Հանրապետության հրապարակի Ձմեռ պապիկները իրենց  հագուկապով  չեն  զիջում լապլանդացի Սանտա Կլաուսին: Բայց եթե Սանտա Կլաուսը Ամանորին խոշոր հարակատու է Մեծ Բրիտանիայում, և մի քանի օր առաջ էլ Լոնդոնում գողացան նրա Rover  մակնիշի ավտոմեքենան, ապա  մեր Ձմեռ պապը օրական ամենաշատը 2000 դրամ է աշխատում:

Ձմեռ պապը ծագումով հեքիաթից է: Այդ հեքիաթում նա ճամփորդում է ոչ թե  մեքենայով, այլ  սահնակով` լծված եղջերուներին: Երբ  գործը հասնում է նրան, որ Սանտա Կլաուսը Սուրբ ծննդյան օրերին դառնում է կոմերցիոն գովազդի գլխավոր հերոսը, հարստանում ու փոխում փոխադրամիջոցը, մարդիկ գողանում են նրա մեքենան` հիշեցնելով սահնակի տեղը: Մեծ Բրիտանիայում ոստիկանությունը փնտրում է Սանտա Կլաուսի ավտոմեքենան գողացած հանցագործներին, Սանտան էլ բրիտանական լրատվամիջոցներին հաղորդել է, թե «տարվա այս շրջանում դժվար է հորինել ավելի ստոր հանցագործություն», բայց գողերն իրականում նրան վերադարձրել են հանրածանոթ ու հարազատ հեքիաթ, որում ինքը մեքենա չուներ և եթե նույնիսկ հարուստ էր, ապա Ամանորի նախաշեմին պարկի պարունակությունը մինչև վերջ դատարկում էր մարդկանց առաջ:

 Առավոտից երեկո Հանրապետության հրապարակում շրջող Ձմեռ պապիկների հետ   այս օրերին արտակարգ դեպքեր տեղի չեն ունեցել: «Շատ հետաքրքիր, ամանորյա օրեր ենք անցկացնում»,- ասաց նրանցից մեկը:

Կարմիր պարկը գողանալ ոչ ոք չի փորձել, իսկ դրա մեջ եղած խաղալիքների վաճառքից և երեխաների հետ նկարվելուց ստացած գումարը, նրա խոսքով, կազմում է 1000-2000 դրամ:    Ձմեռ պապիկներին  մի քիչ հետևելուց հետո պարզվեց, որ նրանք բոլորը ծանրաբեռնված են աշխատում և երբեմն սպասարկում են  մանկապարտեզներից  եկած բազմանդամ խմբերի: Խազալիքների պարկը վերջին դեպքում շատ արագ է դատարկվում: Բայց երբ էքսկուրսավարը «նվերների» համար վճարեց տասը հազար դրամ, Ձմեռ պապը մանրադրամ չուներ և օգնություն խնդրեց մոտակայքում տեղադրված կարուսելներն աշխատացնողից:

Ձմեռ պապ աշխատելու համար անհրաժեշտ է Ամանորից մոտ մեկ ամիս առաջ հավատարմագրվել Երևանի քաղաքապետարանում: Այդպես են արել նաև հրապարակի Ձմեռ պապիկները. նրանք ունեն իրենց աշխատանքի օրինականությունը ապացուցող համապատասխան փաստաթուղթ: Ասում են, որ ընտրվելու և հավատարմագրվելու հիմնական չափանիշը արտաքին տեսքն է:

Կարճաժամկետ աշխատանքը նրանց այդպես էլ չի հարստացնում, ինչպես արտասահմանցի Սանտա Կլաուսին: Պատճառն այն է, որ Սանտան եկամտաբեր մի քանի օրվան  պատրաստվում է ամբողջ տարվա ընթացքում: Օրինակ` Կանադայում նա գրասենյակ է հիմնել, ունի  աշխատողներ, ովքեր կարողանում են պատասխանել երեխաների` աշխարհի տարբեր ծայրերից ուղարկված նամակներին 30 լեզուներով: Ֆրանսիայում էլ հատուկ աշխատանք է տարվում, որ նամակ գրող երեխաները իսկապես հավատան Ձմեռ պապին: Ելիսեյան դաշտերում, «Մայքրոսոֆթ» ընկերությունը տեղադրել է մեծ սմարթֆոն, որի օգնությամբ միայն հնարավոր է կապ հաստատել Սանտա Կլաուսի հետ:

Արհեստականորեն դժվարացնելով հրաշագործի հետ շփումը`  Windows Phone տասը մետրանոց սարքը պահպանում է մանկության հեքիաթը: Կանադացի Ձմեռ պապի  ընկերության հիմքում, ինչպես հաղորդում է ամերիկյան «Նյու Յորք Թայմսը»,  անանուն բարեգործներ են: Վերջիններիս ներդրումները գրեթե բավարարում են նամակների բերած ցանկությունները կատարելու համար, և ամերիկացի երեխաները վստահ կարող են ասել, որ Սանտա Կլաուս կա: Եվ հենց երեխաների սերը Սանտա Կլաուսների հանդեպ թույլ է տալիս, որ վերջիններս գումար վաստակեն գովազդի միջոցով` իրենց վրա կրելով տարբեր ընկերությունների ֆիրմային տարբերանշաններ` նվիրելով կոնկրետ գովազդատուի կողմից պատվիրված խաղալիքներ և այլն…

Արտասահմանյան հետաքրքիր փորձը կարող է դառնալ հայ  գործարարներից որևէ մեկի ապագա բիզնեսը, պաշտոնյաները  կլինեն ներդրում կատարող բարեգործները (եթե ուզում են),  երեխաներն էլ կունենան Ձմեռ պապ ու ստիպված չեն լինի հիշել, թե երբ սկսեցին չհավատալ նրան:

Միայն թե այդ ապագա գործարարը չնմանվի բրիտանացի անհեռատես Սանտա Կլաուսին, ով մինչև հիմա փնտրում է իր մեքենան…