HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Քաղաքապետը քաղաքացիների գրավոր դիմումներին պատշաճ չի պատասխանում, պարտադիր հրապարակման ենթակա տեղեկատվության համար էլ լրագրողից գրավոր դիմումներ է պահանջում

Ալավերդու Ս/Սարահարթ թաղամասի 3/3 շենք 36 բնակարանի վարձակալ Աննա Ալեքսանյանը այս տարվա հունվարի 18-ին իր բնակարանի տանիքի վերանորոգման հարցով գրավոր դիմում է գրել քաղաքապետ Կարեն Փարեմուզյանին: Աննան առ այսօր քաղաքապետին 10 ամիս առաջ ուղղված դիմումի պատասխանը չի ստացել:

Աննա Ալեքսանյանը

Աննայի ամուսինը՝ Արարատ Մնացականյանը, 2-րդ խմբի հաշմանդամ է, 30 հազար դրամ թոշակ է ստանում: Որպես անկողնային հիվանդ ամուսնու խնամակալ` Աննան 11 հազար դրամ նպաստ է ստանում: «Ամուսնուս համար ամեն ամիս 48 հազար դրամի դեղ եմ առնում, այս դեպքում իմ ձեռքին գումար չի մնում մեր սննդի հարցը հոգալու, հարազատներս են օգնում: Որտեղ դիմում եմ աշխատանքի հարցով, ասում են՝ մեծ ես, չեն ընդունում»,- ասում է Աննան:

Ստեղծված վիճակում ամուսինները չեն կարողանում վերանորոգել իրենց` 5-րդ հարկում գտնվող բանակարանի տանիքը և տարիներ շարունակ  ապրում են առաստաղի կաթոցների տակ: Նրանք  կաթոցների պատճառով չեն օգտագործում բնակարանի  մեծ պատշգամբը և ճաշասենյակը:

««Անկյուն+3» հեռուստատեսությամբ լսեցի, որ բնության պատճառած արհավիրքի հետևանքով վնասված տանիքները վերանորոգելու համար պետության կողմից քաղաքապետարանին գումար է հատկացվել: Ես Կարեն Փարեմուզյանին հունվարի 18-ին դիմում գրեցի՝ ինձ էլ շիֆեր հատկացնելու մասին»,- ասաց Ա. Ալեքսանյանը:

Վերջինիս խոսքով` դիմումը հանձնելիս քաղաքապետը խոստացել է հանձնաժողով ուղարկել տան տանիքի վիճակը ուսումնասիրելու: Կ. Փարեմուզյանը խոստացած հանձնաժողովը չի ուղարկել, ավելին` չի պատասխանել նաև քաղաքացու դիմումին:

Քաղաքապետարանից հեռախոսով «Հետքին» պատասխանեցին, որ բնակիչ Ա. Ալեքսանյանի դիմումը հունվարի 18-ին քաղաքապետի կողմից մակագրվել է քաղաքապետարանի բնակֆոնդի պատասխանատու Զավեն Շահմուրադյանին: Ըստ քաղաքապետարանի գործավարի` Զ. Շահմուրադյանը Աննա Ալեքսանյանի դիմումին պատասխանել է, թե իր բնակարանի տանիքը վերանորոգելու համար շիֆեր է հատկացվել Ս/Սարահարթ թաղամասի թիվ 2 ԲՇՏ-ին:

Թե որ ամսաթվով է Ա. Շահմուրադյանը պատասխանել Աննա  Ալեքսանյանի դիմումին, պարզվեց` քաղաքապետարանի դիմումների գրանցման գրքում գրանցված չէ: «Հետքի» հարցմանը թիվ 2 ԲՇՏ-ի պետ Ֆրունզիկ Ռամազյանը պատասխանեց, որ տեղյակ է Աննա Ալեքսանյանի տանիքի խնդրին. «Անձամբ բարձրացել եմ նրա տան տանիքը: Ես չեմ կարող օգնել ոչ մի բանով, ոչ շիֆեր ունեմ, ոչ մեխ: Իմ ձեռքից ինչ է գալիս, թող շիֆերով օգնեն, ես էլ ամրացնեմ: Ես մենակ կոյուղի եմ մաքրում: Հիվանդ էլ ամուսին ունի, ես ի՞նչ կարամ անեմ: Ցուցակը Զավեն Շահմուրադյանի ձեռքին է»,- պարզաբանեց ԲՇՏ-ի պետը: 

Զավեն Շահմուրադյանն էլ մեզ բացատրեց, որ Աննա Ալեքսանյանի դիմումին գրավոր պատասխանել է կառավարության կողմից հատկացված շիֆերը բաշխելուց հետո: Թե երբ է պատասխանել դիմումին՝ Զ. Շահմուրադյանը չհիշեց: Աննայի ասելով` մայիս ամսին իրենց շենքի մոտ հանդիպել է Կ. Փարեմուզյանին և հիշեցրել իր տան տանիքի մասին. «Ասացի` հունվարին դիմում եմ գրել, ի՞նչ եղավ իմ տանիքի հետ կապված խնդիրը»: «Բյուջե չունենք: Բյուջեով ինչքան հնարավոր է, այդքան տանիք վերանորոգել ենք»,- պատասխանել է Կարեն Փարեմուզյանը: Ասել է նաև, թե սպասում են տանիքների հաջորդ ֆինանսավորմանը: Հոկտեմբերի 25-ին Աննան կրկին տանիքի հարցով դիմել է քաղաքապետ Փարեմուզյանին. «Ինձ պատասխանեց՝ գնա, որտեղ ուզում ես բողոքի, ես ոչինչ չեմ կարող անել»:

«Առաստաղի կաթալու պատճառով ամբողջ բնակարանս քանդվել է: Էս ամառ բերեցին 35 հատ շիֆեր միանգամից տվեցին մեր շենքի վերջին շքամուտքի 5-րդ հարկի բնակիչ Ամալյա Ղարդյանին, ես մտածեցի այդ շիֆերից ինձ էլ կտան, ինձ ասեցին՝ ոչ, Ձեզ շիֆեր չենք տալու»,- պատմեց Աննան: «Մենք Ամալյա Ղարդյանին ամռանը հատկացրել ենք ընդամենը 15 շիֆեր, մնացած 20 շիֆերը իրենք են գնել»,- բացատրեց Զավեն Շահմուրադյանը:

Շողիկ Վարդանյանը

Շողիկ Վարդանյանը 5 անձից կազմված ընտանիքով  արդեն 12 տարի ապրում է  Ս.Սարահարթի 3/3 շենքի 35 բնակարանում: Տան սեփականատերը Շողիկի ամուսինն է՝ Խաչատուր Հախինյանը: «Ես իմ տանիքի վիճակի մասին միշտ բողոքել եմ, ուղղակի տեղ չի հասել: Ինչ տեղափոխվել ենք այս բնակարան  տանիքը անընդհատ կաթացել է: Ու անընդհատ  մենք մեր ուժերով վերանորոգել ենք՝ որքան հնարավոր է եղել: Մենք վերանորոգում ենք, մի փոքր ժամանակ չի կաթում, նորից սկսում է կաթալ: Ես տնային կառավարչությանը շատ եմ դիմել։ Տնային կառավարիչ Ֆրունզիկ Ռամազյանն ասաց՝ մի բան կանենք, ու էդպես էլ ոչինչ չարեցին»,-հայտնեց Շողիկը:

Խաչատուր Հախինյանի բնակարանի տանիքը կաթում է նաև  բնակարանին հարող, մինչև շենքի տանիք հասնող  հսկա բարդիների պատճառով. «Բնակարանիս  ճաշասենյակի առաստաղը, որ կաթում է, այդ ծառերի հետևանքն է, քամիներից ծառերը թեքվում, խփում են տանիքի շիֆերներին և ջարդում այն»:

Քամիների ժամանակ ճոճվող բարդիները հարվածում են նաև Շողիկի տան պատուհաններին և ջարդում ապակիները: «Այդ ծառերի վտանգների մասին ես դեռ 2008թ.-ին գրավոր հայտնել եմ Ալավերդու նախկին քաղաքապետ, ներկայումս Լոռու մարզպետ Արթուր Նալբանդյանին: Երեք բարդիներից մեկը քամիներից կոտրվել և ընկել է շենքին գազ մատակարարող խողովակի վրա և կոտրել այն»:

Շողիկը պահում է 8 տարի առաջ ամուսնու դիմումին Ա. Նալբանդյանի տված գրավոր պատասխանը. Քաղաքապետարանը թույլատրում է շենքի բնակիչների ուժերով կատարել ծառերի էտում: Վերջինս միաժամանակ բնակիչներին հանձնարարել է բակը կտրված ճյուղերից մաքրել և ծառերի փայտը հատկացնել շենքի անապահով ընտանիքներին՝ որպես վառելափայտ: Նախկին քաղաքապետի հանձնարարությունն էլ չի կատարվել, քանի որ 3/3 շենքի բնակիչներից մեկը չի թույլատրել կտրել ծառերը. «Ասաց՝ ծառը կտրեք, փայտն ինձ տվեք: Ծառը իմ ամուսինն է գցել: Ծառ կտրողն էլ փայտի համար այդ կնոջից պահանջել է 15 հազար դրամ: Կողմերը համաձայնության չեն եկել: Իսկ մինչ այդ Շողիկի պատշգամբին հարող երկու հսկա բարդիները քամիներից շարունակում են հարվածել նրա տան տանիքի շիֆերներին ու ապակիներին և ջարդում դրանք:

Ալավերդի համայնքի ավագանին այս տարվա հունիսի 16-ի N 32-Ա որոշմամբ հաստատել է համայնքի 2017թ.-ին պետբյուջեից նպատակային հատկացումներ (սուբվենցիաներ) ստանալու նպատակով հայտավորվող ծախսային ծրագրեր՝ 332 մլն 412 հազար դրամ գումարով: Քաղաքապետարանը այդ ծրագրերից մեկով կառավարությանը հայտ է ներկայացրել քաղաքի բազմաբնակարան շենքերի տանիքների նորոգման համար: Ծրագրով նախատեսվում է քաղաքապետարանի բնակֆոնդի հաշվեկշռում հաշվառված 183 բազմաբնակարան շենքերից նորոգել 23-ին տանիքները: Ծրագրի իրականացման համար քաղաքապետարանը կառավարությունից 2017թ.-ին ակնկալում է 239 մլն. 522 հազար դրամ: Եթե կառավարությունը գթասիրտ լինի և 2017թ.-ին քաղաքապետարանին  հատկացնի պահանջված սուբվենցիան, ապա կվերանորոգվեն Ալավերդու Դեբեդ փողոցի 6,10, Էնգելսի 18, Զորավար Անդրանիկի 36, Խուդյակով 8, Սայաթ-Նովա 5,7, Ջրավազանի 2,60,69, Սանահին կայարանային թաղամասի 17, Մարտի 8-ի 1, Ս./Սարահարթի 1/6, 1/7, 1/17, 1/18, 2/10, 2/14, 3/3, 3/4, 3/5, 3/8, 3,10 շենքերի թեք տանիքները: 

Մեզ չհաջողվեց քաղաքապետարանից պարզել, թե վերջին տարիներին Ալավերդու բնակֆոնդում հաշվառված 183 բնակելի շենքերից քանիսի տանիքն է վերանորոգվել: «Քաղաքապետը արգելեց, ասաց, որ միայն Ձեր գրավոր դիմումից հետո կարող ենք հայտնել Ձեր պահանջած տեղեկատվությունը»,- հայտնեց քաղաքապետարանի բնակֆոնդի պատասխանատու Զավեն Շահմուրադյանը:

Ալավերդու քաղաքապետ Կարեն Փարեմուզյանը դեռև տեղյակ չէ, որ պարտավոր է ապահովել «Տեղական ինքնակառավարման մասին» ՀՀ օրենքի 9-րդ հոդվածի 9 կետով սահմանված տեղական ինքնակառավարման մարմինների գործունեության հրապարակայնությունը և թափանցիկությունը: Եւ պահանջվող տեղեկատվությունը քաղաքապետարանը վաղուց պետք է հրապարակեր, որպեսզի յուրաքանչյուր ալավերդցի կարողանար տեսնել, թե ինչպես են ծախսվել համայնքի գումարները։ Հիշեցնենք, որ քաղաքապետարանի կայքից ամիսներ առաջ հանվել են նաև համայնքի ավագանու որոշումները: Դրանք ստանալու համար քաղաքապետը  նույնպես գրավոր դիմում է պահանջում լրագրողից:

Գլխավոր լուսանկարում` Ալավերդու քաղաքապետ Կարեն Փարեմուզյանը

Մեկնաբանություններ (4)

Արմենակ Եղիայեան
Նման անհոգ, անխիղճ ու վարնոց պետական պաշտօնեաներով ինչպէ՞ս կարելի է հայրենիք կերտել ու պահպանել: Հայն ու Հայաստանը բնաւ օտար թշնամիի պէտք չունին. իրենց ներքին թշնամիները լայնօրէն բաւարար են կործանելու համար մեր երկիրը:
Լաուրա
Ախր որ իմանա ինչ եք ուզում ասի `կասի,բայց որ չգիտի` ինչ ասի:
Վազգեն
Քանի որ ինքը նշանակովի քաղաքապետա,քաղաքացիների առաջ պարտավորություններ չունի ու քաղաքացիներն ու լրագրողները դեռ շատ երկար են սպասելու դիմումների պատասղաններին:
Ռուբեն
Իսկ ձեզ չի՛թվում,որ մենք ավելի շուտ անտառապետ ենք ընտրել,քան՝քաղաքապետ...

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter