«Ժողովուրդ»-ի լավատեղյակ աղբյուրների փոխանցմամբ՝ ՀՀԿ առաջնորդ Սերժ Սարգսյանը զայրացած է Տնտեսական մրցակցության պաշտպանության պետական հանձնաժողովի ղեկավար Արտակ Շաբոյանի վրա: Սարգսյանին տեղեկացրել են, թե Շաբոյանն իր ամեն մի քայլը զեկուցում է վարչապետ Տիգրան Սարգսյանին: Անգամ երբ պետք է ինչ-որ կազմակերպության տուգանի, Շաբոյանը «թույլտվություն» է հարցնում վարչապետից:

«Ժողովուրդ»-ը փորձեց լուրը ճշտել ՏՄՊՊՀ մամուլի խոսնակ Գայանե Սահակյանից, որն ասաց. «Տեղեկատվությունը լիարժեք անհեթեթություն է, նման խոսակցություններ ընդհանրապես չկան: Պարոն Շաբոյանը լավ հարաբերություններ ունի և երկրի նախագահի, և վարչապետի հետ, ու որևէ խնդիր կամ բարկանալու առիթ չի եղել: Ավելին, հանձնաժողովի աշխատանքը շատ բարձր է գնահատվել, որը բազմիցս բարձրաձայնվել է: Իսկ տուգանքների առումով ասեմ, որ հանձնաժողովն անկախ է, և ոչ մի քննարկում չի լինում ոչ վարչապետի և ոչ էլ նախագահի հետ»: