HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Գագիկ Աղբալյան

Երևանի խաղահրապարակներում հողը հագեցած է ծանր մետաղներով

Մայրաքաղաքի մանկական խաղահրապարակներում կատարված ուսումնասիրություններով պարզվել է, որ հողում քրոմի պարունակության սահմանված թույլատրելի կոնցենտրացիաների գերազանցումներ են արձանագրվել 29 նմուշներից 26-ում: Ըստ «Հանրային իրազեկման եւ մոնիտորինգի կենտրոն» ՀԿ նախագահ Մարի Չաքրյանի՝ փորձաքննությամբ պարզվել է, որ խաղահրապարակները եւ շրջակա տարածքները հագեցած են ծանր մետաղներով: 

«Հանրային իրազեկման եւ մոնիտորինգի կենտրոն» հասարակական կազմակերպությունը շարունակում է մայրաքաղաքի մանկական խաղահրապարակների ուսումնասիրությունները: 

Նախկինում հայտնաբերված խնդիրներին գումարվել են նորերը: Ուսումնասիրության առաջին փուլում, հիշեցնենք, պարզվել էր, որ խաղահրապարակներում տեղադրված սարքավորումները, մեղմ ասած, անվտանգ չեն երեխաների կյանքի եւ առողջության համար: 

Կազմակերպությունը Երեւանի վարչական շրջանների 26 խաղահրապարակների ինչպես բակային խաղահրապարակներում տեղադրված սարքավորումների անմիջական շփման հատվածներից, այնպես էլ սարքավորումների հարակից տարածքներից եւ ավազամաններից վերցված 29 փորձանմուշները հանձնել է ԳԱԱ Էկոլոգանոոսֆերային հետազոտությունների կենտրոնի լաբորատորիա: 

Ռենտգենֆլյուորեսցենտային տարրալուծման եղանակով (XRF, X-5000 (Օլիմպուս,Innov X systems., ԱՄՆ) հետազոտվել են հողի եւ ավազի մեջ 10 ծանր մետաղների առկայություն (քրոմ, վանադիում, ցինկ, արսենիում, մոլիբդեն, պղինձ, նիկել, կապար, կադմիում եւ սնդիկ): 

Ստացված տվյալները համեմատվել են կառավարության 2005 թվականի 92-Ն որոշման՝ «Հողային ռեսուրսների վրա տնտեսական գործունեության հետեւանքով առաջացած ազդեցության գնահատման կարգի» հետ: 

Հողում քրոմի պարունակության ՍԹԿ գերազանցումներ արձանագրվել են 29 նմուշներից 26-ում:

Օրգանիզմում քրոմի ավելցուկն առաջացնում է թունավորում: Քրոմի միացությունների հետ երկարատեւ շփումը առաջացնում է գլխացավ, թուլություն, դեպրեսիա, քաշի կորուստ, հնարավոր է նաեւ բրոնխիտ եւ ասթմա: Մաշկի վրա ազդելով` քրոմի միացությունները առաջացնում են դերմատիտ եւ էկզեմա: 

Հետազոտված 29 նմուշներից 8-ում՝ վերացված Նոր Նորքի, Քանաքեռ-Զեյթունի, Արաբկիրի, էրեբունու, Նուբարաշենի, Շենգավիթի եւ Կենտրոնի խաղահրապարակներից, բարձր է եղել կապարի կոնցենտրացիան: 

Ըստ միջազգային ստանդարտների` կապարի անվտանգ չափաքանակ գոյություն չունի: Այն մարդու օրգանիզմ թափանցում է կերակրափողի, շնչուղիների, մաշկի միջոցով եւ աստիճանաբար կուտակվում օրգանիզմում: Կապարով աղտոտված հողը համարվում է պարենային հումքի եւ մարդու, հատկապես երեխաների օրգանիզմ, կապարի ուղղակիորեն ներթափանցման աղբյուր: Այն վտանգավոր է նրանով, որ անցնելով օրգանիզմ` ոչ թե քայքայվում է, այլ՝ կուտակվում, ժամանակ առ ժամանակ կարող է թափանցել արյան մեջ ու առաջացնել կապարային հիվանդություններ: Կապարային թունավորումն առաջացնում է ագրեսիվություն, թերզարգացվածություն, ցրվածություն, գերակտիվություն, վարքագծի փոփոխություններ, լսողության նվազեցում:

«Հայ կանայք հանուն առողջության եւ առողջ շրջակա միջավայրի» ՀԿ փորձագետների գնահատմամբ՝ կապարի նկատմամբ առավել զգայուն է նախադպրոցական տարիքի երեխաների օրգանիզմը: 

Ստուգվածներից միակ խաղահրապարակը, որտեղ գերազանցումներ չեն հայտնաբերվել, գտնվում է Նորք-Մարաշում, չնայած նրա հարակից տարածքում բարձր է եղել քրոմի ՍԹԿ-ն: Ու քանի որ հարակից տարածքը համարվում է ազդեցության գոտի, կարելի է պնդել, որ այս խաղահրապարակն ամենեւին էլ անվտանգ չէ: 

Առանց պետական վերահսկողության 

Հաշվի առնելով նաեւ ծրագրի առաջին փուլի` խաղահրապարակներում տեղադրված սարքավորումների տեխնիկական վիճակի վերաբերյալ ուսումնասիրությունը` Մարի Չաքրյանը ոստիկանության հետ իրականացրել է գրագրություն, պարզելու համար, թե 2014-2017 թվականների ընթացքում քանի դժբախտ պատահար է տեղի ունեցել: Պարզվում է, որ նշված տարիներին Երեւանում արձանագրվել է դժբախտ պատահարի մեկ դեպք՝ մահվան ելքով: Դեպքի կապակցությամբ հարուցված գործը կասեցվել է, պատասխանատվության ենթարկված անձինք չկան: 

«Հանրային իրազեկման եւ մոնիտորինգի կենտրոն» ՀԿ-ն առողջապահության նախարար Լեւոն Ալթունյանին հարցում է ուղարկել, պարզելու համար, թե ի՞նչ սանիտարական նորմեր կան բակային տարածքներում գտնվող մանկական խաղահրապարակների համար, արդո՞ք նախարարության կողմից վերահսկվում է Երեւան քաղաքի բակային տարածքներում գտնվող մանկական խաղահրապարակների սանիտարական վիճակը, կատարվու՞մ են արդյոք նմուշառումներ խաղահրապարակի հողից եւ ավազից, եւ այլն: 

ԱՆ Առողջապահական տեսչական մարմնի ղեկավար Գոհար Փանաջյանը պատասխանել է, որ սանիտարական օրենսդրությամբ՝ բակային տարածքներում գտնվող մանկական խաղահրապարակների սանիտարական վիճակի նկատմամբ վերահսկողությունը դուրս է Տեսչական մարմնի իրավասությունների շրջանակներից: 

Խնդրո առարկան նաեւ Երեւանի Օրհուս կենտրոնի ուշադրության կենտրոնում է: Կենտրոնի համակարգող Սիլվա Այվազյանը գրություն է ուղարկել Երեւանի քաղաքապետ Տարոն Մարգարյանին, խնդրելով հստակեցնել՝ արդյո՞ք քաղաքապետարանը պարտավոր է պահպանել ու վերանորոգել մանկական խաղահրապարակները, ստուգվու՞մ են հողը, օգտագործվող նյութերը: 

Քաղաքապետարանը Երեւանի Օրհուս կենտրոնին հայտնել է, որ բակային տարածքներում կառուցված մանկական խաղահրապարակները գտնվում են քաղաքապետարանի հաշվեկշռում, դրանք պահպանվում եւ վերանորոգվում են քաղաքապետարանի կողմից, վարչական շրջանների ղեկավարների եւ համատիրությունների միջոցով: Իր պատասխան գրության մեջ քաղաքապետարանը պնդել է, որ խաղահրապարակների կառուցման կամ վերանորոգման ժամանակ հաշվի են առնվում երեխաների անվտանգության հարցերը, շինարարությունն ու նախագծումն իրականացվում են մասնագիտացված լիցենզավորված կազմակերպությունների կողմից:

Հողերի աղտոտումների թեմայով.

Մեկնաբանություններ (1)

Aram
Did your reporter inquire about the origin of these chemicals in he playgrounds? Are they from paints used on the playgrounds, fumes from cars or what?

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter