սկիզբը

Այս տարվա մարտին դիմակավորված եւ զինված ոստիկանները ձերբակալեցին 63-ամյա Գագիկ Պապոյանին: Նրա գործը քննում է ՀՔԾ-ն, դրանում կան պաշտոնյաների անուններ, իսկ Պապոյանին մեղադրանք է առաջադրվել խարդախությամբ մոտ 1 մլն դոլարի՝ 407,4 մլն դրամի հափշտակության համար:

«Արամի 72-80 հասցեներում գտնվող կիսակառույց շենքի 150 բնակարանի վերաբերյալ Գագիկ Պապոյանը 520 պայմանագիր է կնքել: Նույն բնակարանը նա 3-4 հոգու վրա ծախել է: Իսկ եթե նույնիսկ նվազագույն գներով հաշվենք՝ քմ-ի գինը 1000 ԱՄՆ դոլար, եւ հաշվի առնենք այն, որ այդ 16 հարկանի շենքի 1 բնակարանը Պապոյանը 3-4 անգամ վերավաճառել է, ապա պարզ թվաբանությամբ հափշտակված գումարը կկազմի ոչ թե 1 մլն դոլար, ինչպես ՀՔԾ-ն է հաշվել, այլ մոտ 70 մլն դոլար»,- ասում է Լեւ Մնացականյանը եւ հույս հայտնում, որ նախաքննության ընթացքում ՀՔԾ-ն, այնուամենայնիվ, կպարզի հափշտակված գումարի իրական չափը:

Լեւ Մնացականյանը Բուզանդի փողոցի նախկին բնակիչ է: Արդեն 7 տարի է՝ նա իր երկհարկանի սեփական տնից զրկվել է եւ կրտսեր որդու ընտանիքի հետ ապրում է վարձով: Իսկ Մնացականյանի ավագ որդին այսուայնտեղ վարձով ապրելուց հետո ընտանիքով Հայաստանը լքել է:

2004թ. Կառավարությունը 909-Ն որոշմամբ Երեւանի կենտրոնում «պետության կարիքների համար» վերցված տարածքներում կառուցապատման ներդրումային ծրագրերի իրականացման նպատակով առանց մրցույթի հողամասեր տրամադրեց մի շարք ընկերությունների: Արամի փողոցի 72-80 հասցեների կառուցապատման իրավունքը տրվեց «Գապբնակշին» ՍՊԸ-ին, իսկ Բուզանդի 13-21 հասցեների իրացումը, տարբեր աճպարարություններից հետո, բաժին ընկավ «Վիզկոն» ՍՊԸ-ին:

Բուզանդի փողոցում ապրող ընտանիքներից 21-ը չնչին փոխհատուցմամբ տարածքից վտարվեց, իսկ մյուս 37 ընտանիքին (այդ թվում՝ Լեւ Մնացականյանին) «Վիզկոնը» պարտավորվել է բնակարաններ տրամադրել Արամի փողոցի 72-80 հասցեներում՝ «Գապբնակշինի» կառուցելիք շենքից: Շենքի կառուցումը մինչ օրս չի ավարտվել, իսկ «Գապբնակշինի» հիմնադիր-տնօրեն Գագիկ Պապոյանը վաճառել է նաեւ Բուզանդի նախկին բնակիչներին հասանելիք բնակարանները: Սակայն ուշագրավն այն է, թե ովքեր եւ ինչպես են գնել այդ բնակարանները:

«Միայն Հովհաննես Հովսեփյանը՝ նախագահի վերահսկողական ծառայության պետը, Արամի 72-80 նորակառույցում բազմաթիվ բնակարաններ է ձեռք բերել, եւ շատ հետաքրքիր է, թե կոռուպցիայի դեմ պայքարող, աշխատավարձով ապրող այս պաշտոնյային որտեղից այդքան գումար»,- ասում է «Պետական կարիքների զոհեր» (ՊԿԶ) ՀԿ նախագահ Սեդրակ Բաղդասարյանը:

Մնացականյանը բացահայտում է հովսեփյանական գնորդներին: Այսպես՝ Հովհաննես Հովսեփյանի բարեկամներից Գոռ Հակոբյանն ունի 1-ական բնակարան ու ավտոտնակ, Վահագն Ատոմյանը՝ 1-ական բնակարան ու ավտոտնակ, Ռոբերտ Մանուկյանը՝ 2-ական բնակարան ու ավտոտնակ, Պողոս Մկրտչյանը՝ 3-ական բնակարան ու ավտոտնակ եւ Ջուլիետա Ջոկլինյանը՝ 3-ական բնակարան ու ավտոտնակ:

Նախագահի վերահսկողության ծառայության պետի հարազատ քույրը՝ Ջեննի Հովսեփյանը, ունի 3 բնակարան եւ նույնքան ավտոտնակ: Վերջինիս ամուսնու՝ Մհեր Բիշարյանի անունով գրանցված են 2-ական բնակարան եւ ավտոտնակ, Հովսեփյանի քրոջ սկեսուրը՝ Կուկլա Համբարձումյանը, ունի 2-ական բնակարան ու ավտոտնակ: Հովսեփյանի կնոջ՝ Էվելինա Միրզաբեկյանի անունով գրանցված են 3-ական բնակարան ու ավտոտնակ, իսկ վերջինիս քույրը՝ Հովսեփյանի քենի Գայանե Միրզաբեկյանը, ունի 2 բնակարան եւ 2 ավտոտնակ: Անձամբ Հովհաննես Հովսեփյանն իր անունով ունի 2 բնակարան, 3 ավտոտնակ եւ 1 բիզնես տարածք:

Արամի 72-80 նորակառույցում վերը հիշատակված բոլոր անձանց ունեցվածքի վերաբերյալ դատական գործերը լսել է նույն դատավորը՝ Էդիկ Ավետիսյանը: Ավելին, բավարարելով բոլոր հայցերը, նույն օրը՝ անցյալ տարվա մայիսի 11-ին, նա կայացրել է 8 վճիռ:

«Դատալեքսում» ամեն գործի հետ, եթե նույնիսկ հայցվորները մի քանիսն են, նշված է միայն նրանցից մեկի անունը: Օրինակ՝ ԵԿԴ /0803/02/11 գործով նշված է Մհեր Բիշարյանի անունը, մինչդեռ նույն գործով իր առանձին բնակարաններով հայցվոր է նաեւ Ջեննի Հովսեփյանը: Կամ ԵԿԴ / 0779/02/11 գործով համահայցվոր է Էվելինա Միրզաբեկյանը, բայց նշված է միայն Հովհաննես Հովսեփյանի անունը:

Ընդհանրապես, Արամի 72-80 նորակառույց շենքի բնակարանների մասով արդեն 129 հոգու ունեցվածքի վերաբերյալ վճիռ կա, եւ աբսուրդն այն է, որ միեւնույն բնակարանը տարբեր վճիռներով հատկացվել է տարբեր անձանց:

Սրա հետ մեկտեղ, իրացված տարածքի՝ Բուզանդի փողոցի նախկին բնակիչներից որեւէ մեկին բնակարան հատկացնելու վճիռ չկա, թեեւ բնակիչներից ոմանք նման հայցով դատարան մտել են:

«Հետաքրքիրն այն է, որ Գագիկ Պապոյանը ուրիշներին քմ-ը վաճառել է 1400-1500 դոլարով, իսկ Հովհաննես Հովսեփյանին՝ 500-600-դոլարով, բայց վճարումների անդորրագրերը չկան: Այսինքն՝ կարող է եւ Հովսեփյանը փող չի տվել, ուղղակի ստիպել են, որ Պապոյանը գրի, թե՝ հա, տվել ա,- հավելում է Լեւ Մնացականյանը, - բացի դրանից՝ նրանց միջեւ կնքված պայմանագրի 5.3 կետով եթե Հովսեփյանը նախատեսված ժամկետներում իր բնակարանները չստանար, Պապոյանը պիտի վերադարձներ կրկնակի գումար: Դուրս է գալիս վաշխառություն, որը քրեորեն պատժվում է: Ու էլի մարդիկ կան, որ նման բան՝ կրկնակի գումար վերադարձնելու պայման են դրել»:

Մնացականյանի խոսքերով՝ Պապոյանն ու նախագահի վերահսկողական ծառայության պետը 1 օր ընդմիջումով նոտար Ալվարդ Մելքոնյանի վավերացմամբ կնքել են 2 պայմանագիր: Սակայն գրանցամատյանում պայմանագրերի համարների տարբերությունը 300-ից ավել է:

«Ստացվում է, որ նոտար Ալվարդ Մելքոնյանը 1 օրում 300-ից ավել պայմանագիր է վավերացրել, ինչը ֆիզիկապես հնարավոր չէ: Եթե ամեն մի գործարք ընդամենը 5 րոպեում էլ աներ, 1 օրը այդքան գործարքին չէր հերիքի, այսինքն՝ կեղծիք է կատարվել, հետին թվով պայմանագիրը սարքել են»,- ասում է Լեւ Մնացականյանը եւ շեշտում, որ պատկերն ամբողջանում է մեկ այլ իրողությամբ. վերոնշյալ էլիտար նորակառույցում բնակարան ունի նաեւ նոտար Ալվարդ Մելքոնյանը:

Դեռ 2006 թվականից իրացման տարածքի բնակիչները դիմում-բողոքներով պատկան մարմիններին հնարավոր խարդախությունների մասին ահազանգել են: Սակայն ամեն տեղից հիմնականում քաղաքապետարան վերահասցեագրված դիմումներին պատասխանել են (մասնավորապես՝ ԾԻԳ-ի այն ժամանակվա պետ Կարեն Դավթյանը), թե ամեն ինչ օրինականության շրջանակներում է, համապատասխան ստորաբաժանումներն իրականացնում են վերահսկողություն եւ անհանգստանալու կարիք չկա: Միայն տարիներ անց իշխանությունները հանկարծ պարզեցին, որ «Վիզկոն»-«Գապբնակշին» փոխգործակցության գրեթե ոչ մի դրվագ օրինական չի եղել:

Արդեն հիմա «խաբված գնորդները եւ իրացված տարածքի բնակիչները» 52 ստորագրությամբ վավերացված դիմում-բողոք են գրել նախագահ Սարգսյանին եւ գլխավոր դատախազ Աղվան Հովսեփյանին՝ խնդրելով քրեական գործ հարուցել բոլոր այն պաշտոնատար եւ ոչ պաշտոնատար անձանց նկատմամբ, որոնք մասնակցել են նորակառույցների խայտառակ կեղծիքներին: Նախկին քաղաքապետ Երվանդ Զախարյանից եւ նոտար Ալվարդ Մելքոնյանից բացի՝ դիմումատուները պահանջում են քրեաիրավական գնահատական տալ նաեւ նախագահի վերահսկողական ծառայության պետ Հովհաննես Հովսեփյանի գործողություններին:

Դիմումատուները հիմնավորել են, որ Հովսեփյանն իրեն ուղղված բազմաթիվ քաղաքացիների դիմում-բողոքներից ժամանակին տեղեկացել է «Գապբնակշինի» կատարած հանցագործության մասին, բայց համապատասխան մարմիններին իրազեկելու փոխարեն շտապել է համալրել իր ունեցվածքը՝ նույն ընկերության կառուցած շենքի հաշվին:

Նախագահականից մինչ օրս չեն արձագանքել:

Լուսանկարում Գագիկ Պապոյանն է: