HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Էդիկ Բաղդասարյան

Ոստիկանները կավատների տանիք կամ ինչպես են վաճառում հայ կանանց

Էդիկ Բաղդասարյան, Արփինե Հարությունյան 

«Ինձ խաբեց իմ ընկերուհին` Արմենուհին: Խոստացավ լավ վարձատրվող աշխատանք Արաբական Էմիրություններում: Ես էլ մեկնեցի: Այնտեղ ինձնից վերցրեց իմ անձնագիրը, ստիպեց մարմնավաճառությամբ զբաղվել, որպեսզի իր համար փող աշխատեմ»,- ասում է վանաձորցի Նարինե Կարապետյանը (հոդվածի մեջ «զոհերի» անունները փոխված են): 

34-ամյա Նարինեն բնակվում է Վանաձորում: Վանաձորն իր մեծությամբ եւ բնակչության թվով Հայաստանի երրորդ քաղաքն է: Գտնվում է Հայաստանի հյուսիս-արեւելքում` Երեւանից 120 քմ հեռավորության վրա: Պաշտոնական տվյալներով` այստեղ ապրում է 120 հազար մարդ: Տարեկան 30-40 հազար տղամարդ մեկնում է արտագնա աշխատանքի: Ոչ պաշտոնական տվյալներով` քաղաքում մարդկանց թիվն այսօր չի գերազանցում 50 000-ը: 1988թ. երկրաշարժն ավերեց քաղաքի մեծ մասը, քայքայվեց տնտեսությունը: Զոհվեց 800-ից ավելի մարդ, տասնյակ հազարավորները մնացին անօթեւան եւ գործազուրկ: 

Նարինեին հանդիպեցինք Վանաձորի ծայրամասերից մեկում գտնվող իր բնակարում: Երբ Արաբական միացյալ էմիրություններից վերադարձավ, ոչ ոք նրան չընդունեց: Ստիպված` վարձեց մի սենյականոց բնակարան ու մինչ այսօր երկու անչափահաս որդիների հետ այնտեղ է ապրում: Տանն ընդամենը մանկական մի աթոռ էր ու սեղան: Նստում են գետնին հարմարեցված անկողնու ներքնակին: Բնակարանի ջերմաստիճանը դրսից ցածր է. չեն տաքացնում: Վարձը չվճարելու պատճառով ամիսներ շարունակ տոնը հոսանքազրկվել է: Ծանոթներից պարտքով փող է վերցնում, հաց գնում:

Ամուսինը սպանվել է Ռուսաստանում: Նարինեի մայրը մեզ պատմեց, որ նա գողություն էր արել ու փախչել Վանաձորից: Ռուսաստանում գտնվելու տարիներին երբեք չի օգնել ընտանիքին, Նարինեն հարազատների օգնությամբ է պահել երեխաներին: Որպես վաճառողուհի` աշխատել է Վանաձորի խանութներից մեկում: Բայց աշխատավարձը չի բավարարել ընտանիքի կարիքները հոգալուն: Հետեւել է ընկերուհու` Արմենուհու խորհրդին. մեկնել է Արաբական միացյալ էմիրություններ հույս ունենալով աշխատել որեւէ խանութում կամ սրճարանում եւ հարստացած վերադառնալ: «Արմենուհին իմ մանկության ընկերուհին էր: Ես իրեն միշտ վստահել եմ, ինքն ինձ շատ լավություններ է արել: Մտքովս անգամ չէր անցնում, որ իմ հետ այդպես կվարվի»,- ասում է Նարինեն: Նա չի իմացել, որ ընկերուհին Էմիրություններում զբաղվում է մարմնավաճառությամբ: Արմենուհին ասել է, թե կարուձեւ է անում:

2001թ. գարնանը Արմենուհին Վանաձորից մեկնել է Էմիրություններ, այնուհետեւ հուլիս ամսին իր մոտ տարել նաեւ Նարինեին ու ոմն Օֆելյայի: Նարինեն տղաներին թողել է ծանոթներից մեկի` Ռ. Բ.-ի մոտ եւ մեկնել: Օդանավակայանից նրանց ճանապարհել է Արմենուհու եղբայրը` Արտակ Սիմոնյանը: Արաբական Միացյալ Էմիրություններում Արմենուհին դիմավորել է Նարինեին եւ հենց օդանավակայանում վերցրել անձնագիրը: «Արմենուհին ինձ ասեց, որ պիտի մարմնավաճառությամբ զբաղվեմ, թե չէ կմնամ էնտեղ ու «կփտեմ»: Նա ինձ ասաց, որ 10 000 դոլար պետք է տամ իրեն, որպեսզի ետ ստանամ անձնագիրս: Իսկ Օֆիկին տեղավորեց ինչ-որ սրճարանում»,-պատմում է Նարինեն: Աբու Դաբի քաղաքի Լոնդրի Բիլդինգ կոչվող շենքում Արմենուհին բնակարան էր վարձել: Մոտ 8 ամիս Նարինեն զբաղվել է մարմնավաճառությամբ` 1 ժամի համար վճարվելով մինչեւ 200 դոլար: Օրական ընդունել է 6-7 տղամարդ: Նրա հետ շատ դաժան են վարվել, ծեծել են, հարկադրաբար աշխատեցրել անգամ վատառողջ ժամանակ: Որպես կանոն` Արմենուհին հաճախորդներից նախապես վերցրել է փողը` ասելով, թե վերջում կկիսվեն: Նարինեի պատմելով` միայն ինքը նման վիճակում. Էմիրություններում բազմաթիվ հայ աղջիկներ կան, նույնիսկ 16-17 տարեկաններ: Այնտեղ գտնվելու ժամանակ Նարինեն պարբերաբար փող է ուղարկել երեխաներին` ութ ամսվա ընթացքում մոտ 1250 դոլար:

«Ես այլեւս չէի կարողանում էնտեղ մնալ, ես ապրանքի դեր էի տանում, կարծես ստրուկ լինեի:Շատ անգամներ արաբ տղամարդիկ տեսնում էին, որ լացում եմ, ինձ չէին կպչում, խղճում էին»,-հիշում է Նարինեն: Մի օր էլ Նարինեն, պատահմամբ ներքնակի վրա կարեր տեսնելով, քանդել է եւ միջից գտել իր անձնագիրը: Վերցրել է այն ու Արմենուհուց պահանջել աշխատած գումարը, որպեսզի վերադառնա Վանաձոր: Արմենուհին հրաժարվել է որեւէ գումար տալ: Նարինեին օգնել է մի արաբ տղամարդ: Նրա համար տոմս է գնել եւ 2002թ. ապրիլ ամսին ուղարկել Հայաստան: Երեւանի օդանավակայանում Նարինեին դիմավորել են Արտակ Սիմոնյանը, Հովիկ Վարդանյանը (Վանաձորի ոստիկանության աշխատակից) եւ Հովիկի եղբայր Հենոն: Վանաձոր վերադառնալուց մի քանի օր անց ոստիկանության աշխատակիցներ Հովիկն ու Գագիկը Նարինեին տարել են Ռոբերտ Կարապետյանի (մականունը` Ռեմբո) մոտ: Վերջինս Վանաձորի ոստիկանության բաժանմունքում օպեր է:

«Ռեմբոն բարկացած հարցրեց, թե ինչի չեմ ներկայացել իրեն ու արդյոք չգիտեմ, որ Էմիրաթներից եկած աղջիկներով ինքն է զբաղվում: Հետո էլ սպառնաց, թե ինձ կզրկի մայրական իրավունքներից, եթե դիմում չգրեմ իր թելադրանքով ու 500 դոլար չտամ իրեն: Ես էլ գրեցի այն ամենի մասին, ինչ պատահել էր ինձ հետ Էմիրություններում»,-ասում է Նարինեն: Դիմումի մասին Նարինեն տեղեկացրել է Արտակին` Արմենուհու եղբորը, պահանջել, որ քույրը վերադարձնի իր պարտքը` 8 750 դոլար: Արտակը Նարինեին է տվել 200 դոլար` պայմանով, որ մնացածը հետո կտա: Նարինեի ասելով` Արտակը ստորագրել է, որ գումարը տրվում է սեռական շահագործման ենթարկելու համար: Այնուհետեւ Արտակը խորհրդակցել է Ռոբերտ Կարապետյանի հետ` պարզելու համար իր հետագա անելիքները: Ռ.Կարապետյանն էլ կրկին սպառնացել է Նարինեին, որ Արտակին այլեւս չանհանգստացնի, եւ որ Արմենուհին պարտք չէ: Նարինեի կարծիքով` այս պատմության ետեւում նախեւառաջ կանգնած է ոստիկանության աշխատակից Ռոբերտ Կարապետյանը: «Ռեմբոն ինձ ասեց, որ ինքն է այդ գործի տերը ու պետք է մշտապես իրեն դիմեմ: Ռեմբոն ամեն ինչի մասին տեղյակ էր, գիտեր, որ Արմենուհին ինձ մեծ գումար է պարտք, դրա համար էլ ուզում էր իմ միջոցով փող աշխատել»,-մեկնաբանում է Նարինե Կարապետյանը: 

Հայաստան հասնելուն պես Նարինեն իր հետ կատարվածի մասին տեղեկացրել է ոչ միայն իրավապահ մարմիններին, այլ նաեւ ՀՀ արտգործնախարարությանը: Արտաքին գործերի նախարարությունից 17.06.03 թ. ստացել է հետեւյալ գրությունը. «Ի պատասխան Ձեր ս.թ. հունիսի 3-ի դիմում-նամակի տեղեկացնում ենք, որ ըստ ՀՀ պետական մարմիններից ստացված տեղեկատվության` Լոռու մարզային եւ Տրանսպորտային վարչությունների աշխատակիցների համատեղ ձեռնարկված միջոցառումների շնորհիվ պարզվել է հետեւյալը.

Վանաձորի բնակիչներ Արմենուհի Հրաչիկի Սիմոնյանը եւ իր եղբայր Արտակ Հրաչիկի Սիմոնյանը 1990-2003թթ. ընթացքում հավաքագրել եւ սեռական շահագործման նպատակով Արաբական միացյալ էմիրություններ են տեղափոխել մի շարք կանանց, այդ թվում` Վանաձոր քաղաքի բնակչուհիներին: 

Արտակ Սիմոնյանի վերաբերալ նախապատրաստված նյութերը ուղարկվել են ՀՀ Գլխավոր դատախազություն: Ներկայումս ձեռնարկվում են միջոցառումներ Արմենուհի Սիմոնյանին հայտնաբերելու ուղղությամբ»: 

Նարինեն հիմա չի աշխատում: Ամիսներ առաջ աշխատել է հացի փռում: Ազատվեց աշխատանքից, քանի որ աշխատավարձը ցածր էր, իսկ առողջությունը` լրիվ քայքայված: Նրա երիկամները էմիրություններում շարքից դուրս են եկել: Երեխաները մեկ ու կես տարի դպրոց չեն գնացել. դասագրքեր, գրենական պիտույքներ, հագուստներ չունեն: Նրանցից երես են թեքել բոլոր հարազատները: «Ես գիտակցում եմ, որ իմ աղջկան խաբել են: Բայց, անկախ ամեն ինչից, ես չեմ կարող ներել նրան, քանի որ մեզ չլսեց, հետո էլ շարունակեց անբարո կյանքը»,- ասում է Նարինեի մայրը` տիկին Հասմիկը: 

Նարինեն իր իրավունքները պաշտպանելու խնդրանքով դիմել է նաեւ տարբեր միջազգային կառույցների: Վերջիններս խոստացել են օգնել նրան: «Ես ամեն գնով պիտի պայքարեմ, որ Արմենուհին վերադարձնի իմ աշխատած գումարը` 8750 դոլարը: Ինքը շատ մեծ փողերի հետ է խաղում, ու դրանից օգտվում են մեր ոստիկանության աշխատակիցները»,- պնդում է Նարինեն: 

 Այս փաստի առթիվ հարուցված է քրեական գործ որով, զբաղվում է ՀՀ գլխավոր դատախազությունը: Կավատ Արմենուհին սովորաբար տարին մի քանի անգամ գալիս էր Հայաստան: Սակայն Նարինեի` իրավապահ մարմիններին դիմելուց հետո նա այլեւս Հայաստան չի եկել: Արդեն երրորդ տարին է: Նրա այստեղի գործընկերները զգուշացրել են քրեական գործի մասին: Իրավապահ մարմիններին հայտնի է նրա գտնվելու վայրը, Հայաստանում նրան օժանդակողների, իրավապահ մարմինների այն աշխատակիցների անունները, ովքեր հավաքագրել են եւ սեռական շահագործման նպատակով Արաբական էմիրություններ են ուղարկել Նարինեին ու բազմաթիվ այլ հայ աղջիկների: 

Բացի Նարինեից, Ա.Սիմոնյանի կավատության զոհ են դարձել վանաձորցի այլ կանայք: Նրանք բոլորն էլ վախենում են որեւէ բան պատմել, հրաժարվում են հանդիպումներից: Տուժած կանանցից մեկի մայրն ասաց, որ իր աղջիկը հոգեկան խանգարումներ ունի եւ չի կարող խոսել: Օֆելյան, որ Նարինեի հետ մեկնել էր Էմիրություններ, համաձայնեց զրուցել: Սակայն Վանաձորում մեզ հետ խոսեց Օֆելյայի աղջիկը: «Դատախազության քննիչ Արմեն Թամազյանն ասեց, որ դուք լիազորված չեք մեզ հանդիպել: Իմ մայրը Ձեզ որեւէ բան չի պատմի: Փաստաբաններն էլ նույն խորհուրդը մեզ տվեցին»,- ասաց նա:

Շարունակելի

Մեկնաբանություններ (1)

Andranik
1000 amot ayn hayen vor er azge anmegh aghjekneren kcakhe esh Araben hanun poghen, nman mardkanc petke gndakaharel hanrapetutyan hraparakum vor das lene meusnere hamar. kecce hetq lragroghneren vor jank chen khnayum eraknutyunen grelu hamar yev Hay azgen teghyak pahelu hamar.

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter