HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Մարինե Մադաթյան

Արզականը պարտքեր ունի. «ոսկիները» վաճառքի են հանվում նվազագույն գնով

Կոտայքի մարզի Արզական համայնքի ղեկավար Նորիկ Մովսեսյանն այս տարի, ավագանու որոշմամբ, գնել է գյուղի խանութներից մեկը` համայնքում հանդիսությունների սրահ կառուցելու նպատակով: Խանութը գնվել է մոտ 16 մլն դրամով, և թեև շինությունն արդեն սեփականության իրավունքով ներառված է համայնքապետարանի գույքային հաշվեկշռում, սակայն գումարը դեռևս ամբողջությամբ չի վճարվել: Ն. Մովսեսյանն ասաց, որ պարտատիրոջը դեռևս մոտ 4 մլն դրամ պետք է վճարեն:

Այդ օրը հայտարարված էր չորս լոտ հողատարածքի աճուրդ-վաճառք` խանութի պարտքերը փակելու համար: Բոլոր լոտերի համար հայտեր կային, սակայն նախատեսված ժամին մասնակիցներից ոչ մեկը չներկայացավ համայնքապետարան: Առանց սակարկելու էլ համայնքապետին հայտնի էր լոտի հաղթողը: Կար նաև երկրորդ` մրցակցող կողմը, բայց այս ամենը` միայն փաստաթղթերում: Նորիկ Մովսեսյանը նախ ասաց, թե մասնակիցները ուշացումով` քառասուն րոպեից, կգան: Երբ արդեն քառասուն րոպեն լրացել էր, ու մասնակիցներից որևէ մեկը չկար, Ն. Մովսեսյանն ասաց. «Ես ձեր հետ սկզբից էդպես խոսեցի, բայց հետո ասեցի` ճիշտը խոսենք: Մասնակիցները չեն գալու: Մենք ենք իրենց խնդրել, աղաչել, որ գան, էս հողերը գնեն, բյուջեում փող լինի, էդ խանութի հարցերը լուծենք»:

Աճուրդի դրված լոտերից մեկը, որ 1500 քմ բնակելի կառուցապատման հողատարածք է, վաճառքի էր դրված 4,5 մլն դրամ մեկնարկային գնով: Տարածքը հարմար է բիզնես գործունեություն ծավալելու համար, այն կարող էր հետաքրքրել շատ գործարարների: Թե այս դեպքում ինչու են խնդրել ապագա գնորդին, ինչու են տարածքը վաճառում հնարավոր նվազագույն գնով, համայնքապետը պատասխանեց. «Հասկանում եմ` ինչ եք ասում, թող ինչքան հնարավոր է, մաքսիմալ գնով ծախվի, բայց ճիշտն ասած, եթե էսօր կադաստրային արժեքով էլ վաճառվի, ես շնորհակալ կլինեմ: Միգուցե մի քանի տարի առաջ դնեինք, ավելի շատ բան տար մեզ, բայց որ մարդ անճար է լինում, հանում, ոսկին էժան գցում է: Նույն մեր վիճակն է»:

Աճուրդի հայտարարությունը հրապարակվել է «Հայաստանի Հանրապետություն» թերթում և azdarar.am կայքում:

Համայնքապետի հաշվարկով` 4,5 մլն դրամ մեկնարկային գնով, 1500 քմ մակերեսով բնակելի կառուցապատման հողատարածքի համար սակարկողները պետք է անեին երկու-երեք քայլ, քայլը` 440 հազար դրամ, հետո մեկը պետք է «պարտվեր», մյուսը ձեռք բերեր հողը` մոտ 5 մլն դրամով: «Թղթերով ամեն ինչ մեզ մոտ նորմալ է»,- ասաց համայնքապետը` ավելացնելով, որ եթե հնարավոր է, չգրենք իրենց աճուրդի մասին, պարտքերը «փակեն, պրծնեն»: Աճուրդներն, ասաց նա, ձևական բնույթ են կրում, իրենք էլ ստիպված անցնում են այդ ձևերի միջով:

Արզականի նախկին աճուրդների ժամանակ օտարվել են նաև Աղվերանում գտնվող  անտառային նշանակության մի քանի հողտարածքներ, որոնք այժմ հանգստավայրեր են, և սեփականտերերն օգտագործում են բիզնես նպատակներով: Սակայն Ն. Մովսեսյանը բացառեց, թե նախորդ աճուրդներն էլ են «ձեւական բնույթ» կրել: Անտառային նշանակության թանկ հողատարածքները, նրա խոսքով, օտարվել են մի քանի մասնակցի իրական սակարկությունից հետո:

«Հրապարակային սակարկությունների մասին» օրենքի համաձայն` աճուրդը համարվում է չկայացած, եթե մասնակիցները չեն ներկայանում: Աճուրդից մի քանի օր անց, համայնքապետարանի աշխատակազմի քարտուղար Աղվան Հովհաննիսյանը «Հետքի» հետ զրույցում տեղեկացրեց, որ արձանագրությունն արդեն կազմվել է, աճուրդը համարվել է չկայացած և հայտարարվել է կրկնաճուրդ: 1500 քմ մակերեսով բնակելի կառուցապատման վերոնշյալ հողատարածքի կրկնաճուրդը, նրա խոսքով, տեղի կունենա օգոստոսի 25-ին:

Խանութը, որը համայնքապետարանին պարտքերի տակ է թողել, իրականում ամբողջությամբ չի ծառայելու որպես հանդիսությունների սրահ: «Գյուղապետարանը ուզում ենք տեղափոխել էդ շենք, երկրորդ հարկը լինի գյուղապետարան, դա լավ շենք է սրա հետ համեմատած, իսկ առաջին հարկը կլինի էդ սրահը»,- հարցազրույցի վերջում ասաց Ն. Մովսեսյանը: Թե ինչպես է համայնքապետարանը երկրորդ հարկում աշխատելու, եթե առաջին հարկում հարսանիք կամ հոգեհանգստի արարողություն լինի, համայնքապետն ասաց, թե ստիպված են հարմարվել, որովհետև համայնքի ներկայիս վարչական շենքը «նեղ է, անհարմար է»: Հանդիսությունների սրահը, համայնքապետի խոսքով` հնարավոր է անվճար տրամադրվի: Այդ մասին, սակայն, ավագանին դեռևս որոշում չի կայացրել:

Նորիկ Մովսեսյանի լուսանկարը` arzakan.am կայքից

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter