«Ժառանգություն» խմբակցության պատգամավոր Անահիտ Բախշյանի հայտարարությունը Ազգային ժողովի մարտի 20-ի նիստում

«Ժառանգություն» կուսակցության խնդիրներից մեկը մշտապես եղել է տնտեսության բոլոր ոլորտներում փոքր ու միջին բիզնեսի հարկատուներին օրենսդրորեն պաշտպանելը, ինչը հնարավոր չէ իրականացնել՝ առանց ախտորոշելու նաև տնտեսական մրցակցության ոլորտի բոլոր հիվանդությունները: Խոսքը պետգնումների ոլորտում առկա զանգվածային կոռուպցիայի մասին է, որի պարագայում միայն դեղերի գնումների ոլորտի անօրինականությունների պատճառով պետբյուջեին հասցված վնասը կազմում է հարյուր միլիոնավոր դոլար:

ՀՀ Ընտրական օրենսգիրքը և ՀՀ Գնումների մասին օրենքն իշխանությունները կանխամտածված կերպով ընդունում են այնպիսի սողանցքներով, որպեսզի ընտրակեղծիքներով միշտ վերարտադրվեն և կարողանան պետական բյուջեն պարզապես կողոպտել, իսկ թե ժողովուրդը կարտագաղթի, և երկիրը կամայանա, իշխանություններին մտահոգում է միայն խոսքով:

Տնտեսական մրցակցության հանձնաժողովը 2012թ. փետրվարի 21-ին վարչական վարույթներ հարուցեց 15 դեղագործական ընկերությունների և 12 բուժհաստատությունների նկատմամբ, որ դեռևս ամիսներ առաջ կարող էր հարուցել առնվազն հարյուր բուժհաստատությունների նկատմամբ, բայց քանի որ ՀՀ բուժհաստատությունների տնօրենները գրեթե 100%-ով ՀՀԿ և ԲՀԿ անդամներ են, նրանց բացարձակ մեծամասնությանը իշխանությունները չդիպան` տնտեսական մենաշնորհի դեմ պայքարը վերածելով նախընտրական շոուի:

ՀՀ-ում խոշոր բիզնեսն ու  բարձրագույն իշխանությունը եղել և մնում են սերտաճած սիամական երկվորյակներ: Բուժհիմնարկների տնօրենները կանխամտածված կերպով մարզպետարանների, տարածքային կառավարման նախարարության, Երևանի քաղաքապետարանի և այլոց հովանավորությամբ տնտեսական մրցակցությունը տարիների ընթացքում վերացրել և ձևական «մրցույթներով» հաղթողներին որոշել են իրենք` պետբյուջեին պատճառելով խոշոր չափերի ֆինանսական վնասներ:

2011թ. Գնումների մասին օրենքը երեք անգամ փոխվեց: Ոչ մեկն էլ գործնականում չգործեց, ավելին՝ կոռուպցիան պետգնումների ոլորտում ավելի խորացած ու  քողարկված բնույթ ստացավ...

«Ժառանգություն» կուսակցությունն առաջարկում է պետական գնումների գործընթացում և կոռուպցիայի դեմ պայքարում կիրառել արևմտյան երկրների մոդելը. այն է՝ մրցույթների անցկացման ժամանակ հաղթող մասնակցից պահանջել ներկայացնել դեղի կամ ցանկացած մրցութային ապրանքի  ձեռք  բերման  գինը  հավաստող փաստաթղթերը  (ձեռք բերման հաշիվ-ապրանքագիրը, տրանսպորտային ծախսերը հիմնավորող փաստաթղթերը և մաքսային հայտարարագիրը) և կառավարության որոշմամբ մասնակցին թույլատրել հավելագին ավելացնել պետության կողմից թույլատրելի խելամիտ շահույթի տոկոսադրույքի սահմաններում, որից 10-30% «ատկատ» տալը տեսականորեն և գործնականում անհնար կդառնա, իսկ ՀՀ պետբյուջեն և տնտեսության բոլոր ոլորտները ներառյալ տարեկան վիթխարի գումարներ կխնայեն: