HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Գրիշա Բալասանյան

Մեծամորի հիվանդանոցում սպառած էլեկտրաէներգիայի համար վճարում են բուժաշխատողները

Արմավիրի մարզի Մեծամորի բժշկական կենտրոնի աշխատակիցներն իրենց աշխատավարձի մի մասը թողնում են հաստատությանը, որպեսզի այդ կերպ կարողանան փակել պարտքերը: Ամեն ամիս բուժքույրերը և հավաքարարները նվիրաբերում են իրենց աշխատավարձի 5%-ը, իսկ բժիշկները` 10%-ը: ԲԿ-ի տնօրեն Միքայել Վանյանի խոսքերով՝ այդ նվիրաբերություններն ամսական կազմում են մոտ 1 միլիոն 100 հազար դրամ: Դրանով վճարում են ԲԿ-ի սպառած էլեկտրաէներգիայի վարձավճարը:

Մեծամորում է գտնվում Հայկական ատոմային էլեկտրակայանը, որն արտադրում է Հայաստանում  օգտագործվող էլեկտրաէներգիայի 40%–ը։ ՀԱԷԿ-ը Հայաստանում ամենաէժան էլեկտարաէներգիա արտադրող ձեռնարկությունն է։ Վերջինս «Բարձրավոլտ էլեկտրացանցեր»-ին հոսանքը տալիս է 12 դրամով։ Իսկ հիմա Մեծամորի բժշկական կենտրոնը 44,98  դրամով պիտի վճարի ՀԷՑ-ին։

«Ահռելի թվով գազ և էլեկտրաէներգիա ենք օգտագործում ձմռան ամիսներին, միջինը մոտ 5 միլիոն դրամ, դրա համար այսօր լուրջ պարտքեր են կուտակվել էլեկտրական ցանցերում՝ մոտ 23 միլիոն դրամ»,-ասում է բժշկական կենտրոնի տնօրենը:

Բանն այն է, որ Մեծամորի ԲԿ-ն, որը ներառում է ստացիոնար, ամբուլատոր և մեկ հերթափոխով շտապօգնության ծառայությունները, կենտրոնացած է մեկ տեղում, իսկ շենքի զգալի հատվածը վերանորոգված չէ: Պատուհանները դեռ հին փայտե պատուհաններն են, որտեղից սառը օդ է ներխուժում:

Միքայել Վանյանն ասում է, որ նաև շենքային անմխիթար վիճակն է պատճառը, որ չեն կարողանում ձմռանը նորմալ ջերմաստիճան ապահովել, ծախսն էլ՝ կրճատել:

«Ստացիոնար հատվածը 1980-ականներից վերանորոգման չի ենթարկվել, պատուհաններն այդ թվականնների պատուհաններն են: Փոքր-փոքր կոսմետիկ վերանորոգումներ արվել են, բացի վերակենդանացման բաժանմունքից, մանկական բաժանմունքի մի հատվածից և վիրահատարանից, որտեղ վերանորոգման աշխատանքներ իրականացվել են, մնացած մասում վիճակը վատ է»,-նշում է Մ. Վանյանը:

Պոլիկլինիկայի հատվածը 2 տարի առաջ Համաշխարհային բանկի ֆինանսավորմամբ է վերանորոգվել: Այն համալրվել է նաև ժամանակակից սարքավորումներով:

Իսկ 1980-ականների շունչը զգացվում է թե´ ամբուլատոր հատվածի միջանցքներում, թե´ հիվանդասենյակներում ու սանհանգույցներում: Պատերը խոնավ են՝ պատված մեծ-մեծ ճաքերով ու թափված ծեփերով: Ելքը մասամբ գտել են: Ցուցապաստառներով փակել են անցքերն ու ճաքերը:

Տնօրենը տեղեկացրեց, որ բոլոր աշխատակիցներով նամակ են գրել էլեկտրական ցանցերի սեփականատիրոջը՝ խնդրելով սառեցնել պարտքը: Միքայել Վանյանն ասում է, որ այս տարվա ծախսը ԲԿ-ի նվիրաբերած գումարներով մի կերպ կփակեն, սակայն չեն կարող մարել ամբողջ պարտքը:

«Հիմա զուտ խնայողական ռեժիմով ենք աշխատում՝ էլեկտրաէներգիայի, դեղորայքի, վառելիքի, բոլոր տնտեսական ծախսերը տարեցտարի շեշտակի նվազեցրել ենք: Բայց, միևնույն է, բյուջե պետք է լինի: Աշխատավարձի ֆոնդը կազմում է 254 միլիոն դրամ, իսկ պետական պատվերի ծավալը 212 միլիոն է, բնական է, որ հիմնական շեշտը դնում ենք վճարովի ծառայությունների վրա»,-հավելեց Մ. Վանյանը:

Վճարովի ծառայությունները ԲԿ-ում կազմում են ընդհանուրի 30%, որը լուրջ թիվ են համարում: Դեռևս գործում է սահմանափակ բյուջեի սկզբունքը, և փորձում են վճարովի ծառայությունների հաշվին թեթևացնել ֆինանսական բեռը: Միքայել Վանյանն ասում է, որ շատ են ոգևորվել նոր կառավարության որդեգրած քաղաքականությունից, որ պետք է ազատականացվի և բուժհաստատություններին պետության կողմից վճարումները կատարվեն ըստ կատարած աշխատանքի: Բժշկական կենտրոնի ղեկավարն ասում է, որ ամեն մի բժշկական հաստատություն ունի մի ծառայություն, որն ամենալավն է: Օրինակ՝ իրենք ունեն մրցունակ ինֆեկցիոն ծառայություն և միշտ գերակատարել են, ինչի դիմաց, սակայն, պատշաճ չեն վճարվում:

Խնայողական ռեժիմի անցնելու շրջանակներում ԲԿ-ում իրականացվել են նաև օպտիմալացման աշխատանքներ: 237 հաստիք կար, 3 տարիների ընթացքում դրանք կրճատվել են՝ դառնալով 191: Պատճառը ֆինանսական է, և այդ հաստիքների ոչ շատ անհրաժեշտ լինելը:

Վանյանն ասում է՝ եթե բյուջեն ազատականացվի, Մեծամորի ԲԿ-ն ոտքի կկանգնի: Տնօրենը նշեց, որ կառավարության համապատասխան որոշմամբ յուրաքանչյուր հաջորդ տարի ԲԿ-ները պետք է ֆինանսավորվեն ընթացիկ տարվա կատարած աշխատանքից ոչ պակասի չափով: Միքայել Վանյանն ասում է, որ առանց լուրջ հիմնավորման, և´ ինֆեկցիոն, և´ մանկական բաժանմունքների ծառայությունների դիմաց, 2014թ.-ին միանգամից 18 միլիոն դրամով նվազեցրել են ֆինասավորումը: Այդ հաշվարկից սկսած` ամեն տարի գումարի չափը պակասել է: Այդտեղից էլ սկսվել են Մեծամորի ԲԿ-ի դժվարությունները:

Միքայել Վանյանն ասում է, որ բոլոր նախարարներին դիմել են այս հարցով, հարցը լուծում չի ստացել: Նոր նախարարից սպասելիքներ ունեն:

Բժշկական կենտրոնն այլ պարտքեր ևս ունի: Օրինակ՝ 3 միլիոն դրամ դեղորայքի պարտք ունեն, ջրի պարտք են կուտակել, հարկերը չեն կարողացել վճարել, ընդհանուրը՝ 45 միլիոն դրամի: Աշխատավարձի պարտք, սակայն, չունեն:

Որպեսզի նոր պարտքեր չկուտակեն, նույնիսկ դեղորայքն են սահմանափակ քանակով գնում՝ դրամարկղում եղած գումարի չափով, որը կարող է 1 շաբաթ բավականացնել:

Ինչպես մյուս մարզային հիվանդանոցներում, այնպես էլ Մեծամորի բժշկական կենտրոնում, սարքավորումների մի մասը բավականին հին են: Օրինակ՝ ռենտգեն ապարատը 1980-ականների է։ Այդ թվականների արտադրության են սարքավորումների զգալի մասը: 2 տարի առաջ մասնագետ են հրավիրել, և սարքավորումների հիմնական մասի մաշվածությունն ու անսարքությունները վերանորոգվել են, կարողանում են օգտագործել: Բայց դա հարցի լուծում չէ:

Միայն վիրահատական և վերակենդանացման բաժանմունքների սարքավորումներն են նոր, ինչպես նաև պոլիկլինիկայինը: Վճարովի ծառայությունների հաշվին կարողանում են քիչ-քիչ նորացնել, բայց, այդ տեմպով, երկար տարիներ կպահանջվի:

Միքայել Վանյանն ասում է, որ և´ շենքային պայմանները, և´ սարքավորումներն անհամեմատելի են Երևանի բժշկական կենտրոնների հետ, և այդ պատճառով մարզերից հիվանդները շարունակում են գնալ Երևանի բուժհաստատություններ:  Տնօրենի խոսքերով՝ բժշկական կենտրոնի հեղինակության հաշվին են կարողանում հիվանդներին պահել իրենց մոտ:

Հիվանդների շարժը պայմանավորված է նաև պետպատվերի սահմանափակ տեղերով: Օրինակ՝ նախորդ տարվա մայիս ամսին հիվանդներին հերթագրել են սեպտեմբերի երկրորդ կեսի համար, բնականաբար, այդ հիվանդները չէին սպասի, և ով ի վիճակի է եղել վճարել, բուժվել է, ով ոչ՝ գնացել է Երևան:

«Մենք հիվանդի պակաս չունենք, ֆինանսի պակաս ունենք: Մեր միակ խնդիրն այն է, որ մեր կատարած աշխատանքը չի վճարվում»,-նշեց Մ. Վանյանը:

Նա ելքը տեսնում է հետևյալում. գյուղական համայներում կան բուժամբուլատորիաներ, որտեղ տնօրենի, հաշվապահի, օպերատորի հաստիքներ կան: Վանյանի կոպիտ հաշվարկներով` Արմավիրի մարզի գյուղական համայնքներում մոտ 120 միլիոն դրամի աշխատավարձ ստանում են այդ հաստիքի աշխատակիցները:

Ըստ նրա՝ լավ կլինի, որ նշված ամբուլատորիաները գործեն մարզերի հիվանդանոցների ենթակայության տակ, և այդ 120 միլիոնն էլ բաժանվի մարզի հիվանդանոցների միջև, քանի որ օպերատորի, հաշվապահի գործը կարող են անել հիվանդանոցի աշխատակիցները: Մանավանդ` շուտով անցում է կատարվելու էլեկտրոնային առողջապահության, որի շրջանակում յուրաքանչյուր բժիշկ պետք է իր կատարած աշխատանքը մուտքագրի համակարգ, ուստի հաշվապահի ու օպերատորի հաստիքները դառնալու են աննպատակահարմար:

Միքայել Վանյանը ևս մեկ հարց բարձրացրեց: Մեծամորի ԲԿ-ին պատկանող շենքեր կան, որոնք չեն օգտագործվում, օրինակ՝ քաղաքի կենտրոնում գտնվող պոլիկլինիկայի շենքը: Կառավարությանն առաջարկում է վաճառել չօգտագործվող շենքերը և այդ գումարով վերանորոգել ԲԿ-ն, փոխել պատուհանները, տեղադրել արևային մարտկոցներ, ինչը ԲԿ-ին կազատի «էլեկտրաէներգիայի ցավից»:

Նշենք, որ Մեծամորի ԲԿ-ն ընդհանուր սպասարկում է մոտ 21 հազար բնակչի, որից 11 հազարը՝ շրջակա գյուղերի բնակիչներ են: 

Մեկնաբանություններ (2)

Hetq
Dear Levon....no one at the center has ever complained about their wages being used to pay the utility bill.
Levon
Have any of the employees ever complained about this policy? Did the reporter ask?

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter