 հազար դոլարով: Երբ Սեւակ Արծրունին ընկերությունից հեռացել է, իր հետ տարել է նաեւ այդ մեքենան: Արտյոմ Մարտիրոսյանը «Ջի Էյջ Ստորիջ Էնթերփրայզս»-ից հեռանալուց հետո աշխատում է Սեւակ Արծրունու մոտ` «Եռանավ» ՍՊԸ-ում: «Եռանավը» բազմաբնակարան շենք է կառուցում Երեւանի Դավիթաշեն թաղամասում, ընկերության հիմնադիրը Սեւակ Արծրունին է: Նարեգ Հարթունյանը պարզել է նաեւ, որ ընկերության անունից Արտյոմ Մարտիրոսյանը բանկից վերցրել է 46 մլն դրամ վարկ, բայց այդ մասին ընկերության հիմնադիրը տեղյակ չի եղել:
Այսօր նախկին ընկերները հայտնվել են դատարանում, Պետեկամուտների կոմիտեում քրեական գործի շրջանակներում հարցաքննվում են ընկերության նախկին եւ ներկա աշխատակիցները:
շարունակելի
Մեկնաբանություններ (40)
Մեկնաբանել