«Ժառանգություն» կուսակցության վարչության ղակավար Րաֆֆի Հովհաննիսյանին այսօր «Հայացք» ակումբում տեղի ունեցած ասուլիսի ժամանակ լրագրողները հարցրին, թե Ճի՞շտ են արդյոք այն խոսակցությունները, որ  «Ժառանգությունը» որոշ ուժերի հետ գաղտնի հանդիպումներ է անցկացնում, ինչի արդյունքում Ռոբերտ Քոչարյանի գլխավորությամբ ձեւավորվելու է դաշինք:

«Ես չեմ հավատում փակ հանդիպումներին։ Նման հանդիպումներ տեղի չեն ունեցել»,- ասաց Ր. Հովհաննիսյանը՝ մանրամասնելով, որ իրականում «քաղաքական զրուցակինցների հետ» ընթացել է «քաղաքացիական, հասարակական» հանդիպում։

Ռոբերտ Քոչարյանի հնարավոր առաջադրման դեպքում «Ժառանգությունը» կպաշտպանի՞ նրա թեկնածությունը: Կրկին հնչած հարցադրմանն ի պատասխան՝ Րաֆֆի Հովհաննիսյանն ասաց. «ՀՀ յուրաքանչյուր նախագահ իր ներդրումը կատարել է պետական շինարարության մեջ եւ իր չափով նաեւ պատասխանատու է այսօրվա անիրավ, անսահմանադրական, հակաժողովրդավարական վիճակի համար: Ես համարում եմ, որ այդ նույն պետական գործիչների պատասխանատվության ոլորտում է՝ որպես պետական պաշտոնյաններ (գործող կամ նախկին), որ իրենք պետության համար, նոր սերընդի համար այլընտրանքներ պատրաստեն եւ ոչ միայն մեկ հատ»:

Ըստ Հովհաննիսյանի՝ «Ժառանգությունն» իր գործն անելու է, իրենք ուզում ենք մասնակցել նոր այլընտրանքի ստեղծմանը. «Եվ համարում եմ, որ 3 նախագահների ներդրումը պետք է արժանանա թե քաղաքական, թե իրավական գնահատականի: Իսկ կարեւորը, թե ով է լինելու 4-րդը, որն է լինելու մեր 4-րդ գույնը, մեր 4-րդ ներկայացուցիչը: Ես կարծում եմ, որ դա լրիվ նոր տիրույթից է լինելու»:

«Իսկ ո՞վ է լինելու ՀՀ չորորդ նախագահը»,- հարցրին «Ժառանգության» ղեկավարին: Վերջինս նշեց, թե 100-ավոր այդպիսի մարդիկ կան՝ կին եւ տղամարդ, ովքեր կարող են դառնալ նախագահ: Բայց, այնուամենայնիվ, չորրորդ նախագահի հավանական թեկնածուն ինքը չէ:

«Ես չեմ հրաժարվում որեւէ բանից: Բայց ուզում եմ, որ Հայաստանն ունենա վերջապես քաղաքական արդյունք եւ դե յուրե իշխանություն: Մենք վերջապես պետք է 1995 թ. այս կողմ ունենանք իրավական, իրավացի երկիր, եւ դա իրացնելու համար ես պատրաստ եմ իմ թեկնածությունը դարձնել առավել հավանական կամ անհավանական»,- ասաց Րաֆֆի Հովհաննիսյանը: