HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Գերմանիայի փորձը. գյուղատնտեսները պայքարում են թունաքիմիկատների օգտագործման դեմ

Գերմանիայի Ապագայի գյուղատնտեսության հիմնադրամի ղեկավար Բենեդիկտ Հաերլինն (Benedikt Haerlin) ասում է, որ գերմանական գյուղատնտեսության մեջ ամենահրատապ հարցը թունաքիմիկատների լայն օգտագործումն է: Նրա փոխանցմամբ՝ գյուղատնտեսների շրջանում քննարկվում է թունաքիմիկատներից գլիֆոսատի օգտագործումը, որն աշխարհում լայնորեն կիրառվում է մոլախոտերի դեմ պայքարում, ինչպես նաև գենետիկ ինժեներիայի, ԳՁՕ-ների, մշակաբույսերի ոլորտում:

Հաերլինը նշում է, որ Եվրամիությունը 10 տարին մեկ վերանայում է թունաքիմիկատների հարցը, ինչը նաև գլիֆոսատով է պայմանավորված: «Հիմա այդ թեմայով լուրջ քննարկումներ են ընթանում, ավելի քան 1,5 միլիոն ստորագրություն է հավաքվել դրա արգելման համար: Մի կողմից՝ Առողջապահության համաշխարհային կազմակերպության փորձագետներն այն համարում են քաղցկեղածին, մյուս կողմից՝ ԵՄ փորձագետները հերքում են դա»,- ասում է Բ. Հաերլինը:

Ըստ նրա՝ գլիֆոսատի գործածումն արդյունավետ է մոլախոտերի դեմ, բայց էական բացասական ազդեցություն է թողնում ամբողջ էկոհամակարգի վրա: Այն խնդիր է նաև մեղվապահների համար, քանի որ բավարար քանակությամբ ծաղիկներ չեն մնալու մեղուներին:

Գլիֆոսատի օգտագործման վերաբերյալ Գերմանիայի սննդի և գյուղնախարարության ու բնապահպանության նախարարությունների մոտեցումները տարբեր են: Գյուղնախարարը կողմ է դրան, բնապահպանության նախարարը՝ դեմ:

Գերմանիայում լուրջ մարտահրավեր է նաև խոզերի աֆրիկյան ժանտախտը: Եվրամիությունում Գերմանիան ամենաշատ միս արտադրող երկիրն է: Ժանտախտի պատճառով հազարավոր խոզեր են հարկադիր սպանդի ենթարկվել: Տեղացի ֆերմեները բարձրացրել են փոխհատուցման հարցը:

Բենեդիկտ Հաերլինի խոսքով՝ հանրային քննարկումների թիրախում է նաև գյուղատնտեսության ոլորտի թվայնացումը: Այս ոլորտում ավելի քան 1 միլիոն մարդ է աշխատում, այնինչ թվայնացումը կհանգեցնի աշխատատեղերի կրճատման:

Գերմանիայի սննդի և գյուղատնտեսության նախարարության աշխատակից Ֆրիդրիխ Վակերն (Friedrich Wacker) էլ ասում է, որ ոլորտում աշխատողները 940 հազար են, ինչը բնակչության 1 տոկոսից փոքր-ինչ ավելի է: Միաժամանակ բնակչության ավելի քան կեսը՝ 44 միլիոնը, բնակվում է գյուղական շրջաններում, որոնք ծածկում են երկրի տարածքի մոտ 90 տոկոսը: Գյուղոլորտում հիմնականում արտադրում են կաթ, միս (խոզի, տավարի, հավի), հացահատիկ (գլխավորապես ցորեն), կարտոֆիլ, սևուկի ձեթ (colza), շաքարի ճակնդեղ: Արտադրանքի ¾-ն արտահանվում է ԵՄ անդամ երկրներ (այդ թվում՝ Նիդեռլանդներ, Ֆրանսիա, Իռլանդիա, Մեծ Բրիտանիա), իսկ ¼-ը՝ ԱՄՆ, Չինաստան:

Գերմանիան գլխավորապես կաթի, վերամշակված սննդի, ծխախոտի, ցորենի ու խմիչքի արտահանող է: Փոխարենը ներկրում է հիմնականում պանիր, սուրճ, գինի, վերամշակված սնունդ, սևուկի ձեթ, սոյա, շոկոլադ, թարմ միրգ: Այն գյուղմթերքի ներկրմամբ 2-րդ երկիրն է աշխարհում, արտահանմամբ՝ 3-րդը:

Ֆրիդրիխ Վակերը ոլորտի հրատապ հարցերից մեկը համարում է ԵՄ գյուղատնտեսական քաղաքականությունը, որի ընթացիկ փուլն ավարտվում է 2020-ին: Առաջիկայում սկսվելու է հետագա քաղաքականության քննարկումների շրջան՝ կանխորոշելու ոլորտի զարգացման ուղղությունները: Առաջնահերթ են, մասնավորապես, գյուղատնտեսության արդյունավետության և արտադրանքի կայուն արտահանման հարցերը:  

Գյուղնախարար Քրսիտիան Շմիդտը (Christian Schmidt) «Միջազգային կանաչ շաբաթ» ագրոարդյունաբերական ցուցահանդեսի բացման իր ելույթում նշել է, որ Գերմանիան պետք է աջակցի կենսաբազմանությանը, գյուղական համայնքներին, մեղուների համար ավելի շատ տարածքների ապահովմանը, բուսական և կենդական աշխարհի պաշտպանությանը. «Մենք պետք է ուժեղացնենք էկոհամակարգը՝ անտառածածկ տարածքները, կրճատենք թունաքիմիկատների օգտագործումը՝ հասցնելով նվազագույնի: Պիտի բարձրացնենք օրգանիկ արտադրության ծավալը՝ 20 տոկոսի հասցնելով»:

Գլիֆոսատի մասին էլ նախարարն ասել է, որ իր պաշտոնավարման տարիներին (2014-ից) դրա օգտագործումը մեկ երրորդով կրճատվել է: Ըստ նախարարի՝ հիմա մշակվում է այլընտրանք, որը կարող են լինել քիմիական, մեխանիկական կամ էլեկտրոնային միջոցները: Շմիդտի խոսքով՝ Գերմանիան մեծ գումարներ է ներդնում այլընտրանքային ուղիների մշակման համար:  

Հիշեցնենք, որ այս ամիս Բեռլինում բազմահազարանոց ավանդական ցույց էր կազմակերպվել, որի մասնակիցները արտահայտվում էին շարքային ֆերմերների իրավունքների ընդլայնման, թունաքիմիկատների արգելման, կենդանիների պաշտպանության համար: 

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter