HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Թալիշցի Խալափյաններն Արզնի տեղափոխվելու երկրորդ օրը սկսել են մշակել հողամասը

Երբ մտնում ես Արցախի Թալիշ գյուղից տեղահանված Խալափյանների նոր բակն Արզնիում, թվում է՝ այնտեղ անմշակ տնամերձ երբևէ չի եղել: Թեպետ մայրն ու երկու որդիները մեկ ամիս են Արզնիում, սակայն գալու երկրորդ օրվանից սկսել են հողամասը մշակել, հետո էլ գոճներ ու հավեր են գնել:

69-ամյա Սվետլաննա Խալափյանը ծնունդով Ղարաբաղի Չայլու գյուղից է, ամուսնացել է թալիշեցու հետ, ունեցել են 12 երեխա: Բոլորն ամուսնացել են, բացի երկու տղաներից Սերյոժայից ու Ստեփանից. «Ազաբ էրեխոցս հետ եմ մնացել»,-ասում է Սվետլաննա Խալափյանը:

Ապրիլի 2-ին, տիկին Սվետլաննայի ծննդյան օրը, Թալիշում ապրող մյուս ընտանիքների նման նրանք դարձել են կրկնակի փախստական: «Վերջին օրերը միտս են ընկնում, չեմ էլ ուզում խոսամ»,-պատմում է երկու պատերազմ վերապրած կինը:

Ընտանիքը նախ եկել է Մասիս, հետո Վանաձոր, ապա տեղափոխվել Արզնի. «Օդը լավն ա, մեր գյուղի նման»,-նկատում է 69-ամյա Սվետլաննան՝ ավելացնելով, որ իրենք հողի, սեփական տան սովոր մարդիկ են:

Արզնի գյուղի փակված տներից մեկը նրանց 25 հազար դրամով վարձով են տրամադրել: Վերջին օրերին Սերյոժան գնացել է Թալիշ, տնից մի քանի անհրաժեշտ իրեր ու փաստաթղթեր է կարողացել դուրս բերել, չի մոռացել նաև հանգուցյալ հոր լուսանկարը. «Հիմի հոր նկարը որ բերել ա, ասել ա՝ ոչ մի բան, որ չտանեմ, սա պիտի հասցնեմ մամային: Որ բերել ա, ուրեմն սա իմ տունն ա»,-նշում է բազմազավակ մայրը:

Ընտանիքը Թալիշ վերադառնալու համար անվտանգության երաշխիք չի տեսնում. «Եթե հարմարվի, եթե տները սարքվեն… բայց հիմիկվա դրությամբ, եթե ոսկի փռեն Թալիշի վրա, չի լինի»,-կարծում է տիկին Սվետլաննան:

Ընտանիքի նոր բացված հաշվեհամարին (AGBA կրետիտ ագրեկոլ բանկ, Աբովյանի մասնաճյուղ 220302449362000) փոխանցված գումարի շնորհիվ Սերյոժան կարողացել է երեք ամսվա տան վարձը միանգամից տալ, մնացած գումարով էլ գոճիներն ու հավերն է գնել: Ուզում է մեծացնել տնտեսությունն ու հաստատվել Արզնիում: Նպատակ ունի կովեր գնել, բայց դեռ գումարը չի հերիքում: Սերյոժան ու Ստեփանը, բացի տան տնտեսությունը զարգացնելուց, մտածում են աշխատատեղի մասին: Գործ են փնտրում:

Սրյոժան հիշում է մանկությունը, երբ 1992-ին, չորս տարեկանում, նորից փախել են ծնողների ու 11 քույր-եղբայրների հետ: Վստահ չէ, որ երկու անգամ կատարվածը նորից չի կրկնվի: Դա է պատճառը, որ Թալիշ վերադառնալը չի պատկերացնում:  

«Նույնը էլի կրկնվելու ա… ստեղ ապրեմ, ստեղ ստեղծեմ, իմանամ, որ ստեղծածս վայելելու եմ»,- ասում է Սվետլաննայի կրտսեր տղան՝ Սերյոժան՝ ընդգծելով, որ Թալիշում իրենք, նաև համագյուղացիները լավ էին ապրում. «Կարելի ա ասել երևանցիքից հարյուր գլուխ լավ էինք ապրում: Բայց հիմա էդ արած-դրածը թողել են, փախել»:

Սերյոժան 2 տարի ութ ամիս ծառայել է ԼՂզինված ուժերում, ապա մեկնել Ռուսաստան արտագնա աշխատանքի, այնտեղ զբաղվել է շինարարությամբ, բայց հետո վերադարձել հայրենի Թալիշ: Պատերազմական գործողությունների, Արցախի հարցի կարգավորման մասին իր պատկերացումներն ունի Սերյոժան. «Ես կորոշեի միանգամից սկսվի. կամ էս կողմ, կամ՝ էն կողմ, ոչ թե էս խաղաղ կյանքում օրական զոհ»:

Մեկնաբանություններ (2)

Tristan
hello. I am in Australia and would like to donate to this family. is there a donation link? how can i donate?
Zaruhi
Dear Tristan, thank You. Iit is written in article: An bank account at ACBA has been opened by the Khalapyan family at the Abovyan branch (#220302449362000)

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter