Շնող գյուղի մոտակա անտառում (Լալվարի անտառտնեսություն) կա մի լանջ, որտեղ վերջերս անտառահատումներ են իրականացվել` մոտ 500 թարմ հատված ծառեր թեք լանջի վրա: Այդպիսի հատումները չեն կարող համապատասխանել հաստատված չափորոշիչներին, քանի որ կատարվել են 30-40 աստիճան թեքությամբ լանջի վրա` մեծացնելով սողանքների հավանականությունը: Հատվել են ծառերի զգալի մասը, ինչի արդյունքում անտառն ինքնավերկանգնվելու հնարավորությունից զրկվել է: Լուսանկարներում երևում է, որ այդ ծառերը հատվել են վերջին ամիսների ընթացքում: Լանջը գտնվում է Թեղուտի հանքի կողքով անցնող ճանապարհի վրա, որը ձգվում է մոտ 20 կմ: Ճանապարհը կառուցել են հանքը շահագործողները, քանի որ նախկին ճանապարհի տեղն այժմ հանքի պոչամբարն է: Լուսանկարներն արվել են ճանապարհի առաջին 5-7 կմ-երին, այնտեղ կան մի քանի նմանատիպ լանջեր, որոնց վրա ծառերը, գրեթե ամբողջովին, հատված են: