HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Երանուհի Սողոյան

Նույն հրապարակում գյումրեցները պայքարում են Գեորգի Վանյանի, իսկ քաղաքապետարանի աշխատակիցները` բնապահպանների դեմ

Այսօր օրվա երկրորդ կեսին Գյումրիի Վարդանանց հրապարակը բավական մարդաշատ էր: «Ոչ Ադրբեջանական ֆիլմերին», «Գեորգի Վանյան, դու թուրք ես» վերտառությամբ պաստառներով «զինված» մի խումբ գյումրեցիներ որոշել էին բողոքի ակցիա կազմակերպել ընդդեմ Գյումրիում անցկացվող «Ստոպ» ֆիլմերի փառատոնի:

Այն կայանալու է ապրիլի 12-ին: Փառատոնի ընթացքում պիտի ցուցադրվեն 4 ադրբեջանական ֆիլմեր: Փառատոնն իրականացվում է ԱՄՆ դեսպանատան եւ Կովկասի խաղաղության կենտրոնի աջակցությամբ:

Երեւանում եւ Վանաձորում այն անցկացնելու փորձերը տապալվել էին քաղաքացիական ակտիվության ճնշման տակ: Գյումրիում բողոքի ակցիայի կազմակերպման նախաձեռնությունը թիվ 34 ընտրատարածքի պատգամավորության թեկնածու Արման Սահակյանի նախընտրական շտաբինն էր, թեպետ Ա. Սահակյանը «Հետքին» տված հարցազրույցի ժամանակ ժխտեց այդ հանգամանքը:

«Սա ինքնաբուխ հավաք է, ես այս ամենի հետ կապ ունեմ այնքանով, որ հայտնել եմ իմ հստակ դիրքորշումը: Ես որպես պատգամավորության թեկնածու չէի կարող զերծ մնալ Գյումրիում ընթացող այսպիսի հնչեղություն ունեցող գործընթացներից: Ես կարծում եմ, որ Հայաստանում ադրբեջանական ֆիլմերի փառատոն անցկացնելն ինքնին շատ վատ նախաձեռնություն է, մասնավորապես Գյումրիում՝ անթույլատրելի: Ես կոչ եմ արել բողոքել, բայց ես կազմակերպիչը չեմ»,- նկատեց Արման Սահակյանը:

Բողոքի ակցիային ներկա էին նաեւ քաղաքապետն ու քաղաքապետարանի աշխատակիցները, ՀԿ-ների ներկայացուցիչներ, մտավորականներ եւ այլք: Իսկ ահա գյումրեցի բնապահպան-ակտիվիստներին չեն թույլատրել մասնակցել ակցիային, քանի որ վերջիններս օգտվելով առիթից որոշել էին իրենց բողոքը հրապարակավ հայտնել տեղական իշխանությունների ներկայացուցիչներին: 

Ըստ «Շիրակ» ՀԿ-ի տարածած հաղորդագրության, երբ երիտասարդները մոտեցել են ցուցարանների բազմությանը, Գյումրու քաղաքապետարնի մամուլի խոսնակն ու քաղաքապետարանի մշակույթի բաժնի պետը բռնի կերպով խլել են դեռևս չպարզած ցուցապաստառներն ու բազմության միջից փորձել հեռացնել բնապահպաններին: Հնչել են նաեւ անպարկեշտ արտահայտություններ բնապահպանների հասցեին: Վերջիններիս անվանել են «ազգի դավաճաններ»: Իսկ ցուցապաստառների վրա գրված է եղել «Կանաչ, մաքուր Գյումրի» և «Պահանջում ենք բարեկարգված, առանց աղբի փողոցներ» արտահայտությունները:

Մեկնաբանություններ (1)

Val
Laveli Bnapahpanutiunic en el Hayastanum mi xosaceq eli!!!!! Glxavor bnapahpan@ vor BULOCHKAN lini, amen inch arden parza darnum ev bnapahpanutian ev iren nshanakoxi mut gorcuneutian kam poxain CASH haraberutiunneri masin.

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter