HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Րաֆֆի Հովհաննիսյանը հրավիրեց Քաղաքացիական ժողով. վերադարձ Ազատության հրապարակ հունիսի 4-ին

Մայիսի 21-ին տեղի ունեցավ «Ժառանգություն» կուսակցության առաջնորդ Րաֆֆի Հովհաննիսյանի հրավիրած Քաղաքացիական ժողովը: Այն բաց էր հանրության համար, և դրան արձագանքել ու մասնակցում էին հարյուրավոր քաղաքացիներ, քաղաքացիական հասարակության և քաղաքական ուժերի ներկայացուցիչներ:

ՀՀ կառավարության դահլիճում բացելով Քաղաքացիական ժողովը՝ Րաֆֆի Հովհանիսյանն արժեքային իմաստով կարևորեց ոչ միայն 1991 թվականից մինչ օրս ընկած ժամանակահատվածը, անկախության և ինքնիշխանության համար երկարատև պայքարի շրջափուլը, այլև այն ապագան, որը պիտի կերտենք միասին, և որը մեզ տանելու է դեպի 2021 թվական, երբ մենք միասին կդառնանք 30 տարեկան:

«Ահա այդ նպատակով, այդ թիրախով մենք քաղաքացիական ազգային նոր օրակարգի ճշգրտման հրամայականի առջև ենք: Հնարավոր բոլոր եղանակներով առաջ տանենք մեր պայքարը և իշխանությունը վերադարձնենք ժողովրդին»,- ասաց Րաֆֆի Հովհաննիսյանը:

Ժողովը պայմանականորեն բաժանված էր երեք թեմատիկ նիստերի՝ ա/ Մարդու իրավունքներ և արդարություն, բ/ Հանրային կյանք, գ/ Ներքաղաքական և իրավաքաղաքական ելքեր:

Մարդու իրավունքների ու արդարության թեմայի շրջանակում ելույթ ունեցան Ավետիք Իշխանյանը, Սիրանույշ Դվոյանը և Արմեն Հովհաննիսյանը:

Անդրադառնալով քաղբանտարկյալների խնդրին՝ Հայաստանի հելսինկյան կոմիտեի նախագահ Ավետիք Իշխանյանը նշեց, որ մերօրյա քաղբանտարկյալների ազատումով խնդիրը, որը սկզբնավորվել է դեռևս 1995 թվականից, արմատապես չի լուծվի:

«Եթե չունենք դատական իշխանություն, ապա ցանկացած քաղաքական լարվածությունների ժամանակ կարող ենք նորից ունենալ քաղբանտարկյալներ»,- համոզված է Ավետիք Իշխանյանը:

Սիրանույշ Դվոյանն իր խոսքում ընդգծեց քաղաքացիական ինքնագիտակցության բարձրացման, ինչպեսև քաղաքացիական նախաձեռնությունների համագործակցված պայքարի կարևորությունը:

«Մենք դեմ ենք օտարալեզու դպրոցների վերաբացմանը» նախաձեռնության անդամ Արմեն Հովհաննիսյանը բոլոր քաղաքական ուժերից պահանջեց ստեղծել այնպիսի պայմաններ, որ ինքնին վերանա իր՝ քաղաքականությամբ զբաղվելու անհրաժեշտությունը, և ինքն ու իր նմանները «պարզապես կկարողանան ապրել անձնական կյանքով՝ շրջապատված մերձավորներով»։

Քննարկման ընթացքում իրենց դիտարկումները ներկայացրին Պարույր Հայրիկյանը, Լևոն Մարգարյանը, Ռաֆայել Համբարձումյանը, Հենրիկ Մխիթարյանը, ակադեմիկոս Լեոնիդ Պետրոսյանը, Արսեն Համբարյանը և ուրիշներ:

Հանրային կյանքին վերաբերող մարտահրավերները շարադրեցին Հրանուշ Խառատյանը, Տարոն Առաքելյանը և Մարատ Ատովմյանը:

Մասնավորապես, ազգագրագետ Հրանուշ Խառատյանն անդրադարձավ քաղաքացիների՝ սեփական ճակատագիրը տնօրինելու խնդրին: Նրա կանխատեսմամբ՝ արտագաղթը գնալով ուժգնանալու է:

«Այսօր երկրում անվստահության մթնոլորտ է և ամենուր արժանապատվության կորուստ: Մարդիկ կմնան Հայաստանում, եթե իրենք կարողանան տնօրինել իրենց գործունեությունը, եթե հավատան»,- շեշտեց նա:

Քննարկման ընթացքում համապատասխան նկատառումներով բանախոսներին լրացրին Գաբրիել Ավետիսյանը, Արման Մուշեղյանը, հաշմանդամ օդաչուների ներկայացուցիչ Միրզոյանը, սեփականազրկված քաղաքացիների անունից՝ Վաչագան Հակոբյանը, քաղաքացիներ Իրինա Հովակիմյանը, Հովիկ Սարգսյանը, Արմեն Պողոսյանը, Տիգրան Սուքիասյանը, Ռաֆիկ Ստեփանյանը և ուրիշներ:

Ներքաղաքական և իրավաքաղաքական ելքերի թեման արծարծեցին Կարապետ Ռուբինյանը, Գեղամ Նազարյանը և Տիգրան Նահապետյանը:

Ազգային ժողովի նախկին փոխնախագահ Կարապետ Ռուբինյանը նշեց, որ «իրար հաջորդող իշխանությունները չեն կարողացել երկրում ապահովել քաղաքացիների պարզ ակնկալիքների իրականացումը՝ ստեղծել իրավապես և սոցիալապես պաշտպանված միջավայր»:

Կարապետ Ռուբինյանի խոսքով՝ ՀԱԿ-ը հեռացավ արմատական ընդդիմության դաշտից և, փաստորեն, նախընտրեց իշխանության հետ բաց երկխոսության ճանապարհը, որի արդյունավետության մասին միայն ենթադրություններ կարող են արվել:

«Հայք» թերթի նախկին գլխավոր խմբագիր Գեղամ Նազարյանը նշեց, որ չի կարելի անցած դարի 30-ականների ոգով ազգի դավաճաններ, լրտեսներ կամ վնասարարներ փնտրել: «Եթե կանգ չառնենք և շարունակենք ատել միմյանց, դրանից որևէ մեկը չի շահի, իսկ ավելի ճիշտ՝ կշահեն մեր պետության հակառակորդները, որոնք նստած սպասում են, թե երբ ենք մեր ձեռքով կործանելու մեր անկախությունը»,- ասաց Նազարյանը՝ հավելելով, որ «սևի ու սպիտակի» ժամանակները վաղուց անցել են:

Թեմայի մասին խոսեցին «ՄԻԺԻ» ՀԿ-ի ղեկավար Արփինե Գալֆայանը, ՌԱՀՀԿ փորձագետ Էդգար Վարդանյանը և այլք:

Եզրափակիչ ելույթում Րաֆֆի Հովհաննիսյանը բոլորին հունիսի 4-ին՝ ժամը 15-ին, հրավիրեց Ազատության հրապարակ, ուր «կշարունակվեն այս բազմախոսությունը, հաղթանակի ելքը գտնելու համար այս ազատ քաղաքացիների փնտրտուքը»:

Մեկնաբանություններ (3)

Հովնան
Մի գուցե Հայրիկյանից էլ գոնե մեկ մեջբերում անեիք, անունը թվել ու անցել եք, կարծեք շարքային մեկի մասին է խոսքը:
Varaz Syuni in Amsterdam
Հայաստանը ir hayatsky CHPITI uxxi Evropayin. Evropan TSER u MAHATSOX mi marmin e. Inchpes Christoneakan kron-UTOPIAN e MAHATSEL Evropayum arden.....................................................Հայաստանը ir hayatsky PITI uxxi hent IREN: Հայաստանին - NEO-HETANOSUTIUN plus NATIONALISM.....................................................PS. Մարդու իրավունքները da HAMA-MARDKAYIN arjekner en, ayl voch miayn Evropakan.
Varaz Syuni in Amsterdam
Հայաստանի apaga GOYATEVMAN (u hzoranalu) hamar aysor MIMIAYN MEK factor e karevor. Ayn e: Hayastanum TSNELIUTIUNY KlINI minimum 2.5 YEREXA (kam 3.0 )......................................Sa e Հայաստանի linel/chlinelu HARTSY...........................................Isk sra hamar mardik PITI HAVATAN Հայաստանի APAGAYIN u mnan IRENTS yerkrum ( u nayev VERADARNAN)..............Usti hamadzayn em Հրանուշ Խառատյանի yev Կարապետ Ռուբինյանի het.

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter