«Հայերը Վրաստանի խորհրդարանում նույնիսկ շշուկով «ցեղասպանություն» բառն արտասանելու իրավունք չունեն, քանի որ Հայաստանը Վրաստանին զիջել է մի շարք իրավունքներ այդ երկրի տարածքը որպես տրանզիտային զոնա օգտագործելու դիմաց: Իսկ ադրբեջանցիներն օգտվում են առիթից' շարունակելով իրենց լկտի և ցինիկ պահվածքը»,- այսօրվա ասուլիսի ժամանակ հայտարարեց ջավախքցի փորձագետ Ղևոնդ Մկրտչյանը:

Օրերս Վրաստանի խորհրդարանական դահլիճում տեղի ունեցած միջադեպը վրացագետ Ալիկ Էլոյանցը պատահական չի համարում: Հիշեցնենք, որ Վրաստանի խորհրդարանում վերջին նիստերից մեկի ժամանակ վրացի պատգամավոր Ջոնդի Բաղաթուրիան հայ երիտասարդների հետ հանդիպումից հետո հանդես էր եկել ցեղասպանությանը վերաբերող հայտարարությամբ:

Նրա ելույթն ընդհատվել էր ազգային փոքրամասնությունների ներկայացուցիչ, իշխող կուսակցության պատգամավոր, ադրբեջանցի Ազեր Սուլեյմանովի անմիջական արձագանքով, ով նրան անվանել էր «հայ», «Բաղաթուրյան» և անպարկեշտ արտահայտություններ հնչեցրել նրա հասցեին:

Ըստ Էլոյանցի' ադրբեջանցիները սպասում էին Բաղաթուրիայից այդօրինակ ելույթ և նախօրոք պատրաստված էին: Վրացական խորհրդարանի շենքի մոտ հավաքված սպասում էին ադրբեջանցի երիտասարդներ' «Բաղաթուրյան Ջոնդի», «Ջոնդին վաճառվեց հայերին» ցուցապաստառներով: Իսկ նիստի հենց սկզբից դահլիճում ներկա էր ադրբեջանական 4 լրատվամիջոց:

Փորձագետների կարծիքով՝ սրանք թուրք-ադրբեջանական պանթուրքական ծրագրերի նախածիլերն են: Նրանք ցանկանում են հյուսիսային լուսանցք բացել իրենց երկրների միջև, իսկ մեջտեղում սեպի պես խրված է հայաշատ Ջավախքը: