HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Գրիշա Բալասանյան

Հրատապ ծրագրեր. հակակարկտային կայաններից մինչև վազքուղի

Արմավիրի մարզում առաջնահերթ լուծում պահանջող խնդիրների լուծման նպատակով կառավարությունը 2016թ. մարզին երեք տարբեր որոշումներով հատկացրել է մոտ 150 միլիոն դրամ: Գումարի մեծ մասը հատկացվել է հակակարկտային կայանների ձեռքբերման համար:

Նախորդ տարի միայն 17 համայնքում 34 հակակարկտային կայան է տեղադրվել: Պայմանագրերը կնքվել են «Բարվա» ՍՊԸ-ի հետ, դրանց ընդհանուր գինը կազմում է 97 միլիոն 600 հազար դրամ:

«Հետքն» անդրադարձել էր, որ հակակարկտային կայանները մարզում գրեթե չեն պաշտպանում բերքը կարկտահարությունից: Տարածքներ կային, որ 100%-ով վնասվել էին, թեև տարածքում տեղադրված է եղել հակակարկտային կայան:

Մայիսի 12-ի, 18-ի, 23-ի, հունիսի 4-ի և 5-ի, 22-ի կարկտահարության հետևանքով տուժել էր մարզի 26 համայնքի 6795 հողօգտագործող: Վնասվել էր 5254,611 հեկտար հողատարածություն՝ 40-100%: Վնասի չափը կազմել էր 10 միլիարդ դրամ:

22 հազար տոննա բերքի կորուստով 3 միլիարդ 15 միլիոն դրամի վնաս կրել էր 2015-ին, 25 միլիարդ 268 միլիոն դրամի վնաս՝ 2013թ-ին:

2016թ. մայիս ամսի ուժեղ քամիներն ու տեղացած կարկուտը փոխել են կառավարության ծրագրերը: Այդ վնասների հետևանքները վերացնելու համար հունիսին Արմավիրի մարզպետարանին հատկացվել է 51 միլիոն դրամ, որից 3 միլիոն դրամ՝ Փարաքարի համայնքի հիմնական դպրոցի շենքի տանիքի վերանորոգման համար: Արմավիրի մարզպետարանից «Հետքին» տեղեկացրել են, որ նախագծահաշվարկային փաստաթղթերի մշակման համար 67,500 դրամ արժողության պայմանագիր է կնքվել «ՍՏ ԱՐՏ» ՍՊԸ-ի հետ: Վերջինս 20 հազար դրամով իրականացրել է նաև հեղինակային վերահսկողություն: Իսկ վերանորոգման աշխատանքների կատարման համար մոտ 1 միլիոն 697 հազար դրամի պայմանագիր է կնքվել «Լուսագանձ» ՍՊԸ-ի հետ: Տեխնիկական հսկողությունն էլ իրականացրել է անհատ ձեռնարկատեր Ղուկաս Սարգսյանը՝ 55 հազար դրամով:

Տանձուտի համայնքի մանկապարտեզի վերանորոգման նախագծանախահաշվային փաստաթղթերի ձեռքբերման համար հատկացվել է 1,5 միլիոն դրամ: Սակայն մրցույթում հաղթող ճանաչված անհատ ձեռնարկատեր Սերյոժա Մկրտչյանն այդ աշխատանքներն իրականացրել է մոտ 1 միլիոն 121 հազար դրամով:

Իսկ Դողս համայնքի միջնակարգ դպրոցի շենքի տանիքի ընթացիկ վերանորոգման համար հատկացվել էր 500 հազար դրամ: 10 միլիոն դրամ էլ հատկացվել էր Արտաշարի համայնքին՝ МТЗ-82 մակնիշի գյուղատնտեսական տրակտորի ձեռքբերման համար:

Էջմիածին քաղաքի թիվ 7 դպրոցի մարզադահլիճի տանիքի, վնասված պատուհանների և դռների վերանորոգման նպատակով մարզպետարանին հատկացվել էր 15 միլիոն դրամ: «Իմպերիալ Տուր» ընկերության հետ կնքվել է 12 միլիոն 798 հազար դրամի վերանորոգման աշխատանքների կատարման պայմանագիր: 250 հազար դրամով տեխնիկական հսկողության աշխատանքներն իրականացրել է դարձյալ Ղուկաս Սարգսյանը, իսկ 86 հազար դրամով հեղինակային հսկողությունը՝ Սերյոժա Մկրտչյանը:

Նախորդ տարի 20 միլիոն դրամ է հատկացվել նաև Վաղարշապատ քաղաքի նոր կառուցվող մարզադպրոցի տարածքում ֆուտբոլի մարզադաշտի և վազքուղու կառուցման նպատակով: «Էյ Վի Էն Գրուպ» ՍՊԸ-ի հետ կնքվել է 350 հազար դրամի պայմանագիր՝ նախագծահաշվարկային փաստաթղթերի կազմման համար, սակայն վերանորոգման համար նախատեսված 19 միլիոն 300 հազար դրամ գումարը հասցեատիրոջը չի գտել՝ մրցույթը չկայանալու պատճառով:

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter