Քիչ առաջ վարչական վերաքննիչ դատարանի դատավոր Արթուր Առաքելյանը հրապարակեց դատարանի որոշումը, որով մերժվեց հայցվոր Արտակ Բեգլարյանի հայցը, և անփոփոխ թողնվեց վարչական դատարանի վճիռը: Գործով պատասխանող կողմ են արտաքին գործերի և ֆինանսների նախարարությունները:

Հիշեցնենք, որ հայցվոր Արտակ Բեգլարյանը, ով վաղ տարիքում կորցրել է տեսողությունը, դիմել էր արտգործնախարարի կառավարման ներքո գտնվող Դիվանագիտական դպրոցում դասընթացներին մասնակցելու նպատակով քննություններ հանձնելու և ուսումը շարունակելու համար: Սակայն հայցվորին հայտնել էին, որ արտգործնախարարը՝ ի դեմ Դիվանագիտական դպրոցի, որոշել է մերժել հայցվորի դիմումի ընդունումը՝ պայմանավորված իր կուրությամբ:

Հայցվորը դատարանից պահանջում էր վերացնել իր դիմումը մերժելու ԱԳՆ-ի որոշումը, որպես իրենց պատճառված բարոյական վնասի մասնակի փոխհատուցում՝ ՀՀ-ից բռնագանձել 1 դրամ, վերացնել ԱԳՆ-ի կառավարման ներքո գործող Դիվանագիտական դպրոց ընդունվելու հնարավորության ապօրինի սահմանափակումը, պարտավորեցնել ԱԳՆ-ին իրականացնել իր ընդունելության քննությունը կամ իրեն ընդունված համարել Դիվանագիտական դպրոց:

Իսկ պատասխանող կողմը պնդում էր, որ ԱԳՆ-ն այս գործով չի կարող պատասխանող հանդես գալ, քանի որ հայցվորի վերաբերյալ որևէ վարչական ակտ չի ընդունել և պատասխանատվություն չի կրում Դիվանագիտական դպրոցի՝ դասընթացի մասնակցության մրցույթի հետ կապված գործողությունների համար:

Ավելին, պատասխանող կողմը, այս գործով պատասխանող լինելու պարագայում, հայցվորի դիմումի մերժման հիմքում կարող էր դնել կառավարության 2002թ. փետրվարի 13-ի որոշումը, ըստ որի՝ սահմանված են այն սահմանափակումներն ու հիվանդությունները, որոնք խոչընդոտում են ծառայողական պարտականությունների ու լիազորությունների կատարմանը: Այդ սահմանափակումների ու հիվանդությունների ցանկում ներառված է նաև կուրությունը:

2011թ. հոկտեմբերին վարչական դատարանը մերժել էր Արտակ Բեգլարյանի հայցը: Վարչական վերաքննիչ դատարանի որոշումն օրինական ուժի մեջ է մտնում հրապարակման պահից 1 ամիս հետո և նույն ժամկետում կարող է բողոքարկվել վճռաբեկ դատարան:

Արտակ Բեգլարյանը «Հետքին» հայտնեց, որ դատարան է ներկայացնելու նոր հայց՝ ընդդեմ Դիվանագիտական դպրոցի: Նա հայցի ամբողջական բավարարման դեպքում կարևոր էր համարում այն, որ «չտեսնողին թույլ կտրվի դիվանագետ դառնալ»:

Արտակ Բեգլարյանը գերազանցությամբ ավարտել է Երևանի պետական համալսարանի միջազգային հարաբերությունների ֆակուլտետի բակալավրիատը: Իր կուրության պատճառով՝ Հայաստանի արտգործնախարարի կառավարման ներքո գտնվող Դիվանագիտական դպրոցում սովորելու հնարավորությունից զրկվելուց հետո Արտակը մեկ տարի ուսանել է Անգլիայում: