Սյունիքի մարզի Հարթաշեն համայնքի ղեկավար Ազատ Ղուկասյանի՝ 14-ամյա աղջնակի հետ կատարածի առնչությամբ հարուցվել է քրեական գործ՝ «Ակնհայտ տասնվեց տարին չլրացած անձի նկատմամբ անառակաբարո գործողություններ կատարելու» հոդվածի հատկանիշներով (142-րդ հոդվածի 1-ին մաս):

Գյուղապետին դեռեւս ազատությունից չեն զրկել, նրան նույնիսկ մեղադրանք չեն առաջադրել: Իսկ եթե, այնուամենայնիվ, փաստի առթիվ հարուցված հոդվածով Ազատ Ղուկասյանին մեղադրանք առաջադրվի, նա կարող է «պատժվել» ընդամենը տուգանք վճարելով 200-ից 400 հազար ՀՀ դրամ:

Գյուղապետ Ղուկասյանը միաժամանակ դպրոցում ֆիզկուլտուրա է դասավանդում: Նրա զոհին՝ 14-ամյա Կարինեին, առայժմ տուժող չեն ճանաչել: Կարինեի հորեղբայրը՝ Գագիկը, «Հետքին» արդեն պատմել է, թե ինչպես է գյուղապետ-ուսուցիչը վարվել երեխայի հետ:

Ըստ այդմ՝ Ազատ Ղուկասյանի արարքը լիովին համապատասխանում է Քրեական օրենսգրքի՝ «Անչափահասի նկատմամբ սեքսուալ բնույթի բռնի գործողություններ կատարելը» հոդվածի հատկանիշներին: Քանի որ, ըստ Գագիկի պատմածների, համայնքապետը ոչ միայն տուժողի անօգնական վիճակն է օգտագործել (Կարինեն տառապում է մտավոր հետամնացությամբ), այլեւ սպառնացել է բռնություն գործադրել:

Այս պարագայում մեղադրյալը տուգանքով «պատժվելու» մասին չէր էլ կարող երազել, քանզի նշյալ հոդվածը որպես պատիժ նախատեսում է 4-ից 10 տարվա ազատազրկում:

Գործը գտնվում է քննիչ Վահրամ Դաղունցի վարույթում: Նա հրաժարվում է որեւէ տեղեկություն տրամադրել՝ «նախաքննության շահերից ելնելով»: Բայց եւ նշում է, որ նախաքննության ընթացքում ամեն ինչ էլ հնարավոր է՝ սկսած գյուղապետի կալանավորումից, ավարտած հոդվածի վերաորակումով:

Ինքը՝ այսօրվանից արձակուրդում գտնվող Ազատ Ղուկասյանը, «Հետքի» հետ զրույցում «բոլոր սրբություններով» երդվում էր, որ «100 տոկոսանոց» անմեղ է: Նրա խոսքերով՝ գյուղի ընտանիքներից մեկի նկատմամբ ինքը որոշակի փաստեր ունի, եւ իրեն փորձում են շանտաժի ենթարկել: Թե ինչ փաստերի մասին է խոսքը, կամ շանտաժով իրենից ինչ են պահանջում, Ղուկասյանը չի ասում: Միայն շեշտում է, որ հենց այդ ընտանիքի աղջիկն էլ «իբր դասարանում ինձ տեսել է այդ երեխայի հետ»:

«Ախր էդ երեխեն, էդ որ ասում ա՝ տեսել ա կամ ինչ ա արել, թող մի հատ դուռը բացեր, նայեր՝ ինչ ա կատարվում: Ասում ա՝ էդ դռան (վրա) ինչ-որ փոքր ծակ կա: Ախր, դուք չեք պատկերացնում, էդ դասասենյակի ձեւը որ իմանայիք, հետո պարզ կլիներ,- ասում է գյուղապետ Ղուկասյանը:- Ես հո էդքան ապուշ չեմ՝ դասարանում, աշակերտական սեղանին, հոգեկան մի քիչ էլ հիվանդ երեխա է… Դասարանին ոչ մի զամոկ չկա, ոչ մի փակելու բան չկա, ես հո էդքան հիվանդ չեմ՝ ժամը 9-ին մտնում եմ դպրոց ու գնում եմ էդ քայլի՞ն: Սա խելքին մոտիկ բան չի»:

Ինչո՞ւ էր աշակերտուհուն կանչել դասարան: Համայնքապետը կրկին չի պատասխանում՝ հորդորելով «ամեն ինչի մեջ չմանրանալ»:

«Ամեն ինչն էլ կա, բժշկական քննության էլ են տարել, ամեն ինչ էլ տարել են: Ես իմ տեղս նստած եմ, բժշկական քննությունն ինչ կպարզի, ինչ ուզում են անեն. ես արդար մարդ եմ»,- ասում է Ազատ Ղուկասյանը եւ նշում, որ բժշկական փորձագետն այսօր զննել է նաեւ իրեն:

Գյուղապետը վստահեցնում է, որ իր անվան հետ կապված նման միջադեպ երբեւէ չի եղել, իսկ նրանք, «ովքեր նման բաներ են ասում եւ գրում, պատասխան են տալու»: