Գյուղացին համայնքապետից պահանջում է երեխաների ներկայությամբ ներողություն խնդրել կնոջից
Հոկտեմբերի 28-ին՝ ժամը 21:46-ին, Լոռու մարզի Քարկոփ գյուղի գյուղապետ Ժորա Այբեկյանը զանգահարել է համագյուղացի Խաչատուր Անդրեասյանին և նրան տնից դուրս կանչել:
«Քիչ անց վեճի ձայներ եկավ: Դուռը բացեցի, տեսա գյուղապետը քաշքշում է ամուսնուս: Մոտեցա հարցրի՝ ի՞նչ է եղել: Հարբած էր: Գյուղապետն էլ թե՝ ապօրինի ծառ եք տնկել այստեղ, պետք է ձեր ձեռքով էդ ծառը կտրեք»,- պատմում է Մարինեն՝ Խաչատուրի կինը: Վերջինս գյուղապետից պահանջել է հեռանալ:
Ժորա Այբեկյանը Մարինեին «գործ տվող» է անվանում: «Հետո սկսեց ինձ հայհոյել ու երեսիս ձեռքով խփեց: Աղջիկս՝ Հերմինեն, երբ տեսավ գյուղապետն ինձ խփում է, առաջ եկավ ինձ օգնելու»,- շարունակում է Մարինեն: «Ինքը խփեց ինձ, հետո ձեռքիցս քաշեց, երբ ես մամային օգնում էի»,- ասում է Հերմինեն: Մարինեի ասելով՝ ձեռնամարտ է տեղի ունեցել նաև ամուսնու և գյուղապետի միջև: Կինը ոստիկանություն է կանչել: Ոստիկանության Թումանյանի բաժնի քրեական բաժանմունքի ավագ օպեր լիազոր Արամ Ռամազյանը մեզ հայտնեց, որ հոկտեմբերի 28-ին գնացել է դեպքի վայր, դատաբժշկի ստուգման ենթարկվելու համար նույն օրը ուղեգիր է տվել ծեծի ենթարկված ընտանիքի անդամներին: Մարինեի ասելով՝ ավագ օպեր լիազորը հետո իրենց զանգել և ասել է, որ դատական բժիշկը տեղում չէ, երբ գա իրենց կզանգի:
Նոյեմբերի 2-ի կեսօրին տուժածները դեռ դատական բժշկի կողմից չէին հետազոտվել: Գյուղապետի ապտակից Մարինեի այտի կարմրությունը 6-րդ օրը անցել էր: «Ամբողջ մարզում մեկ դատաբժիշկ է աշխատում: Ես ի՞նչ կարող եմ անել, կես ժամ առաջ էլ եմ դատական բժիշկ Անտոնյանին զանգահարել, ասաց՝ այս պահին Նոյեմբերյանում է, կես ժամ հետ դուրս է գալու, ճանապարհից կթեքվի Քարկոփ՝ տուժածներին տեղում նայելու»,- մեզ հայտնեց Ա. Ռամազյանը: Թումանյանի բաժնի ոստիկանապետ Արամ Ղազարյանն էլ «Հետքին» հավաստիացրեց, որ եթե դատական բժիշկը հաստատի, որ Մարինեի դեմքին ապտակի հետքեր կան, գյուղապետն ամենայն խստությամբ պատասխանատվության է ենթարկվելու:
Մարինեն բազմազավակ մայր է: Նրա 5 երեխաներից Հերմինեն վատ տեսողության պատճառով երրորդ խմբի հաշմանդամ է, իսկ 2011-ի փետրվարին ծնված 4-ամյա Անիտան մանկուց հաշմանդամ է՝ երեխան անդամալույծ է: Ընտանիքն ապրում է 33 հազար 500 դրամ նպաստով, Հերմինեի 16 հազար և Անիտայի 21 հազար 500 դրամ հիվանդության թոշակով:
Այսուհանդերձ, ինչու՞ է գյուղապետ Ժորա Այբեկյանը խախտել բազմազավակ և երկու հաշմանդամ երեխաներ ունեցող ընտանիքի անդորրը: Այբեկյանը մեզ հայտնեց, թե Խաչատուրի ընտանիքի հետ միջադեպ չի եղել, հիմա ոստիկանությունում քննություն է գնում՝ կպարզվի: Ըստ գյուղապետի՝ Խաչատուրն ու կինը տանը բարձր խոսում էին, ինքը դրա համար է տուն մտել: Նրա ասելով՝ Խաչատուրն ու Մարինեն իր հետ քաղաքական խնդիր են լուծում: Ամուսիններն էլ նշեցին, որ գյուղապետը իրենց դեմ կռիվ է եկել իր հորաքրոջ՝ Քարկոփի գյուղապետարանի աշխատակազմի քարտուղար Կարինե Լորսաբյանի հրահրմամբ:
Քարկոփի թիվ 5 երկհարկանի շենքի՝ Խաչատուրի բնակարանի տանիքը վթարային է՝ նա ընտանիքով բնակվում է եղբոր սեփական տանը: «Մեր շենքի կողքի շենքը ազբոշիֆերի ընտիր տանիք ուներ: Մի երեք տարի առաջ մարզպետարանի ծրագրով առաջինը վերանորոգեցին այդ շենքի տանիքը: Մոտեցա, ասի՝ Ժորա, ամենագեշ վթարային շենքը մերն է, մարզպետարան դու ես ներկայացնում վերանորգման կարիք ունեցող շենքը»,- պատմեց Խաչատուրը: Գյուղապետը Խաչատուրին խոստացել է, թե հաջորդը նրա շենքի տանիքն է վերանորոգվելու: «Հավատացի: Հաջորդը սկսեցին էն շենքի տանիքը փոխել, որտեղ ինքը տուն ունի»,- ասաց Խաչատուրը: Կռվից 3 օր առաջ թիվ 5 շենքի հարևան Մխիթարը Խաչատուրին հայտնել է, որ նրա բնակարանից իր տուն ջուր է կաթում: «Բանալին վերցրի, գնացինք, տունը տեսավ: Բարձրացանք տանիք, Մխիթարն ասաց՝ Խաչո ձյաձյա, ճիշտ ես ասում, էստեղ մենք անելու բան չունենք»,- պատմեց Խաչատուրը:
Հետո շենքի բակում, երբ հարևաններով քննարկելիս են եղել տանիքի վիճակը, շքամուտք մտնելիս Խաչատուրը նկատել է գյուղապետարանի աշխատակազմի քարտուղար Կարինե Լորսաբյանին: Նա հարևան Մխիթարին առաջարկել է Կարինեին ևս ցույց տալ տան վիճակը: «Հիմա իմ տան տանիքը լրիվ փուլ է եկել, անձրևաջուրը թափվում է առաջին հարկ՝ Մխիթարանց տուն»,- Կարինեին ասել է Խաչատուրը:
«Նա՝ 4 անգամ դատված, հասարակությանը ոչ պիտանի մարդ, կանգնած սկսեց իր ձևերով խոսել: Ինձ չի հայհոյել, սուտ չեմ կարող ասել: Ինձ ասում էր՝ Մելիքից վախենում եք, դրա համար եք նրա տան տանիքը սարքում»,- մեզ հետ զրույցում հայտնեց Կարինեն: Մարինեն էլ բացատրեց, որ անհամությունը դրանից է սկսվել: Գյուղապետը եկել էր Խաչատուրի հետ կռվի, թե ինչու է Կարինեին ասել՝ արի կրիշի շիֆերը փոխի: Ամուսինները դժգոհեցին, որ Քարկոփի գյուղապետարանը սոցիալապես անապահով իրենց ընտանիքին երբևէ օգնություն չի տրամադրել: Ժորա Այբեկյանն էլ արդարացավ, թե Խաչատուրն ու կինը օգնության համար իրեն չեն դիմել:
Խաչատուրն ու Մարինեն Լոռու մարզպետարանի կայքում ուսումնասիրել և պարզել են, որ Ժորա Այբեկյանը համայնքի բյուջեից Քարկոփի ավագանու 04.09.2011 թ.-ի թիվ 15 որոշումով 30 հազար դրամ սոցիալական օգնություն է տվել աշխատակազմի քարտուղար, իր հորաքույր Կարինե Լորսաբյանի աղջկան՝ Անուշ Աքելյանին, 28.04.2011 թ.-ի ավագանու թիվ 10 որոշումով 50 000-ական դրամ օգնություններ է տվել իր կնոջը՝ Էմմա Եսայանին, հորաքրոջը՝ Կարինե Լորսաբյանին, գյուղապետարանի հաշվապահ Նարինե Նորեկյանին: Ավագանու 11.02.2011 թ. թիվ 3 որոշմամբ 50 հազար դրամ օգնություն է տվել նաև Կարինեի որդուն՝ Գագիկ Լորսաբյանին:
Մարզպետարանի կայքում Քարկոփի ավագանու ոչ բոլոր որոշումներն են տեղադրված: Ամուսինները վստահ են, որ այս դեպքում կհայտնաբերեին գյուղապետի կողմից իր հարազատներին համայնքի բյուջեի սուղ եկամուտները բաշխելու այլ փաստեր:
Մեկնաբանություններ (12)
Մեկնաբանել