HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Սոնա Ավագյան

Սուրեն Զոլյան. «Ինձ աշխատանքից ազատեցին ոչ թե «տեռորիզմի» համար, այլ Եվրախորհրդի կոմիտեի նիստին մասնակցելու»

«Քանի որ ես պաշտոն նշանակելու համար կաշառք չեմ վերցնում, այդ մարդկանց ազատելը ինձ համար շատ հեշտ է: Ես նայում եմ՝ մարդը գործ անո՞ւմ է, թե՞ ոչ: Եվ իհարկե, որոշ մարդկանց համար դա անհարմար վիճակներ է ստեղծել»,- այսօրվա մամուլի ասուլիսում ասաց Բրյուսովի անվան պետական լեզվաբանական համալսարանի հեռացված ռեկտոր Սուրեն Զոլյանը՝ «Հետքի» խնդրանքով մեկնաբանելով մի շարք դասախոսների այն տեսակետը, որ իր պաշտոնավարման օրոք բուհում դեսպոտիզմի, ստալինիզմի, վախի մթնոլորտ է եղել, և շատ դասախոսներ հեռացվել են աննշան պատճառներով:

Սուրեն Զոլյանի խոսքերով՝ դասախոսների դժգոհությունը կապված է այն փոփոխությունների հետ, որոնք «ուսանողին դարձնում են մեր գործընկերը, այլ ոչ թե դասախոսի ճորտը»: Եվ շատերին, իհարկե, դուր չէր գալիս քննությունների ընթացքը:

Բանախոսը նաև ասաց, որ բուհում ինքը պահանջում է, որ դասախոսը և ավագ դասախոսը տիրապետեն գոնե բակալավրի, իսկ դոցենտը և պրոֆեսորը՝ գոնե ժամանակակից մագիստրոսի մակարդակի գիտելիքների: Այսինքն՝ դասախոսը նույնպես պիտի սովորի, և եթե չի սովորում, մինչև հիմա կարդում է 30-40-ականների մասնագիտական գրականություն, ապա իրավունք չունի ուրիշներին սովորեցնելու:

«Այսօր ուսանողը պահանջում է որակյալ կրթություն: Եթե ես դասախոսին հարցնում եմ մրցույթի ժամանակ՝ 5 տարվա ընթացքում ի՞նչ մասնագիտական գիրք է կարդացել, և ինքը ի վիճակի չի պատասխանել, դա իհարկե «տեռոր» է»,- ասաց Սուրեն Զոլյանը:

Նա չցանկացավ անդրադառնալ այն նամակին, որն իրենից դժգոհող դասախոսներն ուղարկել են նախագահին և վարչապետին: Ասաց, որ անգամ չի կարդացել այդ նամակը:

«Խնդիրը բարձրագույն կրթության հիմնախնդիրն է: Եվ վերջիվերջո, ինձ աշխատանքից ազատեցին ոչ թե «տեռորիզմի» համար, այլ Ստրասբուրգում Եվրախորհրդի կոմիտեի նիստին մասնակցելու: Միգուցե «ստալինիզմի» համար ժամանակը կգա, ուրիշ նկատողություն կստանամ, այն ժամանակ էլ կքննարկենք: Ուղղակի ասեմ, որ ամենաստոր հոդվածը (ես չեմ կարդացել) գրել է մի մարդ, որը ժամանակին ազատվել է դեկանի պաշտոնից, թեև ամեն քայլին ասում էր, որ Բրյուսովի արձանի կողքը պիտի նաև իմ արձանը կանգնեցնել»,- ասաց Սուրեն Զոլյանը: Նա հրաժարվեց հայտնել այդ մարդու անունը:

Հեռացված ռեկտորը «սուտ» որակեց դասախոսների այն տեղեկությունները, որ ինքը դասախոսի է հեռացրել՝ լսարանից դուրս գալու և աթոռ բերելու համար:

«Ինչ-որ բան եղել է, որ ես դասախոսին տեսել եմ միջանցքում, հարցրել եմ՝ «ի՞նչ ես անում, կես ժամ անցել է դասից», ասում է՝ «ես գնում եմ աթոռ բերելու»: Ես ինչ-որ դեպք հիշում եմ, բայց որ իրեն աշխատանքից դրա համար հեռացնեն, ուղղակի ծիծաղելի է: Դասախոսը դասի ժամանակ պիտի լսարանում լինի. եթե աթոռ չունի, հենց 1-ին րոպեին կարող էր բերել: Դասից 30 րոպե անցել է, միջանցքում աթո՞ռ է ման գալիս դասախոսը: Մի քիչ ծիծաղելի է»,- ասաց Սուրեն Զոլյանը:

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter