Հարցեր Երեւանի քաղաքապետին
Երևանի քաղաքապետը չի պատասխանում հետևյալ հարցերին.
1) Ե՞րբ և ո՞ր իրավական ակտի հիման վրա է Երևան քաղաքի Մաշտոցի այգու տարածքի նպատակային և գործառնական նշանակությունը փոփոխվել, արդյոք այն համապատասխանո՞ւմ է Երևանի գլխավոր հատակագծին և հայեցակարգին:
2) Ե՞րբ են կատարվել հողհատկացումները, ի՞նչ իրավական ակտերով, որքա՞ն մակերեսով, ի՞նչ նպատակով, ի՞նչ իրավունքով և որքա՞ն ժամկետով, և ամենակարևորը` ո՞ւմ է հատկացվել
3) Քաղաքաշինական ի՞նչ ծրագրային փաստաթղթերի հիման վրա են ընդունվել հողհատկացումների վերաբերյալ որոշումները:
4) Կա՞ն, արդյոք, ճարտարապետահատակագծային առաջադրանքներ, քաղաքաշինական փորձաքննության եզրակացություններ և շինարարության թույլտվություններ տվյալ շինարարությունների համար:
5) Արդյոք իրականացվե՞լ է հասարակության ծանուցում և քննարկում տվյալ տարածքում կենսագործունեության փոփոխություն ակնկալող քաղաքաշինական գործունեության վերաբերյալ, եթե այո, ապա` ե՞րբ, ո՞ր լրատվամիջոցներով, ո՞ւմ մասնակցությամբ:
6) Ինչո՞ւ է ընտրվել այդ տարածքը` տասնյակից ավելի կրպակների տեղադրման համար և ո՞ր կազմակերպություններն են այդ շինարարակական աշխատանքներն իրականացնում:
7) Արդյոք սրճարանի տերն իրավունք ունի՞ այդ տարածքում իրականացնել շինարարություն, այն էլ բետոնապատել ծառերի շրջակայքը, այնպիսի տպավորություն է, որ այդ սրճարանի տերը կրպակների անվան տակ ձեռքի հետ իր տարածքն է ընդլայնում:
8) Երևանի քաղաքապետարանն ինչո՞ւ մինչև օրս գրավոր չի պատասխանում մեր գրավոր հարցումներին, իսկ քաղաքապետարանի ներկայացուցիչը չի տրամադրում իր ձեռքի տակ եղած փաստաթղթերը, այդ մասին ասում է միայն բանավոր և օդի մեջ ցույց տալով դրանք դնում է ծոցագրպանը:
«Տեղեկատվության ազատության մասին» ՀՀ օրենքի 6-րդ և 9-րդ հոդվածների պահանջների համաձայն վերոնշյալ հարցերի վերաբերյալ պատասխանները/տեղեկատվությունը Երևանի քաղաքապետարանը պարտավոր է տրամադրել 5-օրյա ժամկետում, ինչը չի կատարել, իսկ դրա համար նա ենթակա է պատասխանատվության: Մաշտոցի այգու «պաշարումը» մեր կողմից կշարունակվի այնքան ժամանակ, քանի դեռ քաղաքային իշխանությունը չի պատասխանել մեր կողմից բարձրացված հարցերին և չի դադարեցրել ապօրինի շինարարությունը:
Ի վերջո, Երևանի քաղաքապետը պարտավոր է հաշվի առնել իր բնակիչների կարծիքը և հաշվի նստել նրանց կարծիքի հետ, անձամբ այցելել տարածք և իր աչքով տեսնել ու հասկանալ, թե բնապահպան ակտիվիստներն ինչի համար են պայքարում, միգուցե իր ենթականերն իրեն այն չեն զեկուցում, ինչն անհրաժեշտ է:
Համոզված ենք, որ Երևանի քաղաքապետին ոչ ճիշտ տեղեկություններ են ներկայացվում իր ենթակաների կողմից, մոլորեցրել են իրենց խեղաթյուրված փաստերով: Ուստի, պահանջում ենք Երևանի քաղաքապետից վաղն ևեթ ցանկացած ժամի անձամբ այցելել Երևանի Մաշտոցի այգի` Մոր և մանկան ծննդատան հարևանությամբ, և հանդիպել, լսել մեր` բնապահպաններիս պահանջը, իր աչքով տեսնել վիճելի տարածքը:
Մերի Խաչատրյան
ՀՀ քաղաքացի, բնապահպան-ակտիվիստ
Մեկնաբանություններ (4)
Մեկնաբանել