Աստղիկ Եդիգարյան. «Հայորդաց տուն հայ զինվորին սնունդ բերող մարդկանց հոսքը չի դադարում»
Գյումու Հայորդաց տան նախասրահում շրջելիս առաջինն, ինչ աչքի է զարնում բազմաթիվ արկղերի կույտերի մեջ, այսպես կոչված «տնական» հյութերի, պահածոների, ջեմերի ու մուրաբաների ապակե տարաներն են: Մի անկյունում պարկերով կարտոֆիլ է շարած, տարբեր չափերի արկղերում սրահում հավաքված մի խումբ երիտասարդներ տեսակավորում են պահածոներ, խտացրած կաթ, քաղցրավենիք եւ այլն: Որոշ տուփերում նկատում եմ նաեւ տաք ծածկոցներ:
Մայր աթոռ սուրբ Էջմիածնի Գյումրու Հայորդաց տան տնօրեն Աստղիկ Եդիգարյանն ասում է, որ Արցախում սահմանը պահող հայ զինվորին աջակցելու կոչ-առաջարկով ապրիլի 3-ին ինքն հանդես է եկել Ֆեյսբուկ սոցիալական ցանցում: «Ես արդեն տեղյակ էի, որ Երեւանի Մաշտոցի պուրակում ապրիլի 4-ին պիտի մարդիկ սնունդ ու հագուստ հավաքեն առաջնագիծ ուղարկելու համար: Մտածեցի մենք էլ մասնակցենք ու նման ակցիա անենք Գյումրիում: Ուղղակի չէի մտածում, թե նման արագությամբ կարձագանքեն ու անհատ անձինք, կազմակերպություններ իրենց աջակցությունը կառաջարկեն»,- ասում է Աստղիկ Եդիգարյանը:
Սկզբում մտածում էին, թե երկու բեռնատար մեքենայի չափով էլ, որ կարողանան սնունդ հավաքել-ուղարկել՝ ահագին բան արած կլինեն: Սակայն անցած երեք օրվա ընթացքում արդեն հինգ բեռնատար մեքենա սնունդ են ուղարկել Արցախ:
«20 տոննա բեռ ենք ուղարկել Արցախ, հիմա էլ 6-րդ մեքենայի այսպես ասած բաժին բեռն ենք պատրաստում: Մենք գումար չենք հավաքում, եղել է դեպք, որ մարդիկ եկել են, գումար են առաջարկել, ասել ենք, որ Հայորդաց տան կողքին խանութ կա, գիտե՞ք ինչ, մտեք էդ գումարի սնունդ գնեք, մենք անպայման կուղարկենք,- կատարած աշխատանքներն է ներկայացնում Հայորդաց տան տնօրենը,- երկու անձնավորություն գումար են տվել 100 հազար դրամի չափով մեքենաների վարորդներին, միայն վառելիքի գումար: Մեկ էլ մի տատիկ, որ էդ պահին եկել էր, թոշակ էր ստացել, տեսավ, որ մեքենան դրոշներով մեկնում է, հանեց 3 հազար դրամ տվեց վարորդին, թե՝ «տղա ջան, վերցրու ճամփեն բանըմ կառնիս», չէր վերցնում վարորդը, հետո տատիկը շատ պնդեց, դեռ մի հազար դրամ էլ ավելացրեց, թե՝ «կողքիդ նստած տղուն կուդաս»:
Առաջին իսկ օրվանից ակցիայի մասին տեղյակ է պահվել Գյումրու զինվորական կոմիսարիատի ղեկավարությանը: Աշխատում են համակարգված: Մոտավորապես 105 արկղ սնունդ եւ անհրաժեշտ պարագաներ են ուղարկել տեղահանված ընտանիքներին, որ կարող է նրանց բավարարել երկու շաբաթ, մնացածն, ըստ զրուցակցիս հավաստի տեղեկությունների՝ ուղարկվել է զորամասեր: Առաջին երկու մեքենա բեռը տեղափոխել են Քաշաթաղի բնակիչներ:
Աստղիկ Եդիգարյանն ասում է, որ մարդկանց հոսքը չի դադարում, բերում են դպրոցներից, Գյումրուն մոտ գտնվող գյուղական համայնքներից եւ որպեսզի հանկարծ որեւէ մեկի անունը բաց չթողնի՝ գերադասում է չթվարկել: Նշում է միայն, որ այսօր արդեն գյումրեցիներին են միացել Ախալքալաքի երիտասարդները: Ինչ վերաբերում է տնային պայմաններում պատրաստված պահածոներին, ապա որոշել են ուղարկել միայն մուրաբաներն ու ջեմերը: Սննդային թունավորումից խուսափելու նպատակով ոչ գործարանային արտադրանք հանդիսացող պահածոները զինվորներին չեն ուղարկի:
Մեկնաբանել