ՈւԵՖԱ-ն 80.000 եվրոյով տուգանել է Հորվաթիայի ֆուտբոլի ֆեդերացիային իտալացիների հետ խաղում հորվաթ երկրպագուների անկարգապահությունների պատճառով: Ֆանատները ծխագլանակներ էին նետել մարզադաշտ ու հանդես էին եկել ռասիստական պաստառներով եւ կոչերով:

Սակայն ՈւԵՖԱ-ի կարգապահական կոմիտեի որոշումը կարող է բողոքարկվել երեք օրվա ընթացքում:  

Մինչ այդ կառույցը մեկ պաշտոնական խաղով որակազրկել էր Դանիայի հավաքականի հարձակվող Նիկլաս Բենտներին, ով պորտուգալացիների հետ խաղում գոլից հետո ցուցադրել էր ներքնազգեստի վրայի գովազդը, ինչն արգելվում է օրենքով: Բացի այդ՝ խաղացողը տուգանվել էր 100.000 եվրոյով:

30.000 եվրոյով էլ տուգանվել է Ռուսաստանի ֆուտբոլային միությունը, որի ֆանատները անկարգապահությունների հեղինակ էին դարձել լեհերի հետ խաղում: 4.000 եվրո էլ պետք է վճարի Լեհաստանի ֆուտբոլի ֆեդերացիան՝ իր երկրպագուների նմանատիպ արարքի պատճառով: Նշենք, որ ռուսների այս տույժը կապ չունի մինչ այդ հայտարարված տուգանքի հետ, ըստ որի՝ աշխարհի 2014 թ. առաջնության ընտրական փուլում նրանցից 6 միավոր է հանվելու, սակայն այս պատիժը պայմանական է: 

ՈւԵՖԱ-ն գործ է հարուցել նաեւ գերմանացիների դեմ, որոնց երկրպագուները Դանիայի հետ խաղում կիրառել են ճայթռուկներ: Գործը կլսվի հունիսի 23-ին: Երեք օր շուտ էլ՝ հունիսի 20-ին, կարգապահական կոմիտեն կքննի գործն ընդդեմ Անգլիայի ֆուտբոլային ասոցիացիայի. անգլիացի ֆանատները Շվեդիայի հետ խաղի ընթացքում փորձել էին դաշտ մտնել: