Կարծում եմ, պահը հետզհետե հասունանում է իշխող կառավարման համակարգի ու նաև վերնախավի «մտածող» և «տեխնոլոգ» տարրերի ուշադրությունը հրավիրել եւ լրջորեն ուսումնասիրել սահմանադրականության գաղափարը և դրանից բխող մի ամբողջ կոնֆլիկտների պատմությունը և իրավունքների նվաճման գիտակից քաղաքացիական գործընթացները: Սա նրանց կօգնի չկրկնել անցյալի իրենց և իրենց գործատերերի և ուրիշների անդառնալի սխալները:

Իրավական կարգը նեղ տեխնոկրատիկ հասկացությամբ մեկնաբանելը և ձևական իրականացումները անիմաստ և անարդյունավետ են, եթե այդ կարգը և գործողությունները չեն բխում և հարգում սահմանադրականության գաղափարը: Գիտակից մարդ-անհատ-քաղաքացին և համախմբումները, որ մարսել են, համակրում են և վճռակամ են սահմանադրականության գաղափարը իրականություն դարձնել մեր հայրենիքում, ամենայն լեգիտիմությամբ իրավունք ունեն և կարող են դա կենսագործել իրենց անհատական և հավաքական ստեղծագործ գոյությունը և ապահովությունը պաշտպանելու համար:

Այդ գիտակից գործոնների համար ՈՒԺ-ի իմաստը իշխելը չէ, և ոչ էլ մենաշնորհը, դա վերաիմաստավորվում է սահմանադրական գաղափարախոսության համապատասխան. ՈՒԺ-ը արդարությունը օրինաչափ դարձնելու միջոց է:

Արմինէ Առաքելեան