Երևի Լոռվա բնությամբ ու լոռեցու անկեղծությամբ ոգեշնշված՝ ԲՀԿ առաջնորդ Գագիկ Ծառուկյանն էլ էր այսօր անկեղծացել և իմաստնությամբ լցվել: Իր կյանքի փորձը օրինակ ունենալով՝ վանաձորյան հանրահավաքում Ծառուկյանը մասնավորապես հետևյալ խրատական մտքերը փոխանցեց հավաքվածներին.

«Մարդ պետք է միշտ իր չափի մեջ լինի, ինչ էլ կարա անի, պետք է քիչ ասի: Մարդու տրամադրությունը, որ հավատ ես ներշնում, ուրեմն պետք է դա անես: Ավելի լավ ա՝ քիչ ասա, շատ արա: Ես միշտ ինչ-որ ասել եմ, քիչ ասել եմ, շատ արել եմ:

Հերոսը, ազգի հերոսը, ժողովրդի հերոսը պետք է լինի սովորական մարդը, աշխատող մարդը, բարիք ստեղծող մարդը, ոչ թե չինովնիկն ու պաշտոնյան:

Մարդիկ պետք է գիտակցելով մոտենան, և բյուջեի բաշխումը պետք է հավասարաչափ լինի, ճիշտ լինի, արդարացի լինի, և հիմնական՝ պետք է հետևողական լինեն:

Այսօր եթե ձեզ պարտադրում են այս կամ այն կուսակցությանը կամ անձամբ իրենց ձայն տալ, նրանք իրենց մասին են մտածում, իրենց տեղը ապահովելու համար են մտածում: Ժողովրդի մասին մտածողը կոչ չի անի, չի էթա պարտադրի մարդկանց: Ավանդների համար ով ասում ա՝ ավանդները միանգամից վերադարձնում ենք, սուտ ա ասում: Որ ասեն՝ վաղը կտանք, սուտ է, մենք մեր բյուջեի սահմանում պետք է շարժվենք: Այսօր ով ասում է, որ աշխատատեղերը բոլորը կբացվի, էլի սուտ են ասում: Աշխատատեղեր կբացվի 3-5%, առաջվա վիճակը չի. այսօր գիտությունը զարգացել է, գործարանում 3000, 5000 մարդ չի աշխատում, աշխատում են 50-100 հոգի, 40 հոգի:

Ես ամենակարևորը ուզում եմ ձեզ ասել, որ այսօր ամենակարևորագույն խնդիրը պետք է թեթևացում լինի, պայման պետք է լինի: Բացի դա՝ պետք է մրցակցություն լինի. կապ չունի Վայոց ձորից ա, Կիրովականից ա, Կոտայքից ա: Կապ չունի, որ կարող ա դա անել, մասնակցել մրցույթին, էդ աշխատանքն ու արդյունավետությունը կարող ա անել, ժողովրդի հոգսը հոգալ, խնդիրը լուծի, խնդիր չկա, թող կիրովականից լինի: Հարկավոր է պայման, հնարավորություն և մրցակցություն, ոը պետք է կատարվի: Անհրաժեշտ է հնարավորություն տալ մարդկանց, որ մարդիկ լավ ապրեն»:

Թե ինչ ճանապարհով պետք է հասնել դրան, Ծառուկյանն այդ մասին չխոսեց: