Մամուլում բազմիցս հրապարակումներ են եղել այն մասին, որ Գորիսում դիահերձումը կատարվում է ոչ տիպային շենքում, մեղմ ասած` սանիտարական ոչ բավարար պայմաններում: Դիահերձման համար նախատեսված տարածքները վերջին տարիներին մի քանի անգամ փոխվել են, չնայած նրան, որ պատերազմական գոտում գտնվող տարածաշրջանում ժամանակակից պահանջներին համապատասխան դիահերձարանի կառուցումը ռազմավարական նշանակություն ունի: Գորիսի դիահերձարանը շահագործման է հանձնվել ամիսներ առաջ, սակայն դիահերձումը շարունակում են կատարել 15 քառակուսի մետրանոց մի տարածքում, որը «Գորիսի բժշկական կենտրոն»-ի վերանորոգումից հետո նախատեսված էր որպես ավտոտնակ: 

Սա այն դեպքում, երբ «Վերակառուցման եւ զարգացման միջազգային բանկ»-ի  Առողջապահական համակարգի արդիականացմանն ուղղված վարկային միջոցներով կառուցվող «Գորիսի բժշկական կենտրոն» ՓԲԸ-ի դիարանի կառուցման աշխատանքներն ավարտվել են: Դիահերձարանի շինարարական աշխատանքներն իրականացնող «Մաստարա» արտադրական կոոպերատիվի տնօրեն Կարո Փարսյանը տեղեկացնում է, որ շինարարությունն ավարտվել 2013թ.-ի մայիսի 8-ին:

66 մլն դրամ արժողությամբ 200 քառակուսի մետր տարածք ունեցող ախտաբանաանատոմիական ծառայության շենքում նախատեսված են դիահերձման, սառնարանների, լաբորատորիայի համար նախատեսված սենյակներ: Քաղաքից դեպի «Թոսկապ» գերեզմանատուն տանող ճանապարհի վրա գտնվող դիահերձարանի համար կառուցվել է նաեւ 150 մ երկարությամբ ջրատար:

«Նախագծով դիամշակման համար երկու մասնաշենք էր նախատեսվում, սակայն կառուցվել է մեկը, խնայված միջոցներն ուղղվել են 270 մ երկարությամբ կոյուղագծի կառուցմանը»,- ասում է շինարարը: Կոյուղին միացվել է մի քանի հարյուր մետր հեռավորությամբ գտնվող բազմաբնակարան շենքի ցանցին, որտեղ կառուցվել է նաեւ մաքրման հոր:

«Շինարարության ընթացքում առաջարկություն եղավ վերանայել նախագիծը եւ տարածքում հերձուքի թաղման հոր նախատեսել, սակայն հաշվի առնելով կառույցի տեղանքի դիրքը, որի պատճառով հերձուքը կարող էր խառնվել գրունտային ջրերին, առաջարկը չընդունվեց»,- նշում է Գ. Փարսյանը եւ իր տարակուսանքը հայտնում, որ շենքի շահագործումից  բավական ժամանակ է անցել, սակայն այն դեռեւս չի գործում: «Գորիսի բժշկական կենտրոն» ՓԲԸ տնօրեն Սլավիկ Ամիրյանի խոսքով` պատճառը շինարարության ձգձգումն էր մինչեւ նոյեմբեր: Սակայն այդ դեպքում անհասկանալի է, թե ինչպե՞ս է նա դեռեւս 2013թ. մայիսի 10-ին ստորագրել շինարարական օբյեկտի ավարտման ակտը: Դիահերձարանն ըստ նրա` կգործի մարտի 1-ից, իսկ այդ դեպքում հնարավո՞ր է ավարտին հասցնել այն բոլոր գործընթացները, որոնք անհրաժեշտ են կառույցի գործարկման համար: Խոսքը մասնավորապես վերաբերում է նրան, որ դեռեւս ձեռք չեն բերվել անհրաժեշտ սարքավորումներ, որի համար, պրն Ամիրյանի ասելով, մրցույթ է հայտարարվել անցյալ տարվա դեկտեմբերին: Իրականում ՀՀ առողջապահության նախարարության «Առողջապահական ծրագրերի իրականացման գրասենյակ» ՊՀ-ն «Գորիսի բժշկական կենտրոն» ՓԲԸ-ի դիարանի համար սարքավորումների մատակարարման, տեղադրման, ուսուցման նպատակով պայմանագրի առաջարկության մրցույթի վերջնական ժամկետ էր հայտարարել անցյալ տարվա մարտի 4-ը: Մրցույթի արդյունքներով «Գորիսի բժշկական կենտրոն» ՓԲԸ-ի եւ դիարանների համար սարքավորումների մատակարարման, տեղադրման եւ ուսուցման պայմանագիրը շնորհվել է «Ա-ՄԵԴԵՔ» ՍՊԸ –ին»:

Մրցույթի անցկացման փաստը հաստատում է նաեւ «Առողջապահական ծրագրերի իրականացման գրասենյակ» ՊՀ  տնօրենի պաշտոնակատար Ն. Զուլոյանը, ով «Հետք»-ի հետ ունեցած հեռախոսազրույցում նշեց, թե դիահերձարանն իբր հագեցած է ժամանակակից  սարքավորումներով եւ երկու ամիս է, ինչ արդեն գործում է: Պաշտոնյան ըստ էության անտեղյակ էր, որ «Գորիսի բժշկական կենտրոն»-ը դիահերձարանի գործարկման համար պարտավոր է օրենքով սահմանված կարգով արտոնագիր ստանալ ՀՀ առողջապահության նախարարությունից, որը չի արվել: Սլավիկ Ամիրյանի խոսքով` արտոնագրման փաստաթղթերը կներկայացվեն մոտակա օրերին: Պարտավոր էր նաեւ նորակառույցի փաստագրման ակտի համար դիմում ներկայացրել համայնքային իշխանությանը, որը նույնպես հունվարի 25-ի դրությամբ չէր արվել:

Առաջին լուսանկարում` նորակառույցը