Շնողում նախընտրական տրամադրություն է՝ համայնքի ղեկավարի 5 թեկնածու է առաջադրվել
Թիվ 31 Ընտրատարածքային ընտրական հանձնաժողովը սեպտեմբերի 6-ին գրանցել է հոկտեմբերի 2-ին Շնողի համայնքապետի ընտրություններում առաջադրված բոլոր 5 թեկնածուներին: Գրանցվածներից 3-ը՝ Հովիկ Սահակյանը, Արմեն Առաքելյանը և Հայկազ Քոչինյանը, անկուսակցական են: Դավիթ Ղումաշյանը և Անդրանիկ Մելիքսեթյանը Հանրապետական կուսակցության անդամ են, սակայն համայնքապետի թեկնածուներ են գրանցվել ինքնաառաջադրմամբ:
Գյուղամիջում նստած շնողցիներից ֆերմեր Վոլոդյա Եսայանը մեզ հետ զրույցում դժգոհեց, որ Շնողում մարդիկ հողից ու անասունից երես են թեքել: «Գյուղի գերեզմանատնից էն կողմ ընկած հողերի խոտը հասունացել է՝ չեն հավաքում, որովհետև ժողովուրդի մի մասը լոդրացել է «էս երկիրը դրան է բերել: Կաթը ջրի գին է դարձել, դրա համար մարդիկ անասունից էլ են երես թեքում»,-բացատրեց Վոլոդյան:
Վոլոդյան 200 կով եւ 100 մոզի ունի: Դրանց միսը հասցնում է 300-350 կգ-ի ու հանձնում Երևանի սուպերմարկետներին: «Իմ հանձնածը բիո միս է»,- իր ապրանքը գովեց Վոլոդյան: Ֆերմերը թերահավատ է Շնողի համայնքապետարանի բյուջեի հնարավորությունների առնչությամբ. «Գյուղացիների կեսից ավելին հարկ չի մուծում, էդ բյուջեն որտեղի՞ց պետք է առաջանա: Ես ազնվորեն ասեմ՝ իմ մեջ մտածել եմ՝ մեր գեղից ո՞վ կլինի գյուղապետ, որ գեղը լավ ապրի: Ես էտենց մարդ չգտա»,- ասաց Վոլոդյան:
Բնակիչ Խաչիկ Դավթյանի ասելով՝ Շնողի պես լավ գյուղ չկա. «Ով կընտրվի գյուղապետ, թող ավելի լավ աշխատի: Ամեն գյուղում էլ թերություն կա: Ահագին բան էլ մեզանից է կախված»,- ասաց Խաչիկը: Լևոն Ալիխանյանի խոսքով՝ հարևան Արճիս գյուղը ամեն տեսակի տեխնիկա ունի, հող մշակող շնողցիներն արճիսցիներից են տեխնիկա վերցնում: «Տեխնիկան ինչքան գնում, զարգանում է, ով հասնում է էսօրվա տեխնիկային, ցանկացած բնագավառում իր գործը հաջող է գնում»,- ասաց Լևոնը:
«Թեկնածուներից մեկն իմ ախպոր թոռն ա, ջահել մարդա, Ղումաշյան Դավիթ է ազգանունը: Դեռ Շնողում չի, էսօր ա, հեգուց ա՝ Ռուսաստանից կգա: Հա, դե նա ուժեղ տղա ա: Ռուսաստանում շինարարության վրա է: Ա, Վալոդ, Դավոն ի՞նչ կրթություն ունի»,- հարցրեց Մարտուն Ղումաշյանը: «Ինստիտուտ ավարտա, բայց ո՞ր ինստիտուտն է ավարտել, չգիտեմ»,- պատասխանեց Վալոդը:
Մեկ այլ բնակչի՝ Մարտուն Մարգարյանի ասելով՝ ՏԻՄ ընտրությունները Շնողում ոչինչ չեն փոխի: Ոնց կա, էնենց էլ կլինի: Մարտունը նշեց, որ գործող գյուղապետ Հովիկ Սահակյանի պաշտոնավարման 4 տարիներին Շնողի համար մեծ հիմնախնդիր դարձած խմելու ջրի հարցն է լուծվել՝ գյուղի միջով անցնող Ագարակի ջրագծից ջուր է բերվել գյուղ: «Ծրագիր էր՝ քաշեց»,-նրան ընդհատեց Մարտուն Ղումաշյանը: «Այգիներ է գցել «Դուզ» հանդամասում»,-հավելեց Մարտուն Մարգարյանը: «Գցել էլ է, բրախել էլ են»,- կրկին ընդհատեց Մարտուն Ղումաշյանը: «Դե էդ ենք ասում, մասնավորի մի մասը բրախել է, բայց գյուղապետն ըտի մեղք չունի»,- հակառակվեց Մարտուն Մարգարյանը:
Համայնքապետի թեկնածու, գործող գյուղապետ Հովիկ Սահակյանը սպասվող ՏԻՄ ընտրություններն անկանխատեսելի է համարում. «Դա ոնց որ էլ ընտրություն չի լինի արդեն: Էն թեկնածուի բարեկամական կապերը որ շատ են, ընտրության ժամանակ անտեսվելու է գյուղի շահը»,-բացատրեց Հ. Սահակյանը:
1990-ականների էներգետիկ ճգնաժամի տարիներին շնողցիներն իրենց այգիները կտրել, հացահատիկային կուլտուրաներ են մշակել, 469 հա այգիներից 60 հա այգի է մնացել: Հ. Սահակյանի նախաձեռնությամբ՝ «Թեղուտ» ՓԲԸ-ի ներդրումների հաշվին, զանգվածաբար հատված անտառային ծառատեսակների փոխարեն գյուղացիների հողերի վրա մոտ 20 հա պտղատու այգի է հիմնվել: «Իրենց հողատարածքի վրա ձրի, առանց մեկ լումա ծախսելու այգի ենք գցել, ասել ենք՝ դե գնա խնամի: Որոշ այգետերեր ամիսներով չեն գնում տեսնեն՝ իրենց ծառերը չորացե՞լ են, թե՞ կպել են»,- դժգոհեց Հ. Սահակյանը: Շնողի գյուղտեխնիկայի մասին Հ. Սահակյանն ասաց, որ «Թեղուտ» ՓԲԸ-ից վարձակալությամբ DT տրակտոր են վերցրել. «Ում տվեցինք՝ չկարողացան վարել: Մի հատ էլ գյուղապետարանը նորմալ տրակտոր ունի, մի քանի մասեր են պակաս, բայց տրակտորիստ չունենք: Մասնավորը գյուղտեխնիկայի վրա էնպիսի բարձր գներ է դնում, որ գյուղացիները նախընտրում են տեխնիկան ավելի մատչելի գնով ձեռք բերել արճիսցիներից»,- ասաց Հ. Սահակյանը:
Շնողում գյուղացիների մեծ մասը երես է թեքել գյուղատնտեսությունից: Կառավարությունը 2014թ. գյուղացիների պահանջով աշնանացան ցորենի 1-ին վերարտադրության սերմացու է տվել շնողցիներին, բայց մինչ 2015թ. բերքահավաքը գյուղի արտերը կարկտահարվել են: Սերմացուի գումարը կառավարությունը չի զիջել, շնողցիներն էլ սերմացուի գումարը չեն տալիս: «Փոխանակ դուք մեզ օգնեք, եկել եք կարկտահարված ցորենի սերմացուի գինը ուզում եք»,- ասում են հողատերերը:
«Գյուղացիները ճիշտ են»,-համաձայնում է Հ. Սահակյանը: Մարզպետարանը, սակայն, սերմացուի չվճարված փողի համար դատի է տվել գյուղապետ Հովիկ Սահակյանին: Դատարանն էլ կալանք է դրել գյուղապետի աշխատավարձի և գույքի վրա: «Ես արտ չունեմ, անգամ 1 կգ սերմացու չեմ վերցրել»,-բացատրում է գյուղապետը: Մարզպետն էլ գյուղապետին է բացատրել, թե մեկ է՝ սերմացուի պայմանագիրը դու ես կնքել: Իր նախընտրական ծրագրերի մասին Հովիկ Սահակյանն ասաց, որ ընտրվելուց հետո գյուղում 4 հակակարկտային կայան է տեղադրելու. «Այդ խնդիրն արդեն լուծված է»: Գյուղի մշակույթի պալատում անց է կացնելու կոյուղագիծ և խմելու ջրի ջրագծեր: Առաջանահերթ վերանորոգելու է Շնողի հրապարակից Թեղուտ գնացող 750մ երկարությամբ ճանապարհը: «Ծրագրերը շատ են, այդ մասին ընտրողներին կտեղեկացնեմ քարոզչության օրերին»,- ասաց Հ. Սահակյանը:
Համայնքապետի թեկնածու, Հանրապետական կուսակցության անդամ Անդրանիկ Մելիքսեթյանը մասնագիտությամբ անասնաբույծ է: Ներկայումս աշխատում է Թումանյանի սոցիալական ծառայության պետ:
«Չեմ ուզում գյուղի վիճակին վատ գնահատական տալ, որովհետև որքան էլ գյուղի տնտեսությունը լավը լինի, համենայն դեպս, գյուղապետի համար շատ անելիքներ կան: Թեկնածուի ասելով՝ Շնողի սանիտարական, բնապահպանական բնագավառում, ճանապարհների, խմելու և ոռոգման ջրերի մատակարարման գործում լուրջ անելիք կա: Իր ասելով՝ ընտրվելուց հետո Ա. Մելիքսեթյանը գյուղապետի իր աշխատանքը սկսելու է գյուղի բնապահպանական վիճակը կարգավորելուց: «Իմ համագյուղացիներն աշխատելով հանքարդյունաբերությունում՝մի տեսակ իրենց սեփական տնտեսություններն աչքաթող են արել: Ես կօգտագործեմ իմ բոլոր հնարավորությունները, որ Շնողում գյուղատնտեսությունը զարգանա»,- հավելեց նա:
Վերջինս Շնողի գյուղապետի նախորդ ընտրությանը եղել է թեկնածու Հայկազ Քոչինյանի թիմում: «Թիմ ասածը մի քիչ պայմանական է, դե մարդը իր ձայնը պետք է տա մեկին, էն ժամանակ ես չեմ թաքցրել, որ ես ընտրելու եմ Հայկազ Քոչինյանին»,- մեկնաբանեց Ա. Մելիքսեթյանը: Շնողի արվեստի դպրոցի տնօրեն Արմինե Խառատյանը Ա. Մելիքսեթյանի կինն է: Վերջինս գյուղապետի թեկնածու, նախկին գյուղապետ Հայկազ Քոչինյանի հետ աշխատելու տարիներին արվեստի դպրոցում բյուջեի ապօրինի ծախսեր է կատարել: «Որ արվեստի դպրոցում կար խախտում, էդ խախտումը կար: Խախտողին էլ օրինապահ մարմինները հայտնաբերել և հարցաքննել են: Գյուղապետ ընտրվելու դեպքում, իհարկե, կնոջս հետ կաշխատեմ օրինականության սահմաններում»,- վստահեցրեց Ա. Մելիքսեթյանը:
Համայնքապետի թեկնածու, Հանրապետական կուսակցության անդամ 40-ամյա Դավիթ Ղումաշյանը 1997-1999թթ. բանակում ծառայելուց հետո մեկնել է Ռուսաստանի Դաշնություն: Իր խոսքով՝ ՌԴ-ում ապրելիս չի մոռացել հայրենի գյուղը: Ներկայում տներ, պահեստներ և շինարարական բիզնես ունի Ռուսաստանում: «Շինարարական բիզնեսի հիմնադիրը ես եմ եղել, բայց ամեն ինչ հիմա իր հունով գնում է, ուստի թողել, եկել եմ գյուղ»,- պատմեց նա: Դավիթն իրեն մեծահարուստ չհամարեց, թեև կարծում է, որ հենց ունևոր մարդը պետք է աշխատի գյուղապետ, որ աջ ու ձախ չնայի: «Ես Շնողի մասին միայն այն կասեմ, որ ահագին գործեր կան, որ պետք է արվեն: Իմ անձնական հնարավորություններն այնքան են, որ եթե պետության կողմից դա չարվի, ես պատրաստ եմ իմ անձնականն էլ ներդնեմ»,- ասաց նա:
Դավիթը, իր ասելով, վերջին երկու տարիներին գյուղի անապահով 15 ընտանիքների օգնել է 40 հազարական դրամով: Ռուսաստանաբնակ իր ընկերների հետ լուծել է նաև շնողցի 22-ամյա Գրիգոր Մարգարյանի սրտի վիրահատության 2 մլն դրամից ավելի ֆինանսավորման խնդիրը: Թեկնածուն գյուղի անգործության մատնված ֆուտբոլի դաշտն օգտագործելու համար գնդակներ է գնել երեխաների համար: «Երեկոյան ժամը 5-6-ը արդեն մի 20-25 երեխա ֆուտբոլի դաշտում խաղում են»,- հայտնեց նա: Իր նախընտրական ծրագրով Դավիթը խոստանում է Շնողում զարգացնել սպորտը: Մեզ հետ զրույցում նա կարևորեց Շնողի ոռոգման ջրի խնդիրը: «Այս խնդիրը երևի մի 80 տոկոսով լուծված չի: Ես դա համարում եմ առաջնահերթ խնդիր, որը պետք է լուծեմ: Ես պատրաստ եմ նաև այս գործում իմ անձնական ներդրումներն անել»,-ասաց նա: Դավիթը կարևորեց նաև գյուղի սոցիալապես անապահով ընտանիքներին օգնելը:
Համայնքապետի թեկնածու Արմեն Առաքելյանի հետ չհաջողվեց հանդիպել Շնողում, քանի որ նա աշխատանքի էր: Արմենը հողային ինժեներ է «Թեղուտ» ՓԲԸ-ում: Թեկնածուն հեռախոսով մեզ հայտնեց, որ նախընտրական քարոզաշավի ընթացքում արձակուրդում է լինելու, այդ ժամանակ էլ մեզ կպատմի իր նախընտրական ծրագրերի մասին:
Նախընտրական քարոզչության օրերին կներկայացնենք նաև համայնքապետի թեկնածու, Շնողի նախկին համայնքապետ Հայկազ Քոչինյանի նախընտրական ծրագրերը:
Մեկնաբանություններ (6)
Մեկնաբանել