ԵԱՀԿ գլխավոր քարտուղարը Հայաստան այցի ընթացքում հրադադարի ռեժիմի պահպանման կոչ է անում
ԵԱՀԿ գլխավոր քարտուղար Լամբերտո Զանյեն, ով այսօր պաշտոնական այցով Հայաստանում է, կարևորեց հրադադարի խիստ պահպանումը Հայաստանի և Ադրբեջանի միջև սահմանի վրա և շփման գծում` որպես Լեռնային Ղարաբաղի հակամարտության խաղաղ կարգավորման հասնելու նախապայման և երաշխավորեց ԵԱՀԿ շարունակական աջակցությունը Հայաստանի բարեփոխման ջանքերին:
Զանյեն ասել է, որ ԵԱՀԿ-ն լիովին աջակցում է ԵԱՀԿ Մինսկի խմբի համանախագահների կողմից խթանվող գործընթացին և ԵԱՀԿ գործող նախագահի անձնական ներկայացուցչի ջանքերին` նպաստելու հակամարտության բանակցային խաղաղ կարգավորմանը և իր մտահոգությունն է հայտնել շփման գծում և Հայաստանի ու Ադրբեջանի սահմանում զարգացումների վերաբերյալ` հատկապես ճակատային գծին մոտ բնակվող քաղաքացիներին թիրախ հանդիսանալը:
«Կա ակնհայտ անհրաժեշտություն` անհապաղ իրականացնելու միջոցառումներ, որոնք կկայունացնեն մտահոգիչ իրավիճակը և կկանխեն կյանքերի հետագա կորուստը, որ անընդունելի է», - ասաց նա արտգործնախարար Էդվարդ Նալբանդյանի հետ հանդիպումից հետո: «Երկու կողմերի համար անհրաժեշտ է ձեռնպահ մնալ հակահարվածի միջոցներից, որոնք կհանգեցնեն հետագա սրման, ինչպես նաև հեռացնել դիպուկահարներին շփման գծից` այս է իմ ուղերձը. որով ես նաև հանդես եկա Բաքվում»:
Զանյեն ընդգծել է, որ վստահություն ձևավորող միջոցառումների խթանումը, այդ թվում` մարդկանց շփումները հակամարտության կողմերի միջև, որի շուրջ համաձայնել են Հայաստանի և Ադրբեջանի նախագահները Սոչիում` ԵԱՀԿ առաջնահերթություն է:
Գլխավոր քարտուղարը նշեց` ԵԱՀԽ/ԵԱՀԿ-ին Հայաստանի մասնակցության քսան տարին, որ լրացավ այս տարի, «կարևոր հիմնաքար է» և ողջունեց բարեփոխումների ուղին, որին երկիրը ձեռնամուխ է եղել:
«ԵԱՀԿ - ն պատրաստ է լիովին աջակցել երկրին` իր կանոնակարգիչ, տնտեսական, ոստիկանության, դատական և ժողովրդավարական հիմնարար բարեփոխումներում, այդ թվում` ԵԱՀԿ երևանյան գրասենյակի միջոցով, որը սերտորեն ներգրավված է բարեփոխումների գործընթացում», - նշել է նա:
Ողջունելով մայիսի 6 -ի խորհրդարանական ընտրությունների խաղաղ անցկացումը` Զանյեն նաև կարևորեց հաջորդ տարվա նախագահական ընտրությունների նախաշեմին ԵԱՀԿ ժողովրդավարական հաստատությունների և մարդու իրավունքների գրասենյակի Ընտրությունների դիտորդական առաքելության նշած թերություններին ժամանակին անդրադառնալը ` «օգնելու բարելավել ընդհանուր վստահությունը գործընթացին»:
Այցի ընթացքում Գլխավոր քարտուղարը կհանդիպի նաև ՀՀ nախագահ Սերժ Սարգսյանի և ՀՀ Ազգային ժողովի նախագահ Հովիկ Աբրահամյանի հետ:
Երևան այցով Գլխավոր քարտուղարն ավարտում է իր` Հարավային Կովկաս ուղևորությունը, որը սկսվել էր Բաքվում հուլիսի 8 - 9 - ին, որին հաջորդեց հուլիսի 9 – 11-ի այցը Թիֆլիս:
Մեկնաբանել