Այսօր ԱԺ-ում սկսվելու է նոր ձեւավորված կառավարության ծրագրի քննարկումը: Խորհրդարանական չորս ուժեր՝ Կոնգրեսը, ԲՀԿ-ն, ՀՅԴ-ն եւ «Ժառանգությունը», այդ ծրագրին «դեմ» են քվեարկելու, երկուսը՝ ՀՀԿ-ն եւ ՕԵԿ-ը, «կողմ»:

Երեկվանից ՀՀԿ խմբակցության ղեկավար Գալուստ Սահակյանը փորձում էր անձամբ «բերման ենթարկել» հանրապետական պատգամավորներին՝ այսօրվա նիստի համար: ՀՀԿ-ն որոշել է իրեն ապահովագրել անակնկալներից եւ այնպես անել, որ նիստին ներկա լինեն իր բոլոր պատգամավորները: Անգամ Ռուբեն Հայրապետյանը, որը լուրջ հակասություններ ունի ԱԺ նախագահ Հովիկ Աբրահամյանի հետ եւ նախորդ գումարման ԱԺ-ում՝ Աբրահամյանի նախագահության օրոք, ցուցադրաբար չէր մասնակցում նիստերին, իսկ նոր ձեւավորված ԱԺ-ի առաջին նիստում, երբ Աբրահամյանն սկսեց ելույթ ունենալ, Հայրապետյանը լքեց ԱԺ շենքը, այսօրվա նիստին մասնակցելու է:

Երեկ այդ մասին թերթին հայտնել է Գալուստ Սահակյանը: Հանրապետականները երեկ ասում էին, թե իրենց չի մտահոգում՝ մյուս ուժերն ինչպես են քվեարկելու, թեեւ ամեն ինչ արվում էր, որ այսօրվա նիստից որեւէ ՀՀԿ-ական չբացակայի: