Մշակութային բազմազանության պաշտպանության համաշխարհային տոնին նվիրված երթի դեմ կազմակերպված հակաակցիայի մասնակիցներն այսօր՝ ասուլիսի ժամանակ, հանդես եկան իրենց մեկնաբանություններով՝ երեկ տեղի ունեցած իրադարձությունների մասին:

Պատմաբան Վահե Աթանեսյանի խոսքերով՝ մայիսի 21-ին երկկողմանի շքերթ էր կազմակերպվել, ինչն էլ հասարակության մեջ հակասությունների տեղիք է տվել: Սակայն քիչ անց նա հայտարարեց, որ երթին հակադրվողների գործողությունները ինքնաբուխ էին, հենց տեղում կազմակերպվել են որոշ հայրենասեր երիտասարդների կողմից, ովքեր հավաքվել էին խաղաղ երթով քաղաքով անցնելու և հայրենասիրական երգեր երգելու համար:

Նշենք, որ «ինքնաբուխ» հավաքված երիտասարդների ձեռքերին «պատահաբար» հայտվել էին «սրանք голубой են», «հեռու պահեք երեխաներին» և նմանատիպ այլ պաստառներ:

«Երկու կողմերի մասնակիցները միմյանց հանդեպ ավելի հանդուրժող էին տրամադրված, քան այդ ամենը մեկնաբանողները,- նշեց Աթանեսյանն ու ավելացրեց:- Ցավալի է, որ բազմազանության երթը խոչընդոտող մասնակիցներին սոցիալական ցանցերում ֆաշիստ են անվանում: Ես ազգասեր եմ, բայց ազգայնական, առավել ևս ֆաշիստ չեմ: Երթի ժամանակ համասեռամոլության քարոզ էր ընթանում: Ով ինչ ուզում է, թող իր տանն անի, բայց այդ ամենը պետք չէ տարածել փողոցում»:

Երթին հակադրվողները հայտնեցին, որ իրենց սադրում էին և արհեստականորեն փորձում բախումներ առաջացնել:

«Սերունդ» ՀԿ-ի նախագահ Էդուարդ Սարիբեկյանը համոզված է, որ բազմազանության կողմնակիցներն ամենևին էլ բազմազանություն չեն ուզում, այլ ցանկանում են, բոլոր սահմանները ջնջելով, ստեղծել միատարր զանգված:

Ազգայնական դիրքերից հանդես եկող կողմի կարծիքով՝ անհրաժեշտ է միասեռականությունն ու Եվրոպայից փոխառած այլ բացասական երևույթներն արմատախիլ անել, պետք է մատնացույց անել դրանց կրողներին, ԶԼՄ-ներին էլ իրենք կոչ են անում նրանց լսարան չտրամադրել:

Լուս.՝ Վահե Աթանեսյան (ձախից) և Էդուարդ Սարիբեկյան