«Թատերական Լոռի» միջազգային փառատոնի բացմանը երեկ մշակույթի նախարարությունից ոչ ոք Ալավերդի չէր ժամանել
Երեկ՝ հոկտեմբերի 4-ի երեկոյան, Ալավերդիում մեկնարկեց «Թատերական Լոռի» 23 -րդ միջազգային փառատոնը: Փառատոնը նվիրված էր Հայաստանի անկախության 25–րդ տարեդարձին: Փառատոնին Հայաստանից մասնակցում են Երևանի Հակոբ Պարոնյանի անվան, Պատանի հանդիսատեսի, Հովհաննես Թումանյանի անվան տիկնիկային, Հենրիկ Մալյանի անվան կինոդերասանի, Սոս Սարգսյանի անվան Համազգային, ինչպես նաև Վանաձորի Հովհաննես Աբելյանի անվան դրամատիկական և Ալավերդու քաղաքային թատրոնները:
Թատերական խմբեր են մասնակցելու նաև Թբիլիսիից, Ճապոնիայից և Ռուսաստանի Դաշնությունից: Երեկ փառատոնի բացման հանդիսության ժամանակ նշվեց աշխարհահռչակ կինոռեժիսոր, ՀԽՍՀ և ԽՍՀՄ ժողովրդական արտիստ Հենրիկ Մալյանի ծննդյան 90 և նրա անունը կրող թատրոնի հիմնադրման 35-ամյակը:
լուս.` Վահե Աղամյանի
Ալավերդիում «Թատերական Լոռի» փառատոնի մեկնարկը ողջունեցին քաղաքապետ Կարեն Փարեմուզյանը, Հայաստանի թատերական գործիչների միության նախագահ Հակոբ Ղազանչյանը, ՀՀ-ում ՌԴ արտակարգ լիազոր դեսպան Իվան Վոլինկինը, թատերագետ և արվեստաբան, անցած բոլոր տարիներին փառատոնի ժյուրի նախագահ Հայկազ Երանոսյանը, ալավերդցի Վալերի Պարանյանը և ուրիշներ: Հանդիսավոր արարողությունից հետո Հենրիկ Մալյանի անվան կինոդերասանի թատրոնը ներկայացրեց Աղասի Այվազյանի «Ցեղի ֆիզոլոգիան» ներկայացումը:
լուս.` Վահե Աղամյանի
Թատերասեր ալավերդցիներին ողջունեց Հենրիկ Մալյանի դուստրը` Նարինե Մալյանը: Փառատոնի բացման հանդիսությանը մշակույթի նախարարությունից որևէ ներկայացուցիչ չէր մասնակցում: «Հետքի» հետ զրույցում Հայաստանի թատերական գործիչների միության նախագահ Հակոբ Ղազանչյանը փառատոնը համարեց կարևոր երևույթ. «Փառատոնը կարևոր առիթ է, որպեսզի տարածաշրջանի բնակչությունը առնչվի պրոֆեսիոնալ թատրոնի հետ: Դերասաններին, որոնց շատերին թատերասերները հեռուստատեսությամբ են տեսել, ընդ որում նրանց կտեսնի բազմազանության մեջ, որովհետև գալիս են տարբեր վայրերից, ներկայացնում են տարբեր ժանրեր, տարբեր տեսակի թատրոններ: Եվ ինչու չէ, ուրախ եմ, որ «Թատերական Լոռի» փառատոնը միջազգային է դարձել: Այդ առումով պահանջվում է որպեսզի տարեցտարի շատ ավելի լրջությամբ մոտենանք այս երևույթի նկատմամբ»,-հայտնեց Հ. Ղազանչյանը: Նա փառատոնի միջազգայնացման գործում առանձնահատուկ նշեց փառատոնի կազմակերպիչների դերը: «Նրանք անսահման աշխատասիրությամբ ու եռանդով ուզում են պահել, զարգացնել և միջազգայնացնել փառատոնը»,- ասաց Հ. Ղազանչյանը:
«Թատերական Լոռի» փառատոնի հետ կաված «Հետքը» իր հարցերն է ուղղել փառատոնի տնօրեն Հրաչյա Պապինյանին:
-Ինչ կասեք փառատոնի կազմակերպական աշխատանքերի մասին
- Մենք միշտ մտածել ենք «Թատերական Լոռի» փառատոնի գաղափարի զարգացման մասին: Հիմա եթե փառատոնի պատմությունը նայում ենք, Ակներ գյուղում ծնված փառատոնին 1-ին անգամ 4 գյուղական թատրոնների խմբեր են մասնակցել: Ես նույնպես մասնակցել եմ` Հագվի գյուղի փոքր թատերախմբով: Երկու տարի հետո փառատոնը հասցվեց Ալավերդի ու դարձավ Հայաստանի ժողովրդական թատրոնների փառատոն: Մի քանի տարի հետո այն դարձավ համամիութենական փառատոն: Այդ ժամանակ փառատոնին մասնակցելու էին գալիս խորհրդային միության հանրապետություններից: Փառատոնը չի ընդհատվել անգամ անցյալ դարի 90-ականների դժվարին ժամանակներում: Այն 2006 թվականից պրոֆեսիոնալ թատրոնների փառատոն էր, իսկ արդեն 2008 թվականից անց ենք կացրել որպես միջազգային փառատոն: Հետագայում գնալով միջազգային թատերախմբերի քանակը ավելացավ: Այդ ժամանակ մտածեցինք, այսքան թատրոնները բերել, հասցնել Հայաստան և միայն Ալավերդիում ներկայացնել, ճիշտ չի լինի և մենք մտածեցինք փառատոնը ընդարձակելու մասին: Փառատոնում ընդգրկեցինք Ալավերդի, Սպիտակ, Վանաձոր, Ստեփանավան և Նոյեմբերյան քաղաքները: Այսուհանդերձ , ինչպես նկատում եք, փառատոնի օջախը Ալավերդին է, ժյուրին այստեղ է աշխատում, բացման և փակման արարողությունները Ալավերդիում են կատարվում: Բոլոր թատրոնները իրենց ներկայացումները գրեթե անխտիր առաջին հերթին Ալավերդիում են խաղում, ապա, եթե թատերական խմբերը ցանկություն են հայտնում, առաջարկում ենք խաղալ մարզի այլ քաղաքներում: Այս տարի Սպիտակում և Ստեփանավանում` 2, Վանաձորում՝ 4 և մեկ ներկայացում լինելու է Նոյեմբերյանում: Այսինքն, այնպես չէ, որ փառատոնը անց է կացվում միայն Ալավերդիում: Հետագա փառատոների համար կամաց-կամաց նախապատրաստում ենք Ալավերդու դահլիճները: Այս տարի քաղաքապետարանի օգնությամբ բավականին մեծ աշխատանք արեցինք Ս./Սարահարթ թաղամասի մշակույթի պալատում: Եթե մենք կարողանանք կապիտալ նորոգել և տեխնիկական պայմաններ ստեղծել, այսուհետ փառատոնը կտեղափոխվի այդ շենք: Այս տարի փառատոնին հրավիրված էր և մեծ սիրով ցանկանում էր գալ Ալավերդի Թբիլիսի Կ.Մարջանաշվիլու անվան թատրոնը՝ մի հրաշալի ներկայացումով: Ցավոք, նորից տեխնիկական պայմանների պատճառով մենք չկարողացանք նրանց ընդունել:
- Ինչ աջակցություն են ապահովվել փառատոնին մասնակցող համայնքները:
- Որոշակի աջակցություն կա: Ընդգրկված համայնքներում անվճար և անհատույց դահլիճներ են տրամադրվում: Վանաձորում, Սպիտակում, Ստեփանավանում, Նոյեմբերյանում ներկայացումներ տալու դեպքում թատերական խմբերի սննդի հարցը տեղում է լուծվում: Նախորդ տարի ավելի մեծ աջակցություններ է եղել, հիմա այս տարի, գիտեք, տնտեսական ճգնաժամ էր, որոշակի խնդիրներ բոլոր համայնքներում կար: Փառատոնի նախապատրաստական աշխատանքերի ժամանակ Վանաձորում նախընտրական կրքեր էին: Սակայն վերջին պահին դահլիճները, հրավիրատոմսերը, փառատոնի մասին բնակիչներին տեղեկացնելը կարգավորվեց: Մենք միշտ աշխատել ենք ֆինանսական հարցերում փառատոնի ժամանակ տեղական համայնքերին նեղություն չտալ: Անցյալ տարի դրամաշնորհների տեսքով ֆինանսները դրսից ենք հայթայթել: Փառատոնի ժամանակ մենք նպատակ ունենք խթանել զբոսաշրջության զարգացմանը: Այս փառատոնին 100-ից ավելի պատվիրակների ենք սպասում: Վստահ եմ, որ նրանց մեծ մասը 1-ին անգամ են լինելու Հայաստանում: Օրինակ գալիս է Վախթանգովի անվան ռուսական պետական դրամատիկական, Ճապոնիայի Սայտամա քաղաքի ԻՏՈ-ԳՈՒՄԻ թատրոնները: Փառատոնը, վստահ եմ, մարդկանց մեջ լավ վերաբերմունք է ստեղծելու Հայաստանի նկատմամբ: Բացի այդ մարդիկ մարզի համայնքերում, մասնավորապես Ալավերդու հյուրանոցներում, խանութներում գումարներ են ծախսում: Ինչ-որ չափով փառատոնը Ալավերդիում խթանում է բիզնեսի զարգացմանը: Փառատոնի այս տարվա գլխավոր հովանավորը Ալավերդու քաղաքապետարնն էր, ապա մշակույթի նախարարությունը: Կա ֆինանսական աջակցություն նաև Լոռու մարզպետարանի կողմից:
- Փառատոնի բացմանը մշակույթի նախարարությունից ներկայացուցիչ չէր մասնակցում, ինչով կբացատրեք դա:
- Ես զարմացած եմ, որովհետև նախնական պայմանավորվածությամբ մենք փառատոնի ծրագիրն ուղարկել էինք նախարարություն և սպասում էինք: Ինձ ոչ ուղղակիորեն տեղեկացրել են, որ մշակույթի նորանշանակ նախարար Արմեն Ամիրյանը պետք է մասնակցեր փառատոնի բացմանը: Գոնե ժամանակակից արվեստի վարչության ներկայացուցիչները կլինեին, սակայն մասնակցություն չեղավ: Ես դեռևս որևէ բացատրություն չունեմ:
- «Թատերական Լոռի» փառատոնի շրջանակներում ինչ հոբելյարներ պետք է նշվեն:
- Փառատոնի շրջանակներում հանդիսույթներ են լինելու ժողովրդական արտիստ Ալեքսանդր Գրիգորյանի ծննդյան 80-ամյակի և ժողովրդական արտիստ Հրաչյա Գասպարյանի ծննդյան 70-ամյակների առթիվ: «Թատերական Լոռի» փառատոնի փակումը տեղի կունենա հոկտեմբերի 13-ին:
Առաջին լուսանկարը` Վահե Աղամյանի
Մեկնաբանություններ (4)
Մեկնաբանել