Դեբեդավանցիներն իշխանության որևէ խոստման այլևս չեն հավատում
Տավուշի մարզի Դեբեդավան գյուղը սահմանակից է Վրաստանի Մառնեուլի շրջանի ադրբեջանաբնակ գյուղերին: Այստեղ հիմնականում ապրում են Ադրբեջանի Վարդաշենի շրջանի Ճալեթ գյուղից բռնագաղթածներն ու Կուտկաշենի և Խանլարի շրջաններից տեղահանվածները: Դեբեդավանում, գյուղացիների ասելով, 200 տնտեսություն է ապրում: Զեյնալ Բաբաջանյանն ասում է, որ Դեբեդավանը 25 տարվա խնդիրներ ունի:
«Էս 25 տարի է՝ ոչ խմելու ջուր ունենք, ոչ ոռոգման ջուր և ոչ մանկապարտեզ»,- հայտնեց Զեյնալը:
«Գյուղացիները դաշտի գործով են զբաղվում: Ինչքան ապրում ենք, էս 25 տարի է՝ եկող գյուղապետն ասում է ջուրը քաշելու եմ»,- հավելեց Ավանես Դարգյանը:
«Սեմուշկա, կուկուռուզ ենք ցանում, այգիներից էլ խաղող և ուրիշ մրգեր ստանում: Մեր առաջնահերթ խնդիրը խմելու ջուրն ա: Բա որ էդ չլինի, էս անապատումը ի՞նչ անենք: Ամեն ընտրության որ թեկնածուն մտնում ա գեղը, սաղ խոստում են տալիս, ով գալիս է՝ ասում է՝ ջուր եմ քաշելու: Ուրա՞: Մեր դարդ ու ցավը դա ա»,- նեղսրտեց Ավանեսը:
«Եթե էդ ոռոգման ու խմելու ջրի հարցը մին լուծեն, դրանից հետո Դեբեդավանում արխեին մարդն իրեն համար կապրի»,- բացատրեց Զեյնալը:
«9 սմ խողովակով 700 մ տնամերձս ջրելու մեկ ժամվա համար 2000 դրամ փող են ուզում, ոնց կլինի սենց: Դավլենի չունի էդ ջուրը: «Հայջրմուղկոյուղին» 2000 դրամ փող ա ուզում՝ 500 դրամի փոխարեն, կարամ ապացուցեմ էլ: Իրա ուզած փողը չես տալի կամ մի բանից դժգոհում ես, ջուրը կորավ: Մեզ վրա ջուրը թանկ ծախում ա, բայց ջուրը հլեն հե գնում է Վրաստան»,- պատմեց Ավանես Դարգյանը:
«Դեբեդավանը 600 բնակիչ ունի, բայց գյուղում ջուր խմելու էս մի աղբյուրն ա»,-հայտնեց աղբյուրից ջուր կրող մի երիտասարդ տղամարդ:
Դեբեդավանը 800 հա հող ունի: Բագրատաշենից դեպի Դեբեդավան գնացող ճանապարհաեզրի պապակած դաշտերը չորից խանձված էին:
Դեբեդավանի այլևս նախկին գյուղապետ Վ. Դամիչյանը գյուղի հիմնախնդիրները լուծելու փոխարեն, համայնքի հազիվ 13 մլն դրամ բյուջեն ծառայեցրել է գյուղապերանի աշխատակազմի և իր աշխատավարձի բարձրացմանը:
Համայնքի ավագանին էլ գյուղապետի առաջարկություններն առանց ծանր ու թեթև անելու 2015թ.-ի դեկտեմբերի 21-ի 21-Ա որոշումով գյուղապետ Վանյա Դամիրչյանի ամսական աշխատավարձը սահմանվել է 220 000 դրամ:
Ավագանու նույն օրվա թիվ 22-Ա որոշումով գյուղապետարանի անգործության մատնված աշխատողներից աշխատակազմի քարտուղարի աշխատավարձը սահմանել է 120 000 դրամ, առաջատար մասնագետի աշխատավարձը՝ 119 հազար դրամ, 1-ին կարգի մասնագետինը՝ 100 հազար դրամ, պարետի և հավաքարարի աշխատավարձը՝ 88 հազարական դրամ:
Ամենազավեշտալին Դեբեդավանի ավագանու նույն օրը ընդունած 24-Ն որոշումն է, ըստ որի գյուղապետարանի իրավասության շրջանակներում տրվող /հաստատվող փաստաթղթերի համար մատուցած ծառայությունների դիմաց/ սահմանել է գյուղացիների փոխհատուցման վճարներ:
Այսպես, համայնքի բնակիչ համարվող անձանց աշխատավարձի և աշխատանքային հարաբերությունների հետ կապված ՝ այլ վճարներ ստանալու, նպաստներ և կենսաթոշակներ, գյուղացիների բանկային ավանդներ ու փոստային առաքումներ (այդ թվում դրամական և ծանրոցային) ստանալու լիազորագիրը հաստատելու համար սահմանվել է 1000 դրամ, գյուղացիներին տրվող յուրաքանչյուր տեղեկանքի համար 200 դրամ, հողերի չափագրման աշխատանքերի համար՝ 1000 դրամ, համայնքի բնակիչ համարվող անձանց տրվող յուրաքանչյուր բնութագրի և երաշխագրի համար՝ 500 դրամ:
Դեբեդավանցիները ասում են, որ իշխանության որևէ խոստման այլևս չեն հավատում:
Մեկնաբանել