Չորս բարձրագույն կրթություն ստացած՝ կիբեռնետիկ, տնտեսագետ, իրավագետ, ավտոմատիկ, ժողովրդական վարպետ, փայտի գեղարվեստական փորագրող, Արցախյան պատերազմի հաշմանդամ, «Սասնա Ծռեր» խմբի անդամներին կյանքը վտանգելով հաց հասցրած Արթուր Սարգսյանը 48-ամյակը նշեց «Նուբարաշեն» բանտում: Հուլիսի 31-ից նա անազատության մեջ է: Մեղադվում է «Սասնա Ծռերին» աջակցելու մեջ:

«Նուբարաշեն» ՔԿՀ-ի դիմաց հավաքված Վերնիսաժի նրա փայտագործ ընկերները մեղադրանքը աբսուրդ որակեցին. «Ում հարցնեք՝ կասեն, որ Արթուրը ճիշտ քայլ ա արել»,-ասում էին նրանք:

Նրանց կոչն է իրավապահներին՝ ազատ արձակել Արթուրին. «Ամո՛թ է, հաց տանելու համար մարդ կձերբակալե՞ն»,-ասում էին ընկերները:

Ինչպես և պլանավորել էին, Վերնիսաժի փայտագործները սնունդ ու տորթ էին պատվիրել ընկերոջ ծննդյան օրվա առթիվ: Պատմեցին, որ խմորեղենի սրահում, իմանալով, որ «հաց բերող» Արթուրի համար է տորթը, նախատեսվածից մի քանի անգամ մեծ տորթ են պատրաստել իրենց կողմից:

«Էսօր Արթուրը «Նուբարաշենի» բանտարկյալներին տորթ ա հյուրասիրելու: Փաստորեն ստացվեց՝ Արթուրն իր շնորհքով բանտարկյալներին էլ հաց հասցրեց»,-ասաց փայտագործ Հայկը:

Արթուրի մասին պատմող «Հետքի» տեսանյութից հետո ԱՄՆ-ում ապրող մի քաղաքացի՝ Գևորգ անունով, ևս տորթ էր պատվիրել: Նամակում մեզ գրել էր՝ նշեք, որ ժողովրդիս կողմից է:

Փայտագործ Արմեն Խաչատրյանն էլ նշեց, որ կիրակի օրը Վերնիսաժում շատ քաղաքացիներ մոտեցել են իրենց, աջակցություն առաջարկել: Անգամ մի քաղաքացի, ով միայն անունն է հայտնել, ի դեպ, դարձյալ Արթուր, 1000 դոլար է փոխանցել «հաց բերողի» համար:

Բացի այդ, Արթուր Սարգսյանի փայտագործ ընկերները ցանկանում են վերցնել ընկերոջ քանդակները, որպեսզի այս ընթացքում վաճառեն ու օգնեն նրան:

«Նուբարաշեն» բանտի մոտ եկան նաև Արթուր Սարգսյանի եղբայրը՝ Արսենը, մոր՝ տիկին Դոնարայի հետ: Եղբայրը «Հետքին» ասաց, որ իրենք շնորհակալ են քաղաքացիներին հոգեբանական աջակցության համար, բայց այլ բանի կարիք չունեն: Արսենը նշեց, որ եղբոր առողջական վիճակը վատ է. «Իր նասկին անգամ պիտի մարդ լինի, որ հագցնի»: Նա մեզ փոխանցեց Արթուրի առողջական վիճակի, նաև բարձրագույն չորս կրթությունների մասին վկայող փաստաթղթեր՝ ասելով, որ այդ ամենը փաստաբանները ներկայացրել են դատարան, բայց՝ անօգուտ: Դատարանը անգամ կալանքը գրավով փոխարինելու միջնորդությունն է մերժել:

Արթուր Սարգսյանը վիրավորվել է Արցախյան պատերազմի ժամանակ՝ դիրքեր հաց տանելիս, ունի հենաշարժողական ապարատի խնդիրներ, ճողվածք: 

Արսենն ասաց, որ եղբոր զենքերը գիրքերն են, գրիչն ու թուղթը: Հետո մեզ փոխանցեց Արթուրի դիպլոմների պատճեները:

Արթուր Սարգսյանը ծնվել է 1968 թ-ին, Երևանում, գիտնականների ընտանիքում: Ավարտել է Ֆիզ.մաթ դպրոցը: 1992-ին գերազանցությամբ ավարտել է Երևանի պոլիտեխնիկական ինստիտուտը: Զուգահեռաբար սովորել է նույն ինստիտուտի բժշկական կիբեռնետիկայի բաժնում, ավարտել է 1989-ին: 2002-ին գերազանցությամբ ավարտել է Երևանի ֆինանսաբանկային համալսարանի իրավագիտության ֆակուլտետը, 2007-ին նույն համալսարանի Ֆինանսներ և վարկ բաժինը:

Մինչ Արթուր Սարգսյանի ընկերները սպասում էին «հաց հասցնելու» իրենց հերթին, «Նուբարաշեն» ՔԿՀ գալիս էին կալանավորվածների ու դատապարտյալների հարազատները, որոնք հանձնուքների ընդունման կետում նույնպես սնունդ էին փոխանցում ընտանիքի բանտված անդամներին: Տեսնելով լրագրողներին ու իմանալով, թե ում ծննդյան օրն է, շատերը ասում էին՝ ազատեք էդ տղային: