HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Գրիշա Բալասանյան

Սևանի միակ ներքաղաքային տրանսպորտի ուղեւորագիծը փակման վտանգի առաջ է

Սևան քաղաքի ներքաղաքային միակ երթուղին՝ թիվ 1-ը, հնարավոր է` փակվի: Պատճառն այն է, որ երթուղին շահագործող «Ռաֆֆի-Սերինե» ՍՊԸ-ն լուրջ վնասներ է կրում: Ընկերութան հիմնադիր Ատոմ Դավթյանը «Հետք»-ի հետ զրույցում ասաց, որ խնդրել են Սևանի քաղաքապետարանին, որպեսզի ընկերությանը սուբսիդավորեն, երթուղին շահագործումից դուրս չգա, սակայն քաղաքապետարանը ֆինանսական հնարավորություններ չունի:

«Գիծը չի արդարացնում բացարձակ: Պասաժիր չկա, և այդ գիծը երևի շուտով փակվի: Այլ թաղամասերով հնարավոր չէ երթևեկել, որովհետև պասաժիր գոյություն չունի: Կենտրոնական փողոցը եթե չի արդարացնում, մյուս փողոցները ո՞նց կարդարացնեն»,-ասում է Ատոմ Դավթյանը՝ հավելելով, որ միայն կենտրոնական փողոցով են երթևեկում, քանի որ քաղաքի մյուս ճանապարհները վատ վիճակում են:

Սևանի միջքաղաքային միկրոավտոբուսային երթուղին սկսվում է Վ. Կարապետյանի անվան հրապարակից, ապա Սևանի հոգեբուժական հիվանդանոցով, Նաիրյան, Խաղաղության փողոցներով, Երևանյան խճուղիով հասնում է Սևանի թերակղզու հրապարակ: Երթուղու ամբողջ երկարությունը 9 կիլոմետր է, տևողությունը՝ 25 րոպե:

Սևանի քաղաքապետի 2017թ. փետրվարի 27-ի թիվ 74-Ա որոշման համաձայն` օրվա ընթացքում պետք է իրականացվի ներքաղաքային 14 չվերթ՝ առավոտյան 8:00-ից մինչև երոկոյան 18:30-ը:

Երթուղու մրցույթը կայացել է 2014թ., և «Ռաֆֆի-Սերինե» ՍՊԸ-ն իրավունք ունի երթուղին սպասարկել մինչև 2018թ. մայիսի 1-ը: Ատոմ Դավթյանը նշեց, որ մրցույթին մասնակցել են երկու միկրոավտոբուսով, սակայն ուղևորահոսքի պատճառով օրական մեկ միկրոավտոբուս է աշխատում:

Նա նշեց, որ մրցութային ուղևորավարձը 100 դրամ է եղել, սակայն քաղաքի ներսում ուղևորափոխադրում են իրականացնում 50 դրամով:

«Բացարձակ չի արդարացնում: Ուղղակի, որ ասում են` ամոթու ընկել է մեր վզով, քշում ենք, այդքան բան: Ստիպված ենք քաղաքի ներսում 50 դրամով քշել, որովհետև եթե ասենք 100 դրամ, ընդհանրապես պիտի գիծը փակենք»,-ավելացրեց ընկերության հիմնադիրը:

Բացի այն, որ ուղևորների թիվը կտրուկ նվազել է, դրան գումարվում են նաև գյուղեր գնացող երթուղայինները, որոնք շարժվում են նույն երթուղով, որով Սևան քաղաքի թիվ 1 երթուղին: Դարձյալ տուժում է ներքաղաքային երթուղին:

Եթե ներհամայնքային երթուղին փակվի, և նոր մրցույթ չհայտարարվի, կտրվելու է կապը Սևան քաղաքի և դրա վարչական տարածքի մեջ մտնող Ցամաքաբերդ թաղամասի միջեւ: Մարդիկ թերակղզի գնալու համար ստիպված են լինելու օգտվել տաքսի ծառայություններից:

Ընդհանրապես, Սևան քաղաքի ներքաղաքային տրանսպորտը բավականին անհարմար է ոչ միայն բնակիչների, այլեւ հատկապես քաղաքի հյուրերի համար: Ամեն ինչ կենտրոնացած է գլխավոր` Նաիրյան փողոցի վրա: Քաղաքի մյուս փողոցներն իրար կապող փոխադրամիջոց չկա: Նույնիսկ գյուղեր գնացող երթուղիները չեն սպասարկում քաղաքի մյուս փողոցները: Մարդիկ ստիպված են ոտքով հատել ճանապարհը, գալ կենտրոնական փողոց և նոր միայն օգտվել հասարակական տրանսպորտի ծառայություններից: Տարեցները և հաշմանդամություն ունեցող մարդիկ այդ առումով լուրջ դժվարություններ են ունենում:

Երբ զրուցում էինք սևանցիների հետ, նրանք գրեթե չէին դժգոհում: Արդեն հարմարվել են: Սակայն, ոմանք հարց էին բարձրացնում, որ միկրոավտոբուսային երթուղին շատ անհարմար փոխադրամիջոց է, և ժամանակն է անցնելու ավելի «մարդկային» փոխադրամիջոցների:

Զվարթ Ալավերդյանն ապրում է հարևան գյուղում, սակայն հաճախ է լինում Սևան քաղաքում: Նա ասաց, որ գրեթե չի օգտվում «գազելներից»` պատճառաբանելով. «Ինչ տրանսպորտ է, որ օգտվենք»: Տիկնոջ կարծիքով, ավելի հարմար կլիներ, եթե միկրոավտոբուսները փոխարինվեին ավտոբուսներով, որոնք ավելի հարմարավետ են և ազատ:

«Սևան երիտասարդական ակումբ» ՀԿ-ի նախագահ Գոհար Մնացականյանն էլ հարց բարձրացրեց, որ Սևան-Երևան երթուղին աշխատում է մինչև երեկոյան ժամը 17:00-ը, և հատկապես ամառվա ամիսներին անհարմարություն է առաջանում:

Սևան քաղաքում մշակութային կյանքը զարգացած չէ, և եթե երիտասարդները որոշում են գնալ Երևան կինո կամ թատրոն, ապա ստիպված են վերադառնալ տաքսի ավտոմեքենաներով, որի արժեքը 7-10 հազար դրամ է, իսկ երթուղին սպասարկվում է 600 դրամ ուղեվարձով:

Սևանի ավտոկայանի պետ Սերժիկ Բաղդասարյանն ասաց, որ ոչ մի ուղևոր դրսում չի մնում, կապված ուղևորահոսքից` իրենք սպասարկում են նաև ժամը 17:00-ից հետո, և ուղևորները գոհ են: Նրա խոսքով՝ հատկապես ամառվա ամիսներին երկար են աշխատում, որպեսզի դժգոհողներ չլինեն:

Լուսանկարներն ու տեսանյութը` Դավիթ Բանուչյանի

Մեկնաբանություններ (1)

Մարտիկ
Դուք էլ բանի մասին եք գտել գրելու։ Թումանյանի տուն թանգարանի խայտառակագույն դեպքին ո՞նց էոր չեք արձագանքում, հարգելի Հետք։

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter