Շաբաթ, 22 սեպտեմբերի

Եվս մեկ ընտրություն՝ «գայլերը կուշտ մնացին, իսկ գառները`ողջ» սկզբունքով



Մայիսի 6-ին հայաստանցիներն առաջիկա հինգ տարիների համար ընտրում էին երկրի բարձրագույն օրենսդիր մարմինը՝ խորհրդարանը, ֆրանսիացի ժողովուրդը` իր նախագահին, ով նույնպես առաջիկա հինգ տարիներին կառաջնորդի նրանց: Ֆրանսիան քվեարկեց իր բարեկեցության համար` իր երկրի առաջընթացը կապելով իշխող ուժի փոփոխության հետ: Հայաստանյան ընտրողն առաջնորդվեց պահի թելադրանքով՝ վաճառեց իր քվեն, որովհետեւ հույս չէր կապում քաղաքական ուժերից որեւէ մեկի հետ:

Վերլուծաբանները կանխատեսում էին Սարկոզիի պարտությունը դրա հիմնական պատճառը համարելով նրա ղեկավարման շրջանում Ֆրանսիայի տնտեսության անկումը, մահմեդականների իրավունքների սահմանափակումը, ներգաղթյալների համար կոշտ սահմանափակումներ մտցնելը եւ այլն, որոնք մեծ դժգոհութուններ էին առաջացրել բնակչության շրջանում, եւ անհամաձայնությունը ֆրանսիացիները հայտնեցին իրենց քվեով: «Մենք սիրում ենք Ֆրանսիան»,- հրաժեշտից առաջ համախոհներին հայտնեց Նիկոլա Սարկոզին` նրանց նույնպես կոչ անելով չընդվզել եւ արժանապատվորեն ընդունել իր պարտությունը:

Չեմ ուզում հայերիս համեմատության մեջ դնել ֆրանսիացների հետ, ովքեր իրենց նախագահին չներեցին երկրի տնտեսության անկման եւ իրենց հարկերով հույներին, պորտուգալացիներին եւ այլոց կերակրելու համար: Համեմատության մեջ չեմ դնում նաեւ իսպանացիների հետ, ովքեր Հռոմի պապի երկիր այցելության օրերին փողոց էին դուրս եկել՝ «Ոչ իմ հարկերի հաշվին» կարգախոսով՝ պահանջելով սահմանափակել շռայլումները: Հայաստանցիների ճնշող մեծամասնությունը, ցավոք, դեռեւս բարեկեցության համը չի զգացել եւ քաղաքականապես այնքան հասուն չէ, որ կարողանա կանխել պետական բյուջեի անխնա թալանը, բայց չի էլ հանդուրժել իրեն հարստահարող օլիգարխների այն մեծ բանակին, ովքեր համախբվել են իշխող կուսակցության դրոշի տակ: 

Մինչդեռ խորհրդարանական ընտրությունների պատկերից պարզ է դառնում, որ Հայաստանում անցած հինգ տարիների ընթացքում խորացող սոցիալական ճգնաժամը, ծայրահեղ աղքատների թվի կրկնակի ավելացումը, արտագաղթի շարունակական աճը, անգամ ընտրություններին նախորդող օրը իշխող քաղաքական ուժի հրավիրած հանրահավաքում տեղի ունեցած ողբերգությունը, փաստորեն, չխամրեցրին բնակչության սերն առ նախագահը: Չգիտեմ, մեզ երբեւէ կվիճակվի այդքան խոհեմ ու արժանապատիվ ղեկավար ունենալ, որի համար կարեւորը իր երկրի ապագան լինի ու իր ժողովրդի վստահությունը չկորցնելը:

Իհարկե, խորհրդարանական ընտրությունների արդյունքները չզարմացրին որեւէ մեկին. ամեն ինչ կանխատեսելի էր, նույնիսկ խարդավանքի ուղղությունն էր հայտնի այն օրից, երբ հրապարակվեց ընտրողների թիվը: Ընդամենը մի քանի ամիս առաջ էր ավարտվել մարդահամարը եւ կառավարությունը լիարժեք պատկերացում ուներ հանրապետությունում առկա բնակչության եւ ընտրողների իրական թվի մասին, որն անշուշտ, աղերս չուներ հայտարարվածի հետ: Սակայն դա չխանգարեց իշխող վարչակազմին հիմնավորելու այն հավանականությունը, որ վարկով ինքնաթիռի տոմս գնած ու դառնությամբ տուն ու տեղ լքած  քաղաքացիները կվերադառնան, որպեսզի մասնակցեն խորհրդարանական ընտրությանը: Հնարավոր էր, իհարկե, որ ոմանք սկզբունքորեն իրենց զայրույթն արտահայտելու համար գնային դրան: Քվեների տրամաբանությամբ` նրանք ոչ միայն վերադարձան ու մասնակցեցին ընտրություններին, այլեւ իրենց ձայնը տվեցին .... իշխող կուսակցություններին: Երեւի իրենց վտարանդի դարձնելու համար:

ՀՀ նախագահը նախընտրական առաջին ելույթներից մեկում իր առաջնորդած կուսակցության համար գնահատանքի արժանի ցուցանիշ էր ներկայացնում պետական բյուջեի աճը: Բայց քաջություն չուներ ասելու, թե ինչու են դրա արդյունքում աղքատությունն ու ծայրահեղ աղքատությունը կրկնապատկվել մեր երկրում:  Հոգ չէ, այդ ցուցանիշն անգամ իրենց օգտին էր, ուստի ընտրությունների գործընթացում ամենաառանցքային դերակատարությունը ընտրակաշառքին վերապահվեց: Ընտրազանգվածն այս անգամ արժեւորել էր իր քվեն`սղաճը հաշվարկելով եւ սա միակ դեպքն է, երբ նրա հետ չեն սակարկում: Մարդիկ վերցրին պարզված գումարը, գուցե այն տրամաբանությամբ, որ իրենից խլվածն են իրեն վերադարձնում, կամ՝ մտածեցին, որ րոպեական օգուտից բացի, իրենց, մինունույնն է, այլ բան չի հասնելու: Այս հանգամանքը հաղթանակած քաղաքական ուժը մեկնաբանում է իբրեւ «ժողովրդի ազատ կամքի արտահայտություն»:

Արդեն 20 տարի մեր երկրում ընտրություններն իրականացվում են այս սկզբունքով ` «գայլերը կուշտ մնան, իսկ գառները`ողջ»: Սակայն ամեն ընտրությունից հետո բարոյական անկումն ավելի է խորանում. ընտրությունները շահեկան բիզնեսի վերածած հաստ պարանոցներով ու սպորտային կազմվածքով տղամարդկանց խմբին այս անգամ միացել էին կանայք, ովքեր ոչ պակաս արհեստավարժությամբ էին իրականացնում իրենց առաքելությունը եւ որ ավելի խորշելի է, վնասարարության մեջ ներքաշվել էին 15-16 տարեկանները:


Գլխավոր էջ



Այս թեմայով

  • «Մհեր Մկրտչյան» թանգարանի ՀՀԿ-ական տնօրենը մեղադրվում է ընտրակաշառք տալու մեջ
    ՀՀ հատուկ քննչական ծառայությունում ավարտվել է Գյումրիի «Մհեր Մկրտչյան» թանգարանի տնօրեն Շ. Մելքոնյանի կողմից 2012 թ. մայիսի 6-ի ընտրություններին ընտրակաշառք տալու դեպքի առթիվ հարուցված քրեական գործի նախաքննությունը: Քրեական գործով դատավարական ղեկավարում իրականացնող դատախազը հաստատել է մեղադրական եզրակացությունը:
  • Ոստիկանություն. Գյումրիի «Մհեր Մկրտչյան» թանգարանի տնօրենը մայիսի 6-ին ընտրակաշառք է բաժանել, հարուցվել է քրգործ
    Հատուկ քննչական ծառայության և ոստիկանության Գյումրիի բաժնի ծառայողների հետևողական, ձեռնարկած օպերատիվ-հետախուզական և քննչական միջոցառումների շնորհիվ պարզվել է, որ մայիսի 6-ին՝ ՀՀ ԱԺ ընտրությունների ընթացքում, հիշյալ ավտոմեքենայից քաղաքացիներին ընտրակաշառք է բաժանել Գյումրի քաղաքի «Մհեր Մկրտչյան» թանգարանի տնօրեն, 1971 թ. ծնված Շողիկ Մելքոնյանը:
  • Գլխավոր դատախազությունը կզբաղվի ընտրախախտումների փաստերով (վիդեո)
    2012թ. մայիսի 6-ի ՀՀ ազգային ժողովի մեծամասնական ընտրակարգով պատգամավորության թեկնածու Գագիկ Հրաչյայի Ներսիսյանի ներկայացուցիչներ Տիգրան Եգորյանը և Լուսինե Հակոբյանը 2012թ. մայիսի 16-ին դիմել են Սահմանադրական դատարան՝ անվավեր ճանաչելու թիվ 17 ընտրատարածքային ընտրական հանձնաժողովի թիվ 41-Ա որոշումը և թիվ 17 ընտրատարածքում մեծամասնական ընտրակարգով պատգամավորի ընտրությունների արդյունքները:
  • ՀԱԿ. «ԵԱՀԿ/ԺՀՄԻԳ զեկույցը ծանր հարված է Հայաստանի վարկին միջազգային հանրության աչքում»
    ԵԱՀԿ/ԺՀՄԻԳ վերջնական զեկույցը, բնականաբար, ծանր հարված է հասցնում Հայաստանի վարկին միջազգային հանրության աչքում եւ նաեւ թուլացնում է Հայաստանի դիրքերը բանակցային գործընթացում, ինչի ամբողջական պատասպանատվությունը կրում են այս իշխանությունները, որոնք, ամբողջովին կեղծելով ընտրությությունները, ըստ էութան մերժել են հայ ժողովրդի կողմից սեփական իշխանություն ընտրելու իրավունքը:
  • ՍԴ-ն մերժեց Հարությունյանին
    ՀՀ Սահմանադրական դատարանն այսօր ուժի մեջ թողեց թիվ 37 Ընտրատարածքային ընտրական հանձնաժողովի որոշումը, որն այսօր վիճարկում էր նույն ընտրատարածքում մեծամասնական ընտրակարգով ինքնառաջադրված, Գորիսի նախկին քաղաքապետ Սամվել Հարությունյանը:
... կարդացեք ավելին «Ընտրություններ-2012» թեմայով
Մեկնաբանություններ (5)
1. Լեվիկ18:04 - 10 մայիսի, 2012
Շատ տեղին վերլուծություն, գրված ըմբռնելի լեզվով...
2. Վարազ Սյունի (Ամստերդամ)05:13 - 11 մայիսի, 2012
Իմ համոզմամբ Հայաստանում էլ կախարդական փայտիկն այնքան էլ կախարդական չէ, քանի որ այն կոչվում է (միգուցե արդեն կլիշե դարձած) ՔԱՂԱՔԱՑԻԱԿԱՆ ՀԱՍԱՐԱԿՈՒԹՅՈՒՆ (civil society): Հայաստանում պիտի ՇԱՏ ՀՍՏԱԿ ԳԻՏԱԿՑԵՆ, որ նկարագրողական-պասիվ-սպասողական կեցվածքով ՇԱՏ ՔԻՉ բան է փոխվելու: Պիտի վեր կենալ ու ստեղծել քաղաքացիական խմբեր ու ՊԱՀԱՆՋԵԼ: Post-modern Facebook/youtube-ային դարում շատ բան է հնարավոր: Ես ուղղակի ՀԱՄՈԶՎԱԾ եմ,որ Հայաստանում օլիգարխային կլանի բուրգի փլուզումը ԱՐԴԵՆ ՍԿՍՎԱԾ է,քանի որ բուրգի հիմքից ԱՐԴԵՆ քարերը սկսել են հանել. այսինք,մարդիկ ԱՅԼԵՎՍ ՉԵՆ ՀԱՎԱՏՈՒՄ իրենց ասվածներին: Հռոմի կայսրությունն էլ ոչ թե կործանվել է թշնամու զարկից, այլ նրանից,որ Հռովմեացիները սկսեցին ՉՀԱՎԱՏԱԼ սիստեմին: Ես կանխատեսում եմ,որ առաջիկա 1-2 տարում Հայաստանյան քաղաքական պայքարը հիմնականում լինելու է ՔԱՂԱՔԱՑԻԱԿԱՆ և պառլամենտից դուրս: ԲՈԼՈՐ օլիգարխային-կլանային համակարգերը այսպես են ընկել: Ասեմ նաև,որ Հայաստանում օլիգարխային կլանի ՆԵՐՔԻՆ կալիբրը սկի էլ մեծ չէ. դրա համար են ԻՐԵՆՑ ԿՈՏՈՐԵԼՈՎ ( կուսակցական խաղալով ) ուզում թաքնել ԱԺ-ի աթոռների հետևում:
3. A Friend12:48 - 11 մայիսի, 2012
Excellent Article...
4. Սուսաննա19:02 - 11 մայիսի, 2012
Ես կասեի՝ գայլերը մնացին կուշտ, գառները՝ ընդմիշտ ոչխար:
5. Վարդան10:56 - 12 մայիսի, 2012
Րաֆֆի Հովհաննիսյանը ասում էր, որ եթե ընտրությունները կեղծվեն, ապա «Ժառանգությունն» ու ժողովուրդը կգան հրապարակ և կպայքարեն հանուն ժողովրդավարության: Փաստորեն ընտրությունները չեն կեղծվել...
Մեկնաբանել
Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

Լատինատառ հայերենով գրված մեկնաբանությունները չեն հրապարակվի խմբագրության կողմից։

Լրահոս

Բոլոր նորությունները

Արխիվ