Այսօր ժամանակավոր դադարեցվել է «Երկիր» օրաթերթի կայքի գործունեությունը: Գլխավոր խմբագիր Բագրատ Եսայանը «Հետքին» ասաց, որ այժմ աշխատում են կայքը վերականգնելու ուղղությամբ և կփորձեն այն վերագործարկել շատ արագ:

Խմբագրի խոսքերով` հստակ հայտնի չէ, թե երբ է կայքը վնասվել, քանի որ փորձ է արվել ոչ թե վերջնական կոտրել կայքը, այլ տեղադրվել է սպամ, որը կայքում եղել է մոտ մեկ ամիս շարունակ:

Այսօր ընթերցողները օրաթերթին բողոքել են, որ դժվարությամբ են մուտք գործում կայք և անվտանգության զգուշացումներ են ստանում, ինչից հետո օրաթերթի ցանցային ադմինիստրատորը հայտնաբերել է սպամը և ժամանակավոր դադարեցրել կայքի գործունեությունը' այն վերջնական վերականգնելու համար:

Բագրատ Եսայանը չբացառեց, որ կայքի վրա հարձակումը կարող է եղած լինել Թուրքիայից կամ Ադրբեջանից, սակայն այս մասին հստակ տեղեկություն նա չուներ: