Շիրակի մարզի Արթիկի տարածաշրջանի Հոռոմի համայնքապետարանում այս տարվա առաջին եռամսյակում մարզպետարանի համապատասխան բաժինների աշխատակիցներից կազմված հանձնաժողովը մի շարք ստուգումներ էր անցկացրել տարբեր ոլորտներում: Հոռոմի համայնքապետ Աշոտ Պասկեւիչյանը մարզպետ Ֆելիքս Ցոլակյանի որոշմամբ ենթարկվել էր վարչական տույժի եւ սեփական գրպանից պետական բյուջե մուծել 100 հազար դրամ:

Հանձնաժողովը ստուգումների արդյունքում արձանագրել էր, որ խախտվել է ՀՀ հողային օրենսգրքի 3-րդ հոդվածի 1-ին մասի 2-րդ եւ 3-րդ կետերի պահանջները՝ առանց հողերի վարձակալության իրավունքով օգտագործման տրամադրման մրցույթների անցկացման, առանց համապատասխան պայմանագրեր կնքելու եւ պետական գրանցման ենթարկելու, 2012-2014թթ. համայնքային սեփականություն հանդիսացող 5,94 հա գյուղատնտեսական նշանակության վարելահողերը տրամադրվել են վարձակալությամբ:

«Ճիշտն ասած՝ այդ մոտ 6 հա հողատարածքի հետ կապված պրոբլեմը եղել է 2002թ.-ից, այսինքն՝ նախորդ համայնքապետի օրոք դեռեւս: Խնդիրը մեզ անցել է ժառանգաբար, մեր թերացումն էլ էն է, որ հետեւողական չենք եղել,-ասում է Հոռոմի համայնքապետ Աշոտ Պասկեւիչյանը,-Հոռոմ համայնքի վարչական տարածքում գտնվող 142,58 հա վարելահողերը վարձակալական հիմունքով տրամադրված են, պայմանագրերն էլ կնքված են, գումարներն էլ գանձվում են, ուղղակի էդ 6 հա-ն էն գլխից առանց պայմանագրի է եղել»:

Համայնքապետարանի հաշվապահ Սրապիոն Ղարաղազարյանը բացատրում է, որ թերացումը կապված է եղել կադաստրային պայմանագրերի բացակայության հետ: «Հողի անձնագրավորում չի եղել, դրա համար էլ պայմանագիր չի կնքվել: Հիմա մենք աշխատում ենք, 2016թ. բյուջեով նախատեսված գումարներ ունենք, էդ հողերը մենք պիտի անձնագրավորենք, որ հետո նորից աճուրդ-վաճառքով կարողանանք տրամադրել,-բացատրում է Սրապիոն Ղարաղազարյանը,-վարձակալական հողերից ընդհանուր առմամբ բյուջե մուտք է լինում տարեկան 1մլն 634 հազար դրամ: Էն, որ էդ 6 հա-ի համար մենք պայմանագիր չենք ունեցել, էդ դեռ չի նշանակում, թե գումար էլ չի գանձվել: Վարձակալությամբ տրված բոլոր տարածքների համար էլ մենք գումար գանձում ենք, եւ արդեն երեք տարի է` մեր բյուջեն 100 տոկոսով կատարվում է»:

Հոռոմ համայնքում հողերի անձնագրավորման պրոբլեմները սկսվել են 2002-ին, երբ Երեւանից եկած մասնագետներն են չափագրումներ իրականացրել ու կազմել գոտիավորման քարտեզ: Թույլ տված սխալներն այս տարիների ընթացքում միմյանց հերթափոխող համայնքապետերն աշխատում են ուղղել, հատկապես, երբ տարաձայնություններ են առաջանում սեփականատերերի միջեւ:

 «Մեր միջոցով, կադաստրի միջոցով այդ սխալները ուղղում ենք, որովհետեւ մարդկանց հողերի սահմանները սխալ են նշվել, բայց դե ամեն մեկը գիտի իր հողն ինչքան է կամ մինչեւ որտեղ է ու ըստ այդմ էլ մուծումներն անում են, բայց եթե լինում են բողոքներ, շտկումներ անպայման անում ենք: Որովհետեւ կան դեպքեր, որ մեկ բնակչի հողը չափագրվել է մյուսի վրա, եւ սեփականության վկայականներն եկել են արդեն ուրիշի անունով: Հողի հարկի, վարձավճարների գանձման ժամանակ դա խնդիրներ է առաջացնում»,-ասում է համայնքապետը:

Թերություններն ամբողջությամբ վերացնելը համայնքապետարանի ուժերից վեր է, բնակիչները եւս դժգոհում են, քանի որ չափագրման եւ կադաստրային գործարքների համար ծախսվող գումարը կազմում է մոտ 30 հազար դրամ: «Միայն չափագրելը 15-20 հազար դրամ է, մի 7 հազար դրամի չափով էլ մուծում են անձնագրի համար, ու սա, ասենք, վարելահողերին է վերաբերում, բա տնամերձե՞րը: Եթե, ասենք, մի տարով իրավասություն տան, որ գոնե փոքր չափագրման սխալները կադաստրի հետ համայնքապետը կարողանա կարգավորել, գումարային առումով բնակիչներն էդքան էլ չեն տուժի»,-նկատում է Սրապիոն Ղարաղազարյանը:

Արոտների ջրարբիացման ծրագրի վերաբերյալ հանրային քննարկում Հոռոմում կազմակերպել են 2013թ. մարտ ամսին: Համայնքապետի փոխանցմամբ՝ բավական արդյունավետ է եղել, համաձայնության են եկել ու 310 հոգանոց կոոպերատիվ ստեղծել, որը բնականոն աշխատում է՝ գույք ենք ձեռք բերել, հեռագնա փարախներ եւ հովիվի տուն ենք կառուցել: «Իսկ մնացած հարցերով, որ ճիշտն ասեմ, մարդիկ քննարկումների չեն գալիս, ավագանու նիստերին էլ չեն մասնակցում, բայց մենք մեր իսկ նախաձեռնությամբ բնակիչների հետ անպայման հանդիպում ենք»,-շեշտում է Հոռոմի համայնքապետ Աշոտ Պասկեւիչյանը:

Տարբեր գերատեսչությունների կողմից համայնքում տարեկան մեկ կամ երկու անգամ իրականացվող ստուգումներից համայնքապետը չի դժգոհում: Առաջարկում է, որ դրանք լինեն յուրաքանչյուր եռամսյակում՝ ավելի զգոն կլինեն մարդիկ: «Թող ստուգեն, մենք բաց, թափանցիկ աշխատում ենք, հնարավոր է՝ մանր-մունր թերություններ ունենանք, էդ էլ որ արձանագրում են, աշխատում ենք շտկել: Լիքը ծրագրեր ենք արել գյուղում եւ պատրաստ ենք էլի ծրագրեր բերել՝ համայնքի ներդրումային մասնակցությամբ իհարկե»:

Հոռոմ համայնքի բյուջեն մոտ 50 մլն դրամ է՝ 38 մլն 800 հազար դրամը պետության կողմից հատկացվող դոտացիան է, 10 մլն 300 հազարն էլ սեփական եկամուտներն են: 2015թ. համայնքը «Հայկական Կարիտաս»-ի աջակցությամբ 3 կմ խմելու ջրի ներհամայնքային ցանց է կառուցել, 14 մլն դրամ արժեցած ծրագրի 10 տոկոսը՝ 2 մլն 200 հազար դրամը, եղել է համայնքի ներդրումը: Ոռոգման ցանցի մաքրման ու գյուղամիջյան ճանապարհների հարթեցման աշխատանքներ են կատարում սեփական եկամուտների հաշվին, կրկին 250 մ խմելու ջրի ջրագիծ են կառուցել գյուղում, սակայն այս անգամ ինքնուրույն, համայնքային բյուջեի հաշվին՝ տրամադրելով 987 հազար դրամ: Գիշերային լուսավորության ցանցը եւս բարվոք վիճակում է՝ 130 կետ ունեն գյուղում, որից միայն 30-ը տեղադրել են այս տարի: Համայնքային ենթակայության տակ գործող մանկապարտեզի համար տարեկան 8 մլն դրամ են ծախսում: Ի տարբերություն շատ գյուղական համայնքների, Հոռոմում փոքրիկները մանկապարտեզ հաճախում են նաեւ ձմռանը:

«Մեր հոգսը մանկապարտեզի տիպային շենք չունենալն է,-ասում է համայնքապետը,-32 երեխա է հաճախում մանկապարտեզ, մեկ խմբով է գործում մշակույթի տան մի հատվածում: Եթե կարողանանք պետական ծրագրով մի հատ մանկապարտեզ կառուցել, հաճախող երեխաների թիվն էլ կավելանա»: