Պատգամավորության թեկնածու Անուշավան Նիկողոսյանի կողմից համացանցով հայտարարություն է տարածվել այն մասին, որ Տաշիրի քաղաքապետ Նշան Սողոյանը՝այսինքն ես, արգելք եմ հանդիսացել Տաշիր քաղաքի կենտրոնական փողոցում եղած գովազդային վահանակի վրա նրա դիմանկարը պարունակող քարոզչական պաստառի տեղադրմանը:

Դա չի համապատասխանում իրականությանը և, իմ կարծիքով, նպատակ է հետապնդում նախընտրական քարոզչության ժամանակ սադրանքների միջոցով քաղաքական դիվիդենտներ շահել:

Իրականությունը հետևյալն է. դեռևս 2012 թվականի մարտի 26-ին քաղաքապետարան է ներկայացվել գովազդային վահանակները օգտագործելու վերաբերյալ պայմանագիր, որտեղ նշվել է, որ Տաշիր քաղաքի Երևանյան փողոցի վրա գտնվող, «ԷԳԱ» ՍՊԸ-ի կողմից տնօրինվող արտաքին գովազդային վահանակները տրամադրվել են ՀՀԿ ներկայացուցչին:

Սույն թվականի ապրիլի 8-ին՝ երեկոյան, քաղաքապետարանի աշխատակիցները հաղորդեցին, որ մի վերամբարձ մեքենա քաղաքի կենտրոնական փողոցում գտնվող 6 x 3 չափերի գովազդային վահանակի վրա պաստառ է տեղադրվում:

Ես փորձեցի պարզել, թե արդյոք նրանք պայմանագրով վահանակներն օգտագործող անձի ներկայացուցիչնե՞րն են: Պարզվեց, որ նրանք ընդամենը վարձավճարի դիմաց աշխատողներ էին և բոլորովին կապ չունեին պայմանագրի տիրոջ հետ:

Ուստի, ես խնդրեցի, որ նրանք ներկայացնեն համապատասխան փաստաթուղթ և հետո նոր շարունակեն իրենց աշխատանքը: Այնուհետև ես հեռացել եմ:

Ներկայումս քաղաքում փակցված չեն ընտրություններին մասնակցող որևէ կուսակցության կամ թեկնածուի նախընտրական քարոզչության պաստառներ, և որքան տեղեկացված եմ, Կարեն Կարապետյանը նախընտրական պաստառներ չի օգտագործելու:

Հայտարարության մեջ եղած այն արտահայտություն մասին, որ Կարեն Կարապետյանը իմ բարեկամն է և պատասխանատու է իմ արածների համար, կասեմ, որ նա զբաղված է եղել Սուբ զատկի և դրան հաջորդող մեռելոցի կազմակերպմամբ և ընդհանրապես տեղյակ չէ նկարագրված իրադարձություններից, որ ես նրա բարեկամը չեմ, և հետո կասեմ, իհարկե հումուրով, որ Կարեն Կարապետյանը շատ բարեկամներ ունի նաև Թբիլիսիում: Արդյոք դա նշանակո՞ւմ է, որ նա պատասխանատու է նաև Թբիլիսիում տեղի ունեցող դեպքերի համար:

Տաշիրի քաղաքապետ Նշան Սողոյան