HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Բարերարը դադարեցրել է Օձունի եկեղեցու վերանորոգման ֆինանսավորումը

Մոսկվաբնակ բարերար Մովսես Ձավարյանը դադարեցրել է Օձունի եկեղեցու վերանորոգման ֆինանսավորումը: «Հետքի» հետ հեռախոսազրույցում նա բացատրեց պատճառը. «Եկեղեցու վերանորոգման նախագծով ինչ-որ նախատեսված է, կարևոր աշխատանքները մենք կատարել ենք: Մենք հիմնականում եկեղեցին պահպանել ենք: Ջրահեռացման հարցը լուծելու համար էլ նախագիծ չկա: Ոմանք ուզում են եկեղեցին եվրոռեմոնտ անել, դա կարող են անել, բայց  առանց ինձ: Իտալացիները Կոլիզեյը ինչու չեն վերականգնում: Եկեղեցու գմբեթը քանդվում էր, մենք վերակառուցել ենք այն»:

Օձունի եկեղեցու վերանորոգման շինարարական աշխատանքներն իրականացնող «ԼևԳուգ» ՍՊԸ-ի նախագահ Լևիկ Ղուկասյանը նույնպես  տեղյակ էր  Օձունի  եկեղեցու վերանորոգման ֆինանսավորումը դադարեցնելու՝ Մ. Ձավարյանի  մտադրությանը: Նա նամակ է ուղարկել «Հովհաննես Իմաստասեր կաթողիկոս Օձնեցի» բարեգործական հիմնադրամին` պարզելու, թե վերանորոգման աշխատանքները շարունակվելու են արդյոք: Սակայն առայժմ պատասխան չի ստացվել: Լ. Ղուկասյանը պնդեց, որ եկեղեցու ջրահեռացման աշխատանքների նախագիծ իրեն չի հատկացվել: Օձունի հոգևոր հովիվ Տեր Վրթանես քահանա Բաղալյանը «Հետքին» տեղեկացրեց, որ շինարարն ուզում է գալ իրենց մեղքով  քանդված եկեղեցու մուտքի կամարը վերականգնել, մեկ-երկու թերություններ էլ շտկել և շինտեխնիկան ու հարակից շինարարական պարագաները  հավաքել եկեղեցու բակից: «Այդ դեպքում հաջորդ տարի վերանորոգում սկսելը ավելի  դժվար կլինի»,- բացատրեց  Տեր Վրթանեսը:

Հայ Առաքելական եկեղեցու, ՀՀ մշակույթի նախարարության և «Հովհաննես Իմաստասեր Կաթողիկոս Օձնեցի» բարեգործական հիմնադրամի միջև 2012թ. մարտի 23-ին ստորագրված Օձունի եկեղեցու վերականգնման գործընթացում  համագործակցելու մասին հուշագրով կողմերն անհրաժեշտ են համարել միավորել իրենց  ուժերը և համատեղ աշխատանքներ ծավալել Օձուն Սբ. Մարիամ Աստվածածին եկեղեցու վերականգնման և տարածքի բարեկարգման  ուղղությամբ: Հուշագիրը ստորագրել են ՀՀ մշակույթի նախարարի տեղակալ Արև Սամուելյանը, Մայր Աթոռ Սուրբ Էջմիածնի վարչատնտեսական բաժնի տնօրեն Մուշեղ Եպիսկոպոս Բաբայանը և «Հովհաննես Իմաստասեր Կաթողիկոս Օձնեցի» բարեգործական հիմնադրամի գործադիր տնօրեն  Վանուշ Շերմազանյանը: Մեզ հետ հեռախոսազրույցում Մովսես Ձավարյանն ասաց, որ թեև ինքն է հիմնադրել «Հովհաննես Իմաստասեր Կաթողիկոս  Օձնեցի» բարեգործական հիմնադրամը, սակայն այն այլևս չի ընդունում:

Իրավիճակի առնչությամբ փորձեցինք իմանալ Մայր Աթոռի կարծիքը. «Մենք այդ մասին հայտարարություն կանենք»,- ասաց Մայր Աթոռի  վարչատնտեսական բաժնի տնօրեն Մուշեղ եպիսկոպոս Բաբայանը, ով Մայր Աթոռի կողմից ստորագրել է եռակողմ հուշագրի տակ: «Հովհաննես Իմաստասեր Կաթողիկոս Օձնեցի» հիմնադրամի տնօրեն Վանուշ  Շերմազանյանի ասելով՝ Մովսես Ձավարյանը դեռ անցյալ տարի օգոստոս ամսին է ցանկացել դադարեցնել եկեղեցու վերանորոգման ֆինանսավորումը: «Մենք բացատրել ենք, որ եկեղեցու տանիքը բաց է և չի կարելի այդպես թողնել: Բարերարը հրաժարվել է վճարել, նաև լրացուցիչ 50մլն դրամ գումար  տրամադրել  եկեղեցու պատերի ամրացման համար: «Այդ գումարը չունեմ»,- ըստ Վ. Շերմազանյանի՝ ասել է Մ. Ձավարյանը: «Հիմա էլ որ հովանավորին դիմում ենք, ասում են՝ որքան էլ փող դնենք, ասելու են՝ Մովսես Ձավարյանն է եկեղեցին վերանորեգել»,- բացատրեց հիմնադրամի տնօրենը: Տեր Վրթանես քահանա Բաղալյանը մեզ հայտնեց, որ եկեղեցու վերանորոգման հաստատված նախահաշիվ և նախագիծ կա, ըստ որի՝ եկեղեցու վրա կատարվել է 270մլն դրամի աշխատանք: Տեր Վրթանեսի ասելով՝ եկեղեցու նախագծային արժեքին համապատասխան՝ Մ. Ձավարյանի հատկացրած գումարից մնացել է ֆինանսավորել ընդամենը 50մլն դրամ:

«Եկեղեցու վրա նախագծով նախատեսված և չկատարված աշխատանքները այդ 50մլն դրամով չեն կարող կատարել»,-ասում է հոգևոր հովիվը: Ըստ Տեր Վրթանեսի՝ եկեղեցու արևելյան ճակատի հիմքերի շուրջ 21 գծ. մ քարերը գետնախարսխի պատերին չեն տեղադրվել, դրանք գնված են բարերար Մ. Ձավարյանի փողով և թափված են պատի տակ: Չեն կատարվել նաև հյուսիսային կամարակապի արդեն 2-րդ անգամ համարակալված և 90-ական թվականներից եկեղեցու բակում թափված քարերի և վերանորոգման ընթացքում տեղահանված գերեզմանաքարերը նախկին տեղում տեղադրելու, արտաքին եռակողմ սրահների հատակը  սալիկապատելու, եկեղեցու դռները և լուսամուտները փոխելու և այլ աշխատանքներ: Վանուշ Շերմազանյանը եկեղեցու վերանորոգման աշխատանքները չընդհատելու համար գրավոր խնդրել է ՀՀ մշակույթի նախարար Հասմիկ Պողոսյանին որոշ գումար հատկացնել, մինչև հիմնական գումարների հայթայթումը: Տեր Վրթանես Բաղալյանի կարծիքով էլ Օձունի եկեղեցու վերականգնումը կամեցողության և ոչ թե փողի խնդիր է:

Մեկնաբանություններ (41)

Վարազ Սյունի (Ամստերդամ)
Արտաշ (30) - Եթե մեկը 10 մարդ սպանի ու դրանից հետո աշխարհի ամենամեծ բարեգործություններն անի, չի նշանակում,որ այդ մարդն այլևս 10 մարդ սպանած մարդասպան չէ:................................................... ՀԳ. Հետո զարմանում ենք, որ թուրքերը իրենց պատմության սև էջերը չեն ընդունում ու նույնիսկ Թալաթին են «ազգի հերոս» դարձրել. նույնիսկ թանգարան ունի:
Վարազ Սյունի (Ամստերդամ)
Հարգելի Arman. M. - Շնորհակալություն և համաձայն եմ ձեզ հետ:..................................................................................Հարգելի Լարիսա Փարեմուզյան- ես սկզբից գրել եմ կոմենտ 10 և 11-ը, որը ոչ մեկի անձին ուղղված չէր: Բայց, խնդրեմ կարդացեք Տեր Վրթանեսի պատասխան կոմենտ 15-ը:
Վարազ Սյունի (Ամստերդամ)
Anahit (20) - Հիմա էլ «ստախոս» սարքեցի՞ք: «Պատմաբանը» ինչպե՞ս կարող է դա չիմանալ: Թե՞ այսպես կոչված «Հայոց եկեղեցու պատմություն» եք դասավանդում, որտեղ հայ առաքելակա՛ն եկեղեցու ՄԻԱՅՆ ԼԱՎ բաներն են պրոպագանդա անում:.......................................................................... Ինչևիցե՝ կաթողիկոս Հովհան Օձնեցին (717-728) 719 թ. Դվինում հրավիրում է եկեղեցական ժողով,որում քննարկվում է պավլիկյանների դեմ վճռական պայքար կազմակերպելու հարցը: Նույն կաթողիկոսը ստանում է խալիֆի համաձայնությունը և Արմինիայի ոստիկանի հովանավորությունը: Այսինքն՝ հրավիրում և պաշտոնապե՛ս թույլատրում է,որ արաբ խաժամուժը բռնաբարի ու կոտորի հայ պավլիկյաններին: Կաթողիկոսը, 719 թ. ժողովում, հրաման էր տվել՝ չխնայել նույնիսկ երեխաներին: Պավլիկյան հայերին օգնողներին խստորե՛ն պատժում էին, ինչպես 1915 թ. Եղեռնի ժամանակ էին հայերին օգնող թուրքերին պատժում: Պավլիկյան հայերի դեմ կատարված ԵՂԵՌՆԸ միանշանակ «Գենոցիդ» է՝ 1948 թ.ՄԱԿ-ի Գենոցիդի կոնվենցիայի դրույթներով: Պատժվեցի՞ն պավլիկյան հայերի Եղեռնի ոճրագործները: Կա՞ թեկուզ մեկ հուշարձան՝ այդ անմեղ զոհերի հիշատակին:
Տեր Վրթանես
Հարգելի Օձունի վերականգնմամբ անհանգստացած հարազատներ և բարեկամներ, խնդրում եմ միմյանց չվիրավորել, եթե ես որևէ մեկին անտեղի վիրավորել եմ, ներողություն եմ խնդրում: Իմ մեծ ցանկությունն է, որ Օձունի եկեղեցու վերականգնումը կիսատ չմնա: Օձունի չքնաղագեղ եկեղեցին ամբողջական տեսքով ներկայանա տեղացի հավատացյալ ժողովրդին և օտարազգի այցելություններն: Կարծում եմ, որ Մշակույթի նախարարության, Մայր Աթոռի, Հովհան Օձնեցու անվան հիմնադրամի և բարեպաշտ ժողովրդի աջակցությամբ գործն իր ավարտին կհասնի:
Վարազ Սյունի (Ամստերդամ)
Մեր ազգի ո՛ղջ դժբախտությունը քեզ պես փողամոլ ու իշխանավասալ «սրբերն» են: Ամենամե՛ծ «գրանտակերը» հայ առաքելական եկեղեցին չէ՞. պատմությունը հո չի խաբում: Քո կոմենտի մակարդակից արդեն երևում է քո պիղծ անհանդուրժողականության մակարդակը:................................................................. Նույն ձևի էլ թուրքերն են հպարտ Թալաթ փաշայով՝ որ «դավաճան» հայերին կոտորեց ու թուրք ազգը «փրկեց ու համախմբեց»: Մեր ազգի ՈՂՋ դժբախտությունն այն է,որ եկեղեցին է ազգը «միավորում ու պաշտպանում»: Բայց դուք ՄԻՇՏ ԽՈՒՍԱՓՈՒՄ եք պատասխանել, թե Ո՞ՐՏԵՂ էր «փրկիչ» Քրիստոսը 1915-ին:.................................................................... «Մոլար աղանդների» դեմ պայքարելու համար արդյո՞ք 5-6 տարեկան հայ երեխաների աչքեր պիտի հանեիք կամ ժայռերից նրանց կենդանի ցած գլորեիք, կամ իրենց աչքի առաջ իրենց ծնողներին տանջամահ անեիք: Եվ ի՞նչ էին ուզում «մոլար» պավլիկյան հայերը. (սոցիալական) արդարություն ու եկեղեցական տուրքերի թեթևացում:............................................................ Անամոթ Վրթան Օձնեցիներ, «քրիստոնեական սիրո» դիմակի տակ ձեր իսկական գայլային երախները ցույց տվեք: ՀԳ. Հայկական ասացվածք՝ սար ու ձոր, տերտերի փոր:
Տեր Վրթանես
Ես հպարտ եմ Սուրբ Հովհան Իմաստասեր կաթողիկոս Օձնեցու վեհ կերպարով, որ գաղափարապես հերքել է իր ժամանակ գողություն ունեցող բոլոր մոլար աղանդներին, ազգը միավորել, եկեղեցական կարգերը միօրինակ դարձրել, Կանոնագիրք Հայոց ու Գիրք Թղթոց կազմել, շարականներ և իմաստասիրական գրվածքներ է գրել: Անամոթ վասակ սյունի, Գարեգին Նժդեհի պատկառազդու նկարի փոխարեն գայլի երախդ ցույց տուր, որ մարդիկ անկաշկանդ թքեն քո պիղծ երեսին:
Julie Mantashyan
Իհարկե, շնորհակալ ենք բարերարին, զգալի գումար ու աշխատանք են ներդրել եկեղեցու վերակառուցման գործում, սակայն նման գործերը կիսատ թողնել... պարզապես չի կարելի... ի՞նչ կապ ունի ջրահեռացումը եվրովեորանորոգման հետ, և ընդհանրապես ո՞վ խոսեց եվրոլուսամուտներից ու դռներից։ Կարևորն այն է, որ եկեղեցիս ամուր լինի ու աներեր, լուծվեն հիմնական առաջնային խնդիրները։ Ինչ է նշանակում տեղափոխել գերեզմանաքարերն ու թողնել էդպես... Բարբարոս չենք, ոչ էլ թուրքական ծագում ունենք կարծեմ... տխրեցրեց ինձ այս հոդվածը... ամեն դեպքում հույսով եմ, որ կգտնվեն Մարդիկ, ովքեր առաջին հերթին կմտածեն ոչ թե այն մասին, թե իրենց անունը որտեղ կհնչի ու կերևա, այլ այն մասին, որ մեզ՝ քրիստոնյաներիս ծառայող այս հիասքանչ կոթողը կանգուն ու անավեր մնա... Աստված բոլորիս օգնական...
Տեր Վրթանես
Հարգելի Արմեն, եթե Օձունի վերականգնման ծրագրի ընթացքը լուսաբանող լրատվությանը հետևած լինեիք, ապա ականատես կլինեիք բազմաթիվ հրապարակումների, ես ինքս բազմաթիվ գնահատանքի խոսքեր եմ ասել բարերարի հասցեին:Այժմ էլ, չնայած համատեղ ստորագրված համաձայնագրի, պատրաստակամություն չունի ֆինասնսավորել ծրագիրը և հասցնել եռակողմ պայմանագրի համար հիմք հանդիսացող նախագծի ավարտին, կրկին դժգոհություն չունեմ, այլ ընդհակառակը շատ շնորհակալ եմ: Օձնեցու անվան հիմնադրամին էլ խնդրում եմ, որ բոլոր բարերարների նվիրատվության չափը և անունները հրապարակի, որպեսզի նման հայտարարություններ չլինեն և հիմնադրամը թափանցիկ լինի հասրակության համար: Այդ թվում նկարիչների անունները , որոնք նկարներ են նվիրել հիմնադրամին և որ նկարը քանիսով է վաճառվել:
Արտաշ
Հարգելի Վարազ Սյունի, մի՛ գրեք բաներ, որոց մասին տեղյակ չեք, Սուրբ Հովհան Օձնեցու մասին Ձեր գրածները հիմնազուրկ են: Օձնեցին գրչով և գաղափարապես է հերքել պավլիկյաններին, թոնդրակյանններին, երևույթականներին և երկաբնակներին: Օձնեցու մասին տեղեկություններ կարող եք ստանալ Դրասխանակերցու, Կիրակոս Գանձակեցու և Վարդան Արևլցու Հայոց պատմություններից: Եղեռնապապուրծ ծնողների զավակ լինելով իմ համար վիրավորական է Ձեր համեմատությունը:Եղեռնի ժամանակ հայերին օգնող թուրքերի մասին հեքիաթն էլ միամիտներին և անտեղյակներին մատուցեք, գուցե հավատան և նորից ցեղասպանության ենթարկվեն: Թուրքը չի փոխվել և այսօր էլ շարունակում է ցեղասպանությունն իր ժխտողական կեցվածքով: Տեր Վրթանեսին ես Բանակից եմ ճանաչում: Տեր հայրը բանակում ազգային փոքրամասնությունների իրավունքների ամենաջերմ պաշտպանն ու հանդուրժողականության օրինակ էր սպաների և զինվորների համար:
Վարազ Սյունի (Ամստերդամ)
Հարգելի Արտաշ (28) -Ես գրել եմ պատմական փա՛ստ:
Arman. M
Վարազ Սյունի, գուցե Դուք Էլ Ձեր աղբյուր(ներ)ը մատնանշեք...
Arman. M
Ի՞նչ կառույցի դեմ դուրս գալու մասին է խոսքը: Կարծում եք որևէ հոգևորական կհամարձակվի Ձեր ասած ցոփ ու շվայտ վերնախավի դեմ դուրս գալ? Իհարկե, ոչ: Ով դուրս կգա կճոյանների, եզրասների կամ ամենայն հայոցի դեմ? Իհարկե ոչ ոք:
Arman.M
Իսկ զուգահեռ անցկացնել Տեր Վրթանեսի և այժմյան թուրքերի միջև միայն այն բանի համար, որ նա լռում է, կարծում եմ, տեղին չէ: Սրանք հարցեր են, որ պիտի դիտարկվեն տարբեր հարթություններում:
Վարազ Սյունի (Ամստերդամ)
Arman.M - Պավլիկյան հայերի մասին նյութեր (նաև համացանցում) հսկայական են՝ սկսած հոդվածներից մինչև դիսերտացիաներ: Բավական է (թեկուզ google-ում) տպել օրինակ «պավլիկյաններ» կամ «Դվինի 719 թ. ժողով» բառերը:............................................... Ես Տեր Վրթանեսի՛ն չեմ համեմատել (հիմիկվա) թուրքերի հետ, այլ երևու՛յթը:........................................... Հայը իրեն անկե՛ղծ պիտի հարցնի՝ իսկ ԻՐԱԿԱՆՈՒՄ ի՞նչ օգուտ է տալիս հայ (առաքելական) եկեղեցին ազգին: Արդյո՞ք 5-6-7 մլն մարդ ունեցող ազգին պետք է այսքան ՀՍԿԱ մի կառույց: Դա նույնն է,որ 5-6 տարեկան երեխային 50 կգ վեշ տաս, որ տանի: 1915-ից հետո արդյո՞ք խելացի ու արդար է ՆՈՒՅՆ ՁԵՎՈՎ աղոթել ու սպասումներ ունենալ նույն Քրիստոսից:
Տեր Վրթանես
Հուսով եմ, որ Աստծո ողորմածությամբ Օձունի հիասքանչ տաճարի վերականգնման գործն անավարտ չի մնա: Մշակույթի նախարարությունը 2010-ին՝ մինչ հարգարժան բարերարի կողմից անվան հիմնադրամի հիմնումը, շուրջ 20 միլիոն դրամի հատկացում էր կատարել Օձունի վերականգնման Նախագծի, նախահաշվի և լաբորատոր փորձաքննության համար և պատրաստ էր ամբողջ վերականգնումը ֆինանսավորել: Կարծում եմ, որ Մշակույթի նախարարարությունն իր առաքելությանը հավատարիմ կշարունակի և ավարտին կհասցնի Օձունի եկեղեցու վերականգնման ազգանվեր գործը: Շնորհակալ եմ Լարիսա Փարեմուզյանից և խմբագրությունից Օձունի եկեղեցու վերականգնման ընթացքը լուսաբանելու համար:
Տեր Վրթանես
Եվրոռեմոնտը հավանաբար բարերարի շուրջ հավաքված խառնակիչների գաղափարն է, ո՛չ ոք էլ չի կամենում եվրոռեմոնտ անել, այլ մեծ ցանկություն կա Մայր Աթոռ Սուրբ Էջմիածնի, Մշակույթի նախարարության և անվան հիմնադրամի կողմից ստորագրված հուշագրի համար հիմք հանդիսացած և գիտամեթոդական խորհրդի կողմից հաստատված նախագծով հաստատված աշխատանքներն իր ավարտին հասցնել: Խոսքը հյուսիսային կամարակապի 90-ականներին քանդված քարերի և տեղահանված գերեզմանաքարերի իրեց տեղը դնելու, հիմնահրամի ձողերով գնված արևելյան պատի գետնախարիսխների շարելու, հարավային կամարակապի ժապավենաձև գետնախարիսխի վերականգնելու, 2013-ին բացված հարավային կամարակապ սրահների արևմտյան մույթերի առաջին շարքերի վերականգնելու, արտաքին կամարակապ սրահների նախագծով մասնակի ծածկասալելու, արտաքին սրահների սալահատակելու, որին եթե մեկ սանտիմ թեքությու տրվի ջրահեռացման հարցը կլուծվի, 90-ականներն փայտյա դռներն փոխարինված ֆաներայի դռները և նույն ժամանակ տեղադրված մետաղական շրջանակներով լուսամուտները փոխելու և այլ աշխատանքներ, որոնք նախահաշվում կան և չեն կատարվել: Իսկ գործող եկեղեցին Կոլիզեի հետ համեմատելը կարծոմ եմ հումոր է, չնայած իտալացիները միլիոնավոր եվրոներ են ներդնում Կոլիզեի պահպանման վրա և տասննյակ միլիոնավոր եվրոներ էլ շահում:
Արա Ավետիսյան
Մայր Աթոռ Սուրբ Էջմիածնի վարչատնտեսական բաժնի տնօրեն Մուշեղ Եպիսկոպոս Բաբայանը և Մշակույթի նախարարարությունը պետք է հետևողական լինեն աշխատանքների ավարտին:Բացի այդ կարելի է անցկացնել շինարարական և հաշվապահական աուդիտ ,փողերը լվանալով չեն կարող ավարտվել մենք լավ հասկանում ենք մեխանիզմը,բարեգործը փող է տալիս հիմնադրամին նա իր կողմից գործեր է անում ուռճացնելով նախահաշիվը,փոցի մի մասը գնում է չինովնիկների գրպանը:Տուժում է Օձունի եկեղեցին և ժողովուրդը:
Ասյա
Փաստորեն կիսատ մնաց?
Վարազ Սյունի (Ամստերդամ)
Նենե (40) -(նույն ինքը «Հայ աղջիկ»)- արդեն 5 տարի նու՛յն կոմենտն ես գրում. ու ամեն անգամ հարձակվում իմ անձի՛ն՝ թեմայից դուրս: Չհոգնեցի՞ր:
նենե
Վարազ Սյունի (Ամստերդամ) Ամեն անգամ այս անվան տակ հանդես եկողը չարաբարո մտքեր է արտահայտում ։Իսկ դու ինքդ ի՞նչ ես արել և անում մեր Հայաստանի համար։Թե՞ տաքուկ եվրոպաներից համակարգչի հետևից խոսելը պատվաբեր գործ է․սիրտ է հովացնում։
Arman. M
http://www.academia.edu/9060485/%D5%80%D5%B8%D5%BE%D5%B0%D5%A1%D5%B6%D5%B6%D5%A5%D5%BD_%D5%95%D5%B1%D5%A5%D5%B6%D6%81%D5%AB%D5%B6_%D4%BF%D5%A1%D5%B6%D5%B8%D5%B6%D5%A1%D5%A3%D5%AB%D6%80%D6%84_%D5%80%D5%A1%D5%B5%D5%B8%D6%81_-%D5%AB_%D5%AD%D5%B4%D5%A2%D5%A1%D5%A3%D5%AB%D6%80_HOVHANNES_ODZNECI_THE_EDITOR_OF_ARMENIAN_CANON_BOOK_ Այստեղ բառացի մեջբերված են Հովհաննես Օձնեցու կանոնագրքի ԻԹ (29) և ԼԲ (32) հոդվածները (էջ` 1-2 ծանոթություն բաժնում): Կարդացե'ք խնդրեմ, պատմաբաննե'ր:
Վարազ Սյունի (Ամստերդամ)
Հարգելի Լարիսա Փարեմուզյան (21) - Ես ձեզ հետ մասնակի եմ համաձայն,որ՝ «Տեր Վրթանեսը...ուրիշների հանցանքների համար պատասխանատու չի կարող լինել»:............................................................ Նույն ձևի հիմիկվա՛ թուրքերը ասում են՝ 1915-ի համար մենք մեղավոր չենք: Տեր Վրթանեսը միգուցե ուղղակի մեղավոր չէ հայ առաքելական եկեղեցու ցոփ ու շվայտ վարք ունեցող մյուս անդամների համար, բայց, որպես նույն ԿԱՌՈՒՅՑԻ անդամ, նա՛ էլ պատասխանատվության իր մասնիկն ունի. թող մի անգամ դուրս գան հրապարակայնորեն բողոքեն եկեղեցու այդ «հոգևորականների» դեմ կամ դուրս գան կառույցից: Լռությունը, այնուամենայնիվ, համաձայնության նշան է:
Վարազ Սյունի (Ամստերդամ)
Դեմագոգիային չափ ու սահման չկա. 719 թ. Դվինի ժողովը «սուրբ» Հովհան Օձնեցին ինչի՞ համար հրավիրեց ու ին՞չ որոշվեց այնտեղ:
Արտաշ
Հարգելիս, Օձնեցին ոչ ոքի չի սպանել, այդքանը հասկանալը դժվար է, գնացե՛ք, Դրասխանակերցու Հայոց պատմությունը կարդացե՛ք: Ճանաչե՛ք և սիրե՛ք ազգիս մեծերին: Ձեր ասած եղեռնագոծ թալիաթին էլ գիտեմ, իմ հարգած Սողոմոն Թելլերյանին էլ: Սուրբ Հովհան Օձնեցու հացեին էլ հիմնազուրկ և մերկապարանոց զրպարտություններ մի՛ արա, բավական է:
Արտաշ
Վարազ Սյունի (Ամստերդամ), զարմանում եմ ոմանց աղանդավորների, սեռական փոքրամասությունների, դասալիքների, մանկապիղծների, հասարակաց տների, խաղատների, օտարերկրյա անորոշ կառույցների նկատմամբ մեծ մարդասիրությունից: Միաժամանակ, զարմանում եմ եկեղեցու և պետական կառույցների նկատմամբ հիվանդագին անհանդուրժողականության վրա: Հովհան Օձնեցին Խրամում և Նախիջևանում այրված իշխաններ զավակներին վերադարձրեց և հաստատեց հայրերի պաշտոնում: Հայաստանը վերամիավորեց: Արաբական տիրապետության սահմաններում ապրող քրիստոնյաներին իրեց հավատքը դավանելու ազատություն ապահովեց:Կանոնագիրք հայոցի և Գիրք թղթոցի կազմողն է: Կյանքի վերջին տարում էլ, իր աշակերտ Դավիթ Արամոնեցուն տեղապահ ընտրելով, իր հայրենի Օձուն գյուղից ոչ հեռու գտնվող Արդվու վանքում ուսուցչությամբ և ճգնակեցությամբ է զբաղվել: Մի՛ դատեք, որ Աստծուց չդատվեք:
Արմեն Դ
Չկա մեկը , որ զանգահարի բարերանին, եթե ադպիսին գոյություն ունի և բացատրի, որ նախագծում եվրոռեմոնտի մասին խոսք չկա, կամ որ հուշագիր էր ստորագրում ինչ էր մտածում: Չի կարելի մարդկանց հուսախաբ անել և դրանից հետո էլ Աստծո տունը Կոլիզեի հետ համեմատել: Խոստումիդ տերը չես, գոնե մարդկանց մի՛ վիրավորի, որ մի երկու միլիոն ունես դեռ չի նշանակում պիտի ավել պակաս խոսես: Արմեն Դ
Արմեն Դ
Ինձ հետաքրքիր է, իտալացիների բարեգործական և անշահախնդիր խորհրդատվությունները որքանով թանկացրին շինարարության ընդհանուր արժեքը: Նաև զարմանալի նախագծից դուրս լրացուցիչ հիսուն միլիոն դրամ բարերարից ուզած հիմնադրամի տնօրենի կողմից հետաքնննող լրագրող Լարիսա Փարեմուզյանի մեծ արհեստավարժությամբ գրած և Օձունի վերականգնմանն ավարտին հասցնելու ուղղված հրապարակումը ապատեղեկատվություն համարեը: Ծանոթ եմ նաև Իրատեսում հիմնադրամի տնօրենի Վանուշի կողմից խայտառակ հրապարակումներին, որոց կվորակեի որպես զրպարտություն և ապատեղեկատվություն: Խնդրանքս է Մշակույթի նախարարությանը, եթե իհարկե այդպիսի նախարարություն դեռևս գոյություն ունի, ավարտին հասցնել Օձունի եկեղեցու վերականգնման գործը: Խայտառակություն է, որ բազմաթիվ այցելուներ ունեցող Օձունի մարգարիտը թողած, Հնեվանքում, Քոբայրում կամ Բգավորում չգիտեմ ինչերով է զբաղվում:
Arman. M
Anahit, նախ` ես 1 տարեկան էի, երբ խորհրդային կարգերը փլուզվեցին, ապա` դա բոլորովին էլ կապ չունի այն բանի հետ, որ հարգարժան (ինչպես Դուք և Լարիսա Փարեմուզյանն եք նրան ներկայացնում. ես էլ, անձամբ չճանաչելով նրան, հիմնվում եմ ձեր կարծիքի վրա և ներքուստ անկեղծ ակնածանք տածում դեպի նման մարդը, նման հայը և վերջապես' նման հոգևորականը) Տեր Վրթանեսը առողջ քննարկման մեջ վիրավորական արտահայտություններ է տեղում դեպի իր զրուցակիցը, դեպի Վարազ Սյունին: Դա, իմ կարծիքով, հարիր չէ ընդհանրապես` կիրթ մարդուն, մասնավորապես` հայ հոգևորականին: Իսկ թե ես ինչպես եմ ծառայել ու ծառայում իմ հայրենիքին ու ժողովրդին, ռազմական գաղտնիք է: Միայն ասեմ, որ կյանքիս գեղեցիկ 4 տարիները նվիրել եմ Հայոց Բանակին, որից երեքը ԼՂՀ հյուսիսային ահուսարսափ համարվող NN զորամասի սահմաններին: Հիմա ծառայությանս բնույթը փոխել եմ և մասշտաբները մեծացրել... դա արդեն առայժմ անհասանելի կմնա հանրության համար: Լարիսա', կարծում եմ, մենք ունենք հնդհանուր ընկեր. խոսքս Անի Հովհաննիսյանի մասին է: Նա իմ մասին գիտի քիչ ավելին, քան վերևում ես նշեցի: Եվս մեկ անգամ վերադառնալով Տեր Վրթանեսին ուղղած իմ արտահայտություններին` կրկնում եմ` ես հակված եմ հավատալ ձեր խոսքերին` կապված Տեր Վրթանեսի բարի համբավին, հետևաբար և ներողություն խնդրել վերջինիս սևազգեստ կեղծ բարեպաշտների ոհմակում ընդգրկելուս համար: Անահի'տ, Դուք պատմաբան եք, ես շատ ուրախ եմ: Ինքս ունեմ 3 բարձրագույն կրթություն: Կարծում եմ համամիտ եք ` հասնել կատարելության որևէ բնագավառում` անհնար է. միշտ էլ կգտնվի ինֆորմացիա, որին չեք տիրապետում և գիրք, որը չեք կարդացել:
Լարիսա Փարեմուզյան
Արման. Մ., իհարկե պետք չէ, որ մարդիկ իրար վիրավորեն: Բայց Տեր Վրթանեսը ազնիվ և Օձունում ու ենթաշրջանում հարգված հոգևորական և իր գործին նվիրված մարդ է: Նա ուրիշների հանցանքների համար պատասխանատու չի կարող լինել: Պետք է սա հասկանալ: Տեր Վրթանեսին նույնպես կոչ եմ անում դադարեցնել վիճաբանությունը: Հարգելի Վարազ Սյունին նույնպես չի ճանաչում Տեր Վրթանեսին: Պետք չէ իրար վիրավորել:
Anahit
Արման.Մ, դու ամոթ չունես, քո պաշտպանած վարազը ստախոսի մեկն է, ես ինքս պատմաբան են, որտեղից է վերցրել Սուրբ Հովհան Օձնեցու հասցեին իր հերհյուրանքները: Տեր Վրթանեսին էլ լավ գիտեմ, շատ անհանդուրժող է հայանմանակ թուրքերի հանդեպ: Իսկ եկեղեցականներին քննադատելու փոխարեն դու ինքդ կամ քո հայրը Խորհրդային աստվածմերժության տարիներին դադնայիք հոգևորական և նվիրումով ծառայեիք ազգին և եկեղեցուն:
Arman. M
Տեր Վրթանես, խնդրած կլինեմ հարգարժան Վաիազ Սյունիի մասին կոռեկտ արտահայտվեք: Ես նրա գրեթե բոլոր մեկնաբանությունները կարդում եմ և հավատացնում եմ Ձեզ, որպես կանոն, ես ավելի շատ ինֆորմացիա եմ ստանում հենց իր մեկնաբանություններից, քան բուն նյութից: իսկ Ձեր հենց առաջին քոմմենթը լի էր եկեղեցականի համար անընդունելի ֆրազաներով: Սանձե'ք Ձեզ Տեր Վրթանես: Ես սարկավագ ընկերներ ունեմ. շատ լավ տղաներ, իրենց գործի գիտուններ, առաքելության նվիրյալներ. նրանք կամաչեն Ձեր պահվացքի համար: Բոլորս էլ տեղյակ ենք Ձեր պարագլուխների vip չվերթների, անձնական բիզնեսների աֆյորային պլանների (բոլորը անհնար է թվել) մասին: Հիմա էլ աղանդներ կան մեր շրջապատում և բավական տարատեսակ ու մեծաքանակ. գուցե մի արյունոտ վճիռ էլ նրանց համար մոգոնեք: Կեղծ բարեպաշտների հսկա ոհմակ կա ձեր սևազգեստ համակարգում. պայքարե'ք դրա դեմ և այդ պայքարը սկսեք հենց Ձեզնից Տեր Վրթանես:
Վարազ Սյունի (Ամստերդամ)
1.5 մլն ԱՆՄԵՂ զոհերի գնո՞վ. այդ թվում հազարավոր ծծկեր երեխանե՞ր: Այ քեզ «գթառատ ու ամենակարող» «փրկիչ»: Հայ առաքելական եկեղեցին ՄԻՇՏ նույն մեթոդն է կիրառել/կիրառում. եկեղեցուն ՆՈՒՅՆԱՑՆԵԼ պետության ու ազգի հետ, որպեսզի եկեղեցուն արդարացիորեն քննադատողներին պիտակեն «ազգի ու պետության թշնամի» ու չանդրադառնան քննադատության թեմայի՛ն:........................................................ Ես եկեղեցու ու քրիստոնեության ԴԵՄ ՉԵՄ, բայց վաղուց ժամանակն է,որ հայ առաքելական եկեղեցին դառնա բացառապես ՀՈԳԵՎՈՐ կառույց, ու աջ ու ձախ չմիջամտի երկրի պետական-քաղաքական կյանքին, ինչպես հատկապես սուննի իսլամական երկրներում է:
Տեր Վրթանես
Խաչի վրա մեր մեղքերի համար իր արյաբ հատուցած և երրորդ օրը հարություն առած մեր Տեր և Փրկիչ Հիսուս Քրիստոս 1915-ին մեր ժողովրդի հետ կրկին խաչվեց և 1918 թվականին հարություն պարգևեց մեր պետականությանն ու եկեղեցուն հակառակ քեզ պես ազգի և եկեղեցու թշնամիների:
Արմեն
Օձունի եկեղեցու վերակառուցման ընքացքում չեմ կարողանում հիշել գոնե մեկ շնորհակալական արտահայտություն բարերարի հասցեին,միայն դժգոհություններ,պահանջներ,սկանդալային հրապարակումներ:Տպավորություն է ստեղծվում,որ այս ամենը հատուկ է արվում` ապագայում մեր հայրենակիցների հայրենասիրական մղումները ,,կանխելու,, համար:Ճիշտ է ասված,որ ոչ մի բարի գործ անպատիժ չի մնում:Նման վերաբերմունքով մենք հետ ենք մղում բազմաքիվ պոտենցիալ ներդրողների,օրինակների պակաս չունենք....
Վարազ Սյունի (Ամստերդամ)
ՐԱՖՖԻ...Ո՜վ հայրեր, ո՜վ պապեր, այս գավաթը խմում եմ, բայց առանց նվիրելու ձեր ոսկորներին: Եթե դուք այս վանքերի տեղը, որոնցով լիքն է մեր երկիրը, բերդեր շինեիք, եթե դուք սուրբ խաչի և անոթների փոխարեն, որ սպառեցին ձեր հարստությունը, զենքեր գնեիք, եթե դուք այն անուշահոտությանց տեղ, որ խնկվում են մեր տաճարներում, վառոդ ծխեիք, այժմ մեր երկիրը բախտավոր կլիներ: Մեր երկիրը չէին քանդի, մեր որդիքը չէին կոտորի և մեր կանանց չէին հափշտակի... Վանքերից ծագեց մեր երկրի կործանումը, նրա՜նք խլեցին մեր սիրտը և քաջությունը, նրա՜նք ձգեցին մեզ ստրկության մեջ, սկսած այն օրից, երբ Տրդատը թողեց իր սուրը և թագը, վերցրեց խաչը և մտավ մանիա այրը' ճգնելու... Ո՜վ Հայոց հին աստվածներ, Ո՜վ Անահիտ, Ո՜վ Վահագն, նվիրում եմ այս բաժակը Ձեր սուրբ հիշատակին, դուք փրկեցեք մեզ:
Վարազ Սյունի (Ամստերդամ)
«Հովհաննես Իմաստասեր Կաթողիկոս Օձնեցի» բարեգործական հիմնադրա՞մ: Ի՜նչ ԱՆՀԱՐԳԱՆՔ հայ ժողովրդի նկատմամբ: Դա նու՛յն ԱՐՅՈՒՆՈՏ կաթողիկոսն է,որի գլխավորությամբ կատարվել է հայ ազգի դեմ ԱՌԱՋԻՆ Եղեռնը՝ պավլիկյան հայերի դեմ: Գազանությունները 1915-ին շատ մոտ էին: ԱՆԻԾՅԱԼ լինի այդ Հովհաննես «Իմաստասեր» կաթողիկոսը: Հայ առաքելական եկեղեցին ՊԱՇՏՈՆԱՊԵՍ ՆԵՐՈՂՈՒԹՅՈՒՆ պիտի խնդրի՝ այս եղեռնին մեղսակցության համար:
ominac
Եթէ մենք պետութիւն ունենային այն ժամանակ նաեւ դատարան կունենային ուր մեր բոլոր խնդիրները կը լուծէինք։ Աս ըսաւ, ան ըսաւ ին տակ մեռանք․
Լարիսա Փարեմուզյան
Պարոն Շերմազանյան , շատ ճիշտ կլինի բարերարի կողմից եկեղեցու վերանորոգման համար հատկացված 270 մլն. դրամի Ձեր հիմնադրամի կատարված ծախսերի մասին ներկայացնեք հանրային հաշվետվություն:
Լարիսա Փարեմուզյան
Պարոն Շերմազանյան , հրապարակումից առաջ ամենայն մանրամասնությամբ ուսումնասիրել ենք Օձունի գյուղապետարանում գտնվող եկեղեցու վերանորոգման նախագծային փաստաթղթերը: Ապա լսել ենք Օձունի և և ենթաշրջանի հոգևոր հովիվ Տեր Վրթանեսի մեկնաբանությունները, որոնք զետեղված են հոդվածում:Եթե դուք մեր տեղեկատվությունը թերի եք համարում, գոնե մեկ փաստ էլ դուք ավելացրեք հոդվածի տակ: ,- ասում եք դուք : Ես Ձեզ այսօր առաջարկեցի լսել մեր խոսակցության ձայնագրությունը.:Ասացիք ընդամենը, թե բարերար Մ. Ձավարյանը եկեղեցու վերանորոգման ֆինանսավորումը ուզեցել է դադարեցնել, նախագծողի կողմից էլ առաջարկած եկեղեցու պատերի ամրացման համար հնարավորությունի չի ունեցել 50մլն. դրամ տրամադրել ոչ թե անցյալ, այլ նախանցյալ տարի: Մնում է զարմանալ Ձեր տրամաբանության վրա : Ինչ է փոխվում դրանից: Գործով զբաղվեք, պարոն Շերմազանյան: Հոդվածի խնդիրը ընդամենը եղել է Օձունի հրաշագեղ եկեղեցու նախագծով նախատեսված նորոգման աշխատանքների շարունակվելուն աջակցելը: Ուրիշ ոչինչ: Չմոռանամ Ձեզ հիշեցնել, որ եկեղեցու վերանորոգման մասին հոդվածի տեղեկատվությունը ամեն օր թարմացնում է Օձունի եկեղեցու քահանան Տեր Վրթանես Բաղալյանը, եթե այդ փաստերի հետ համաձայն չեք վատ չի լինի Ձեր հարցերը ուղղեք հենց նրան:
Տեր Վրթանես
Իսկական ապատեղեկատվությունը Օձունի վերածնունդի անվան տակ հանդես եկողների տարածած սուտն էր, որ իբր՝ Օձունի վերականգնումն ավարտված է: Որևէ մեկի քննադատելու ցանկություն չունեմ, այլ ուղղակի սիրտս պայթում է, որ հիմնադրամի փողերով գնված բետոնխառնիչը, բանվորների ճաշելու և շինանյութերի համար նախատեսված կառույցը, գնված և չտեղադրված մեծ քանակի քարերը, ավազը և այլն անիմաստ կկորչեն: Շինարարն Օձունից կտանի կռունկը, աշխատողների համար նախատեսված տնակները, կանջատվի եռաֆազ հոսանքը և այլն:Կրկին վերականգնում սկսելը բավական կբարդանա: Օձունի համաշխարհային մեծ արժեք ունեցող չքնաղ տաճարն էլ կրկին կարժանանա իր հետ 90-ականներին պատահած անմարդկային վանդալիզմին: Օձունի վերականգնումը կբարձրացնի մեր աշխարհիկ և հոգևոր իշխանությունների հեղինակությունը բազմաթիվ այցելուների մոտ, աշխատատեղ կապահովի վերականգնմամբ զբաղվողների համար և մեծագույն խթան կհանդիսանա տուրիզմի և հոգևոր կյանքի զարգացման ու առաջընթացի համար:
Վանուշ Շերմազանյան
Հարգելի Լարիսա Փարեմուզյան, խնդրում եմ Օձունի եկեղեցու վերականգնման շուրջ թերի տեղեկությունների վրա հիմնվելով սկանդալային նյութեր չհրապարակել: Այսպիսի հրապարակումներով հիասթափության ալիք եք բարձրացնում և հարաբերություններ փչացնում եկեղեցու վերականգնման գործընթացին մասնակցող անհատների մոտ: Խնդրում եմ մի խեղաթյուրեք ինձ հետ ունեցած հեռախոսազրույցի կծկտուր ինֆորմացիան: Մի այրեք բոլոր կամուրջները: Օձունի սբ. Մարիամ Աստվածածին եկեղեցու վերականգնման շուրջ նմանատիպ աղմկահարույց ապատեղեկատվությունները խանգարում են ավարտին հասցնել սկսած գործընթացը: Մի բան հաստատ իմացեք, Մովսես Ձավարյանը փրկել է Օձունի եկեղեցին փլուզումից, և դրա համար մեզ մնում է միայն հրապարակավ շնորհակալություն հայտնել նրան և ուրիշ պահանջներ չներկայացնել: Հիմնադիր բարերարը ավարտել է իր առաքելությունը: Նախագծով նախատեսված աշխատանքների մեծ մասը կատարված է, իսկ մնացյալը Հիմնադրամը կփորձի ավարտին հասցնել իր համախոհների հետ միասին: Հ. Գ. Վոլտերը ժամանակին ասում էր. : Ցավոք մեծերը չեն սխալվում…

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter