HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Էդիկ Բաղդասարյան

Դատարանն աջակցեց կանանց վաճառողներին

Նոյեմբերի 11-ին Էջմիածին քաղաքում Արմավիրի առաջին ատյանի դատարանում ավարտվեց մարդկանց վաճառքի գործով ընթացող մի դատավարություն: Այդ օրը դատարանը հրապարակեց դատավճռի եզրափակիչ մասը, այսինքն' միայն պատիժները: Երեք ամբաստանյալների համար դատավոր Տիգրան Պետրոսյանը ակնհայտ մեղմ պատիժ է սահմանել' կիրառելով Քր.օր-ի 64-րդ հոդվածը: Այս հոդվածը կիրառվում է բացառիկ հանգամանքների առկայության դեպքում: Օրինակ' երբ ամբաստանյալն աջակցում է «խմբի կատարած հանցանքը բացահայտելուն», կամ' երբ կան մի քանի մեղմացուցիչ հանգամանքեր եւ այլն:

Ամբաստանյալները չորսն էին' Սիմոն Ներսիսյանը, Նանասիլ Առաքելյանը, Թամարա Մակարովան եւ Պատվական Մալխասյանը: Վերջինս սեպտեմբերին Դուբայում կասկածելի հանգամանքներում ավտովթարից մահացած, հետախուզման մեջ գտնվող հայտնի կավատ Անահիտ Մալխասյանի (մականունը' «Դըբռ Անո») հարազատ եղբայրն է:

Անահիտ Մալխասյանի դին Դուբայից Հայաստան տեղափոխելուն օժանդակել էր այնտեղի հայկական սեքս-բիզնեսի պարագլուխներից մեկը' սիրիացի Ասադը (Տես նաեւ' Դուբայի սեքս-բիզնեսի հայկական ցանցը):

Պատվական Մալխասյանը մեղադրվում էր երկու հոդվածով' 262-ի 1-ին մաս ( Պոռնկությամբ զբաղվելու համար որջեր կազմակերպելը, պահելը կամ կավատությունը ) եւ 132-ի 2-րդ մասի 1-ին կետ (Մարդկանց առեւտուր): Մեղադրանքը ներկայացնող դատախազը այս երկու հոդվածների համակցությամբ միջնորդել է ազատազրկել Պ. Մալխասյանին հինգ տարի վեց ամիս ժամկետով: Սակայն դատարանը կիրառել է 64-րդ հոդվածը եւ նշանակել երկու տարվա ազատազրկում:

Դատական գործում տեղեկանք կա, որ Պ. Մալխասյանն իր խնամքին ունի երեք անձ եւ վատառողջ է: Պ. Մալխասյանը 2002թ. Դուբայում քրոջ' Անահիտ Մալխասյանի հետ էր աշխատում: Նա քրոջ ենթակայության տակ գտնվող կանանց տեղափոխում էր դիսկոտեկներ, հյուրանոցներ, սրճարաններ եւ ապահովում էր, որպեսզի նրանք «անվտանգ» զբաղվեն մարմնավաճառությամբ: Վերադառնալով Հայաստան' նա սկսել է քրոջը կանայք մատակարարել:

Այս գործով տուժողները երկուսն են' Շ.Մ.-ն եւ Ռ.Կ.-ն, սակայն մեկ տարի առաջ մենք Դուբայում երկու անգամ եղել ենք Անահիտ Մալխասյանի բնակարան-հասարակաց տանը, զրուցել նրա ենթակայությամբ աշխատող կանանց հետ, եւ նրանց մեջ կային եւս երեքը, ովքեր Դուբայում էին հայտնվել նրա եղբոր' Պատվական Մալխասյանի միջոցով:

Դատական գործով տուժողներին հենց Պատվականն ու ամբաստանյալներ Նանասիլ Առաքելյանն ու Թամարա Մակարովան են խաբել եւ Դուբայում երեխա պահելու պատրվակով ուղարկել Անահիտ Մալխասյանի մոտ: Դուբայում Անահիտ Մալխասյանը, նրանցից վերցնելով անձնագրերը, ստիպել է զբաղվել մարմնավաճառությամբ:

Տուժողները նախկինում մարմնավաճառներ չեն եղել, գտնվում էին ծայրահեղ նյութական կարիքի մեջ: Երկուսն էլ ամուսնալուծված էին: Այս հանգամանքները հաշվի առնելով են ամբաստանյալները նրանց գցել իրենց ցանցի մեջ: Կանանցից մեկը իր ցուցմունքում պատմել է, թե ինչպիսի դաժան վերաբերմունքի է արժանացել Անահիտի եւ նրա արաբ գործընկերների կողմից:

Ամբաստանյալ Նանասիլ Առաքելյանը 2 անգամ դատված է եղել նմանատիպ գործունեության համար: Միակ ամբաստանյալն է, որի նկատմամբ, ըստ մեղադրող կողմի, դատարանը համաչափ պատիժ է սահմանել' 5 տարի 4 ամիս ազատազրկում:

Թամարա Մակարովայի համար մեղադրողը պահանջել է ազատազրկում հինգ տարի ժամկետով, սակայն դատարանը, գտնելով հանցանքը հիմնավորված եւ ապացուցված, պատիժ է սահմանել 2 տարի ժամկետով: Ամբաստանյալի միակ մեղմացուցիչ հանգամանքն այն է, որ նախկինում դատված չի եղել:

Կանանց Մոսկվայով Դուբայ էր տեղափոխել Սիմոն Ներսիսյանը:

Նա մեղադրվում էր 132 հոդվածի 2-րդ մասի 1-ին եւ 4-րդ կետերով: Մեղադրողը միջնորդել էր դատարանին Ս. Ներսիսյանին ազատազրկել հինգ տարի ժամկետով: Դարձյալ կիրառելով 64-րդ հոդվածը' դատարանը նշանակեց ազատազրկում երկու տարի ժամկետով:

«Դատարանն ակնհայտ մեղմ պատիժ է սահմանել երեք ամբաստանյալների նկատմամբ: Մեզ համար խիստ անսպասելի էր եւ անտրամաբանական, որ ծանր հանցագործության համար մի գործով երեք անձի նկատմամբ կիրառվում է 64-րդ հոդվածը: Բացառիկ հանգամանքներ այստեղ չկան, դատարանը չէր կարող կիրառել 64-րդ հոդվածը: Անպայման պետք է վերաքննիչ բողոք բերվի պատժի մեղմության դեմ»,-պարզաբանեց գործով մեղադրող, ՀՀ գլխավոր դատախազության քննչական վարչության մարդկանց թրաֆիկինգի եւ անօրինական միգրացիայի դեմ պայքարի բաժնի ավագ դատախազ Արմեն Բոշնաղյանը:

Դատավորի կողմից նման մեղմ պատիժների սահմանումը բացատրվում է միայն այն հանգամանքով, որ ամբաստանյալները հայկական սեքս-բիզնեսի ներկայացուցիչներ են եւ ունեն բավականին ազդեցիկ հովանավորներ:

Թե ինչպիսի հանգամանքներ է հաշվի առել դատավորը մեղմ պատիժ սահմանելով երեք ամբաստանյալների նկատմամբ, պարզ կդառնա վճռի ամբողջական հրապարակումից հետո: Հնարավոր է պարզվի, որ այս մարդիկ պատերազմի մասնակիցներ են կամ այլ ծառայություններ ունեն մատուցած Արմավիրի առաջին ատյանի դատարանին:

Մենք մի քանի անգամ նշել ենք, որ կավատների մեջ մեծ թիվ են կազմում է Էջմիածնի բնակիչները: Կավատների նկատմամբ հարուցված քրեական գործերի, նրանց գործունեության ուսումնասիրությունը եւ մեր աղբյուրների վկայությունները թույլ են տալիս եզրահանգելու, որ նրանց թիկունքում Էջմիածնի գեներալներից մեկն է:

Ամիսներ առաջ հենց նրա միջնորդությամբ է «Աբովյան» քրեակատարողական հիմնարկից վաղաժամկետ ազատվել էջմիածնեցի մեկ այլ հայտնի կավատ' Մարիետա Մուսայելյանը: Մեր տեղեկություններով' «Դըբռ Անոյի» եղբոր' Պատվական Մալխասյանի համար դատավորին միջնորդել է հենց նույն գեներալը:

Հաշվի առնելով, որ դատավոր Տիգրան Պետրոսյանը նաեւ Արդարադատության խորհրդի անդամ է, կարծում ենք' այս դատավճիռը պետք է քննարկման նյութ դառնա Արդարադատության խորհրդում:

Մեկնաբանություններ (1)

Andranik
Dubai kyanken lrev sute. Serele khapvac hay aghjekner, chvakhenak yrbek. yes orenken shat lav getem havatacek ents yev harcrek voryve eravabanec. Ovker vor erok khapvacen sut khostumnerov yev sut ashkhatankov karoghen eranc pashpanel yev voj me orenk che datapartelu erenc, ays orenken bolor yrkernerumel nuynne. Ayd mamarozanere surje mej kam hyute mej knelu degh acek, yrb nrank knecen duk tser passporten yev gumaren vercrek yev pakhchek depe Hayastan, sa amenec lav tarberakne azatvelu hamar ayd anasunere tserkec, mek vakhena kaj yghek yev heshek Astcun, yes vstaem vor duk kazatvek ayd tagardec. Uresh tarberak chunek yte uzumek Hayrenek veradarnak tser yrekhanere yev untaneke mot. Khndrumem kaj yghek chvakhenak, Astvac tsez pahapan.

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter