Սոնա Այվազյանը Սերժ Սարգսյանի ճաշակի մասին
«Նախագահի այցը Մաշտոցի պուրակ PR քարոզարաշվի մի մաս էր և բավականին էժանագին», - «Հետքի» հետ զրույցում ասաց «Թրանսփերենսի ինթերնեշնլ հակակոռուպցիոն կենտրոն» ՀԿ-ի նախագահ Սոնա Այվազյանը, ով այս ընթացքում բնապահպանների հետ պայքարում է պուրակի համար:
Նրա կարծիքով` բարոյական չէր, որ այս ամբողջ ընթացքում, երբ երիտասարդ բնապահպանները գիշեր-ցերեկ, եղանկային տարբեր պայմաններում հերթափոխով մնում էին պուրակում և պայքարում դրա համար, հանկարած ընտրություններից օրեր առաջ նախագահը «բարեհաճում է գալ» այգի, այնուհետև հրահանգում ապամոնտաժել բուտիկները, քանի որ դրանք նրա ճաշակով չեն:
«Անբարոյական քայլ էր»,-որակում է Սոնա Այվազյանը, որովհետև օրեր առաջ ոստիկանները բռնության էին ենթարկել բնապահապաններին, որոնք ստացել էին մարմնական վնասվածքներ, այժմ նախագահը գալիս և շնորհակալություն է հայտնում ոստիկաններին իրենց լավ աշխատանքի համար: Ս. Այվազյանի խոսքերով` դա պարզապես արհամարհանք էր քաղաքացիների նկատմամբ:
«Դա նախագահի պահվածք չէր: Սերժ Սարգսյանն իր այս քայլով վարկաբեկեց և ոստիկանության կառույցը, և Երևանի քաղաքապետարանին, որովհետև նա հասակացրեց, որ Երևանի քաղաքապետը որոշում ընդունող չէ, և այն օրենքները, որ գրված են, և այն իրավասությունները, որ ունի Երևանի քաղաքապետը, նշանակություն չունեն: Ինքն է որոշողը, իր ճաշակով է որոշելու, օրենքներին հետևելու կարիք չկա», - նշեց Ս. Այվազյանը:
Նրա կարծիքով` ոստիկաններին օգտագործել են որպես գործիք, իսկ պետությունն իր քաղաքացիների հետ խոսում էր ոստիկանների միջոցով: Այնինչ, ոստիկանությունը պետք է ընդունելի լինի հասարակության կողմից, ոստիկանների մոտ քաղաքացին իրեն պետք է զգա ապահով, ոչ թե հակառակը:
Տվյալ դեպքում, ըստ Սոնա Այվազյանի, ոստիկանությունը հայտնվեց ծիծաղելի իրավիճակներում, ընկալվում էր որպես թշնամի, որի պատճառով էլ վարկաբեկվեց:
«Հրամանները գալիս են վերևներից, և ոստիկանությունն օգտագործվում է իշխանությունների կողմից քաղաքական նկատառումներով` ի շահ նրանց նպատակների», - նշեց Սոնա Այվազյանը:
Ստացվում է, որ պետական կառույցները ծառայում են միայն որպես գործիք, իսկ որոշում կայացնողը մեկն է` «հայոց թագավոր Սերժ Սարգսյանը»:
Միաժամանակ, բացի վերոնշվածներից, Ս. Այվազյանը կարծում է, որ իր այս քայլով նախագահը վարկաբեկեց և էժանացրեց նախ և առաջ իրեն:
«Նախագահն այլ գործառույթների համար է, նախագահը բուտիկների տեղը իր ճաշակով որոշելու համար չէ», - համոզված է Ս. Այվազյանը:
Բուտիկների հարցը պետք է լուծեր քաղաքապետը, որը, սակայն կախված է ուրիշներից: Հետևաբար` հարցը պետք է լուծվեր նախագահի մակարդակով: Սակայն ճիշտ չէր, որ դա այդպես ցուցադրվեց: «Նախագահը չպետք է իրեն այնքան ստորացներ, որ գար ինչ-որ բուծիկի ճակատագիր որոշելու համար, ընդ որում` ոչ թե օրինականության, այլ ճաշակի շրջանակներում: Այսինքն` նրա ճաշակն այլ բան կարող էր թելադրել, և նա այլ կերպ կարող էր վարվել», - ասաց Ս. Այվազյանը:
Քանի որ հարցը դրվում է ճաշակի մակարդակում, ապա Ս. Այվազյանը գտնում է, որ հարցը համակարգային լուծում չի ստացել: Այսինքն` չկա երաշխիք, որ քաղաքապետը այլ անօրինական որոշում չի ընդունի այգիների տարածքում:
Ստեղծված իրավիճակում Ս. Այվազյանին ուրախացնում է այն հանգամանքը, որ բնապահպանները նախագահի այցի ժամանակ իրենց ճիշտ պահեցին, մնացին իրենց դիրքերում` չփորձելով շնորհակալություն հայտնել նախագահին:
Մեկնաբանություններ (1)
Մեկնաբանել