HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

75 տարեկան կամավոր. «Երկու աղբերս զովել են էնտեղ, ո՞նց եմ հող տալիս»

Արցախյան պատերազմի մասնակից, մարտի դաշտում երկու եղբորը կորցրած 75-ամյա Մելսիկ Գևորգյանը հպարտանում է, որ բնությունն ու ճակատագիրն իրեն վեց տղա թոռ են նվիրել: Հենց մանկահասակ երեխաներին փրկելու համար է ապրիլի 6-ին թողել ԼՂ իրենց բնակավայր Մարտունին:

- Ես չէի գալիս, բայց ուզում էի էրեխոցը փրկեի:

Ապրիլի 1-ից հինգ օր շարունակ Գևորգյանների ընտանիքը պատսպարվել է նկուղում: Մելսիկ պապը ընտանիքը ապահով հասցրել է Հրազդան, ինքը հետ դարձել Մարտունի, հետո նորից եկել երեխաների մոտ: Ասում է, որ էլի պիտի գնա, քանի որ զինվորների կողքին պիտի կանգնի:

- Ես մտածեցի, որ առաջին կռվից հետո մեր հին կռվողները չեն գա. մեկը` ոտը կտրած, մյուսը` ձեռը կտրած, ոչ մի օգնություն չեն արել: Բայց մեկն էլ ես, ասի` ո՞նց չգնամ, և գնացի, չկռվեցի, խոսքով օգնում էի,- ասում է Մելսիկ Գևորգյանը:

Գևորգյան ընտանիքը ԼՂՀ-ից եկած ու Հրազդան քաղաքում այս տարվա ապրիլից ապաստան գտած 12 ընտանիքներից մեկն է: Մեկ ամիս ու կես նրանք ապրում են խնամու բնակարանում:

Հարցնում եմ կարիքներից: Կարճ է կտրում Մելսիկ պապը, թույլ չի տալիս անգամ կինը` տիկին Ժաննան մի նախադասություն ասի.

- Հարկավոր չի մեզ ոչ մի բան, մենակ մեր հողն ու ջուրը:

Ղարաբաղի հարցի լուծումից եմ հարց տալիս, հնարավոր փոխզիջումների մասին երբեմն-երբեմն պտտվող խոսակցություններից: Մելսիկ Գևորգյանը միանգամից ասում է` փոխզիջումը լինող բան չի.

- Էդ չի լինի, էդքան զոհերը տվել ենք, երկու աղբերս զովել են էնտեղ, ո՞նց եմ հող տալիս… Զոհ շատ ենք տվել, իրենք ուժեղ զինված էին, բայց մեր 5-ը իրենց 500-ն ա, օզում ես որտեղ բարձրանամ ասեմ` 15 հոգով մունք 500 խփել ենք… հայի ջանին մեռնեմ, հայը հանուն իրեն հողի համար ա կռվում:

- Պայքարում ենք, պայքարելու ենք, մեր հողից ու ջրից թող կորչեն գնան: 75 տարեկան մարդ եմ, կյանքս էլ կտամ: Բայց մենք չենք ուզում կռիվ լինի, մենք պաշտպանվում ենք, իմ հողն ու ջուրն եմ պահում,-վերջում ասաց Մելսիկ պապը:

Լուսանկարները` Նարեկ Ալեքսանյանի

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter